Mo yeke na “mosoro na gbele Nzapa”?

JÉSUS CHRIST amû atoli mingi so apusu zo ti gbu li. Mbeni oko asala tene ti mbeni zo ti mosoro so ayeke na ayaka mingi. Ti leke si kekereke ti lo ague nzoni, wa ti yaka ni aye ti sala akota kota gogoro. Me, na yâ toli ti Jésus so, a hiri koli ni zo ti “buba”. (Luc 12:​16-​21). Ambeni Bible na yanga ti ambeni kodoro atene ti ala “zo ti fu”. Nda ti ngangu tënë so ayeke nyen?

Peut-être zo ti mosoro so ayôro Nzapa na yâ ye so lo leke pëpe; wala lo gonda Nzapa oko pëpe teti gbâ ti kobe ti ayaka ti lo (Matthieu 5:​45). Nde na so, lo pika kate ti lo, lo tene: “Âme, mo yeke na ye mingi na yâ gogoro, alingbi na ngu mingi; mo duti nzoni, mo te, mo nyon, na mo sala ngia.” Biani, lo bâ ti lo so ye ti peko ti angangu so lo sala ayeke duti tongana mbeni “gbagba ti bira” ti bata lo.​—aProverbe 18:11.

Ti gboto mê na ndo dutingo na mara ti baba tongaso, disciple Jacques asû tënë so na mbeti: “I ga fadeso, i so i tene, Laso wala kekereke fade e gue na kodoro ni so, e duti kâ ngu oko, e kä ngele, na e wara faïda, me i hinga pëpe ye so fade asi kekereke. Fini ti i ayeke nyen? Teti i yeke guru ti ngu so asi kete, si a miro.”​—Jacques 4:​13, 14.

Atënë so aga tâ tënë teti a tene na zo ti mosoro na yâ toli ti Jésus: “Mo buba, na bï so fade a hunda âme ti mo; na ye so mo leke awe, fade a yeke ti zo nyen?” Legeoko tongana guru so asigigi na lê ti ngu na kete na pekoni a hon, fade zo ti mosoro ayeke kui kozo si aye so lo leke ti sala aga tâ ye. E bâ mbeni ye ti manda ge? Jésus atene: “Tongaso zo so abungbi mosoro teti lo mveni, me lo yeke na mosoro na gbele Nzapa pëpe, lo yeke tongana zo so.” Mo yeke na “mosoro na gbele Nzapa”?