Ngbanga ti nyen la aTémoin ti Jéhovah ayeke sara politique ape?
A-Témoin ti Jéhovah ayeke sara politique ape ndali ti aye so ala mä na bê na ni so ayeke na yâ ti Bible. E yeke lï pëpe na yâ ti groupe ti azo so ayeke sara kpengbango-li na gouvernement, e yeke sara vote ape, e yeke gi pëpe ti wara aposte na yâ ti mbeni gouvernement nga e yeke yôro terê ti e pëpe na yâ ti aye so azo ayeke sara ti changé mbeni gouvernement. Araison so ayeke na yâ ti Bible la apusu e ti sara aye ni so ape.
E mû tapande ti Jésus, so ake lani ti yôro terê ti lo na yâ ti aye ti poroso (Jean 6:15). Jésus atene na adisciple ti lo so ala “yeke ti dunia so pëpe” nga lo fa na ala polele so ala doit ti mû mbage ti aye ti poroso ape.—Jean 17:14, 16; 18:36; Marc 12:13-17.
E yeke be-ta-zo na Royaume ti Nzapa, tongana ti so Jésus atene lani, lo tene: “A yeke fa ande nzoni tënë ti Royaume na ndö ti sese kue so azo ayeke dä.” (Matthieu 24:14). E yeke sara kua na iri ti Royaume ti Nzapa nga e yeke fa tënë ti gango ni. A yeke ndani la e yeke yôro terê ti e ape na yâ ti aye ti poroso ti dunia so.—2 aCorinthien 5:20; aÉphésien 6:20.
So e yeke sara politique ape, e yeke fa nzoni tënë ti Royaume ti Nzapa polele na azo so ayeke sara politique. E fa na lege ti atënë ti e nga na asarango ye ti e so gï Royaume ti Nzapa la ayeke leke ande akpale ti dunia so.—Psaume 56:11.
So e ke atënë ti kangbi so tënë ti poroso aga na ni, a sara si na yâ ti sewa ti e ti aita so ayeke na yâ ti dunia kue e yeke beoko (aColossien 3:14; 1 Pierre 2:17). Me, yâ ti abungbi ti Nzapa akangbi ndali ti so ala yeke yôro terê ti ala na yâ ti aye ti politique.—1 aCorinthien 1:10.
E ne azo ti gouvernement. Atâa so e yeke sara politique ape, e ne akota zo ti kodro ti ndo so e yeke dä. Ye so ague oko na commandement, so ayeke na yâ ti Bible, so atene: “Zia azo kue awoko terê na gbe ti akota zo ti komande so ayeke na ndö ti ala.” (aRomain 13:1). E yeke sara ye alingbi na ndia ti kodro, e yeke payé a-impôt nga e yeke yeda na aye so gouvernement asara ndali ti nzoni duti ti azo. Ahon ti tene e gi ti kinda mbeni gouvernement, e yeke sara ye alingbi na wango ti Bible so ahunda na e ti sambela ndali ti “agbia nga na azo kue so ayeke na komandema,” mbilimbili na ndö ti adesizion so ala yeke mû na ndö ti liberté ti vorongo Nzapa.—1 Timothée 2:1, 2, kete tënë na gbe ni.
E yeke ne nga droit so azo ayeke na ni na ndö ti adesizion so ala wani ayeke mû na ndö ti aye ti politique. Na tapande, e yeke ga na wusuwusu pëpe na ngoi so azo ayeke sara vote wala e yeke gi pëpe ti kanga lege na azo so aye ti gue ti voté.
So e yeke sara politique ape, eskê a yeke mbeni fini ye? Ên-ën. A yeke oko ye so abazengele nga na ambeni kozo Chrétien asara lani na mbage ti azo so ayeke na komandema. Mbeni buku (Beyond Good Intentions) atene: “Atâa so akozo Chrétien adoit ti ne azo so ayeke na komandema, ala ke lani ti mû mbage na yâ ti aye ti poroso.” Mbeni buku (On the Road to Civilization) ni nde atene nga so akozo Chrétien “asara lani politique ape.”
So e yeke sara politique ape, eskê a yeke ga na kpale na yâ ti kodro? Ên-ën. So e yeke amolenge ti kodro so aye siriri asara si akota zo ti kodro apeut ti sara mbeto ti e ape. So e yeke sara politique ape, mbeni mbeti (National Academy of Sciences of Ukraine) asara tënë na ndö ni na ngu 2001, a tene: “Laso, ambeni zo ake aTémoin ti Jéhovah ndali ti so ala sara politique ape; a yeke ndali ti oko raison ni so la a bi lani tënë na li ti ala na ngoi ti komandema ti aNazi nga na ti aCommuniste.” Me, même na gbe ti sarango ye ti ngangu ti ngbene Union soviétique, aTémoin ti Jéhovah angbâ lani anzoni molenge ti kodro so asara ye alingbi na andia. Ala sara ye lani na lege ni nga ala pensé gï na ala wani ape na lege so ala yeke sara kua maboko na maboko na azo na yâ ti aferme nga na yâ ti a-usine so a zia ala dä ti sara kua, na ala yeke lani pëpe azo so aga na kpale na komandema ti aCommuniste.” Mbeti ni akiri ahunzi na tënë so, legeoko nga laso, aye so aTémoin ti Jéhovah amä na bê na ni nga na asarango ye ti ala afa so “ala yeke ga na wusuwusu ape na yâ ti mbeni kodro.”