Eskê aTémoin ti Jéhovah ayeke changé atënë ti Bible ti tene ague oko na aye so ala mä na bê na ni?
Ên-ën. Me, tongana e bâ so aye so e mä na bê na ni ague tâ nde mingi na aye so Bible afa, e yeke changé aye so e mä na bê na ni.
Kozo ti tene e sigi na Mbeti ti Nzapa ti fini dunia na ngu 1950, e gi lani nda ti atënë ti Bible nzoni. E sara kua na atraduction ti Bible nde nde so ayeke dä na e gi ti bâ tongana nyen la ague oko na aye so e mä na bê na ni. Bâ ambeni tapande ti ye so aTémoin ti Jéhovah amä na bê na ni aninga awe, nga mo wani mo gi ti bâ wala ague oko na ye so Bible afa.
Ye so e mä na bê na ni: Nzapa ayeke mbeni Trinité ape. Le Phare de la Tour de Sion ti lango 15 ti décembre 1905 atene: “E mä na bê na Jéhovah, na Jésus nga na yingo vulu. Me, e ke afango ye kue so ague nde na ye so Bible afa na ndö ti Trinité so a tene Babâ ni, Molenge ni nga yingo vulu kue ayeke Nzapa oko.”
Ye so Bible afa: “Yahvé si ayeke Nzapa ti mo, gï Yahvé oko.” (Deutéronome 6:4, Tënë ti Nzapa, Kozo Mbuki). “Nzapa ayeke gï oko, Babâ mveni, Lo so ye kue alondo na Lo, na e yeke ti Lo; na Seigneur ayeke oko, Jésus Christ, Lo so ye kue aga na lege ti Lo, na e yeke na fini na lege ti Lo.” (1 aCorinthien 8:6, La Sainte Bible en Sango). Jésus lo wani atene: “Babâ ayeke kota ahon mbi.”—Jean 14:28, Mbeti ti Nzapa, Tënë so amu fini.
Ye so e mä na bê na ni: Tënë ti enfer so zo ayeke bâ pasi lakue lakue na yâ ni ayeke dä ape. Ti gue oko na aRomain 6:23 na yâ ti King James Version, numéro ti Le Phare de la Tour de Sion ti juin 1882, na Anglais, atene: “Futa ti peko ti siokpari ayeke kuâ.” Nga, a tene: “Fango ye so ayeke polele nga akpengba ape. Ye so ahon gbungo li ti zo ayeke so mingi ti azo so abâ Bible tongana Mbeti ti Nzapa angbâ ti ke fango ye ni so nga ala mä na bê so, so Bible atene futa ti peko ti siokpari ayeke kuâ aye ti sara tënë ti bango pasi teti lakue lakue na yâ ti wâ.”
Ye so Bible afa: “Âme so asara siokpari, fade a kui.” (Ézéchiel 18:4, 20, La Sainte Bible en Sango). Tongana a tene Nzapa ayeke punir ande azo so ake yanga ti lo aye pëpe ti tene so lo yeke sara pasi na ala na yâ ti wâ teti lakue lakue, me aye ti tene so lo yeke “futi ala lakue lakue.”—2 aThessalonicien 1:9, La Sainte Bible en Sango.
Ye so e mä na bê na ni: Royaume ti Nzapa ayeke mbeni vrai gouvernement, me pëpe mbeni ye so ayeke na yâ ti bê ti zo. Numéro ti Le Phare de la Tour de Sion ti décembre 1881, na Anglais, atene tënë so na ndö ti Royaume ti Nzapa atene: “Ti vrai ni, tongana a zia ande ngere ti Royaume ni na sese, a yeke futi aroyaume kue so ayeke na ndö ti sese.”
Ye so Bible afa: “Na lâ ti agbia so, fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.”—Daniel 2:44, La Sainte Bible en Sango.
Eskê aTémoin ti Jéhovah ayeke sara kua gï na Mbeti ti Nzapa ti fini dunia ti gbu na koko ti aye so ala mä na bê na ni?
Ên-ën, e yeke sara kua na gbâ ti atraduction ti Bible na yâ ti kua ti e ti fango tënë. Na ndö ni, atâa so e yeke mû na azo Mbeti ti Nzapa ti fini dunia senge senge ti tene e manda Bible na ala, anzere nga na e ti manda Bible na azo so aye ti sara kua na ambeni traduction ti Bible nde.