Mungo maboko na azo so abâ ndo ape
Mbeni gingo nda ti ye afa so na yâ ti dunia kue azo 43 million ayeke bâ ndo ape nga azo 295 million ayeke bâ ndo nzoni ape.a Mawa ni ayeke so, azo ayeke sara ye na ala na nzoni bê ape.
Bango ndo ti Nzapa na mbage ti azo so abâ ndo ape ayeke so wa? Bible atene nyen na ndö ti azo so abâ ndo ape? Nga tongana nyen la laso aTémoin ti Jéhovah ayeke mû maboko na azo so abâ ndo ape?
Bango ndo ti Nzapa na mbage ti azo so abâ ndo ape ayeke so wa?
Bible afa so Jéhovahb ayeke pensé mingi na azo so abâ ndo ape. Lo ye ti tene a sara ye na ala na lege ni nga ti tene ala nga kue awara aye ti nzoni na lege ti afango ye ti lo. Lo mû na ala nga mbeni pendere beku ti gigi ti kekereke.
Versê ni: “Deba ayeke na ndö ti zo so asara si mbeni waziba agirisa lege.”—Deutéronome 27:18.
Nda ti versê ni: Na yâ ti ndia so Nzapa amû ândö na azo ti lo, lo hunda ti tene a sara ye na lege ni na mbage ti azo so abâ ndo ape.
Versê ni: “Nzapa ayeke sara kangbi na popo ti azo pëpe.”—Kusala 10:34.
Nda ti versê ni: Nzapa aye azo kue, atâa ala bâ ndo wala pëpe.
Versê ni: Jésus ‘asara si awaziba mingi awara lege ti bâ ndo.’—Luc 7:21.
Nda ti versê ni: Na ngoi so Jésus ayeke lani na ndö ti sese, lo zi lê ti azo so abâ ndo ape. Ye so lo sara so afa ye so Royaume ti Nzapa ayeke sara ande na yâ ti angoi so ayeke ga.
Versê ni: “Lê ti awaziba ayeke zi”.—Ésaïe 35:5.
Nda ti versê ni: Jéhovah amû zendo so, na yâ ti kete ngoi, azo so abâ ndo ape ayeke bâ ande ndo na ngoi so Royaume ti lo ayeke komande na ndö ti sese kue.
Tongana nyen la aTémoin ti Jéhovah ayeke mû maboko na azo so abâ ndo ape?
Na yâ ti dunia kue, e aTémoin ti Jéhovah e yeke fa atënë ti beku so Nzapa amû zendo ni na azo so abâ ndo ape. Tongana nyen la e yeke sara ni?
E sigi na Bible, ambeti ti mandango na Bible, avidéo so ayeke na aformat nde nde ndali ti azo so abâ ndo ape nga na ala so abâ ndo nzoni ape, na popo ni a yeke wara braille, ambeti so a sara ni na kota gere-mbeti nga na a-audio.
Azo kue apeut ti ga na abungbi ti e, même azo so abâ ndo ape.
E yeke manda Bible na azo kue.c
E yeke sara aye ni so kue senge senge. Ngbanga ti nyen? A yeke ndali ti so Jésus atene lani atene: “Ala wara ye senge senge, ala mû ni na azo senge senge.”—Matthieu 10:8.
A-Témoin ti Jéhovah ayeke pensé na azo so abâ ndo ape. Azo so aye ti voro Nzapa legeoko na e ayeke wara aye ti nzoni nga na anzoni kamarade so apeut ti aidé ala. Bâ aye so asi na aTémoin ti Jéhovah so abâ ndo ape.
Talita Alnashi, so ayeke na Suède, abâ ndo nzoni ape depuis na ngoi so a dü lo. Bâ tongana nyen la babâ na mama ti lo amanda Bible na lo nga tongana nyen la akamarade ti ala asara ye na ala na ndoye nga amû maboko na ala.
James Ryan, so ayeke na États-Unis, ayeke lani wabuburu na ngoi so a dü lo nga ambeni ngoi na pekoni lo bâ ndo ape. Bâ ye so asara si lo yeke na ngia na yâ ti fini ti lo.
Cynthia Pablo, so ayeke Philippines, ayeke wabuburu nga lo bâ ndo ape. Tongana nyen la azo so lo na ala avoro Nzapa oko a-aidé lo na ngoi ti COVID-19? Ti hinga ye mingi na ndö ni, diko article “Une assemblée soutient une sœur sourde et aveugle pendant la pandémie.”
Aye wa la e sigi na ni ti manda na Bible na azo so abâ ndo ape?
Ambeti na braille. E sigi na Bible na braille, kue wala mbage ni, na ayanga ti kodro mingi. (Ti hinga ambeni yanga ti kodro ni, bâ encadré “Mbeti ti Nzapa ti fini dunia na braille.”) E sigi nga na gbâ ti ambeti na braille. Ti azo so aye ti manda braille, mbeni buku (Learn to Read Braille) ayeke dä so apeut ti aidé ala ti manda ni. A sigi na buku ni so ti tene mbeni zo so ayeke bâ ndo a-aidé zo so abâ ndo ape ti manda ti diko braille.
Ti wara ambeti so a imprimé ni na braille, hunda mbeni Témoin ti Jéhovah wala hunda ti tene a ga a bâ mo.
Na ndö ti site jw.org, mo peut ti téléchargé afichier ti mungo na note na ndö ti a-appareil ti mo.d
Ambeti so ayeke na kota gere-mbeti nga so a peut ti kono agere-mbeti ni. Mingi ti ambeti ti e so ayeke na kota gere-mbeti ayeke nga dä ndali ti azo so abâ ndo nzoni ape. Fason so a sara na site ti e jw.org amû lege ti tene aye asigi nzoni, même tongana mbeni zo akono agere-mbeti ni. Application JW Library ayeke mû nga lege ti leke konongo ti atënë ti mbeni mbeti.
Ti wara ambeti ti e so ayeke na kota gere-mbeti, hunda mbeni Témoin ti Jéhovah wala hunda ti tene a ga a bâ mo.
Na ndö ti site jw.org, mo peut ti téléchargé ambeti ti e so ayeke na kota-gere mbeti na format électronique so akpa ambeti so a imprimé ni.
Ambeti so a sara audio ni. E sigi na a-audio ti Mbeti ti Nzapa ti fini dunia na ayanga ti kodro ahon 200 tongaso. Na ndö ni, gbâ ti a-audio ti ambeti ti e ayeke nga dä. Mingi ni, a yeke fa nda ti afoto na yâ ti a-audio ni.
Mo peut ti mä wala ti téléchargé a-audio na ndö ti jw.org nga na application JW Library.
Na ndö ti jw.org, mo peut ti téléchargé afichier so mo yeke mä dikongo ni, na tapande ati so mbeti ni ayeke sigi na lê ti écran nga na abuku so ayeke mä dikongo ni.e
Avidéo so a fa peko ti atënë ti yâ ni.f A-Témoin ti Jéhovah asigi na avidéo so a fa peko ti atënë ti yâ ni na ayanga ti kodro ahon 100 tongaso. Avidéo ni so a-aidé azo ti mä yâ ti atënë ti Bible nga ti sara ye alingbi na ni.
Mo peut ti bâ ambeni tapande ti avidéo so a fa peko ti atënë ni na gbe ni ge:
Abungbi nga na akota bungbi. Na yâ ti dunia kue, yenga oko oko, e yeke wara terê na yâ ti acongrégation ti manda ye nga ti voro Nzapa. Ngu oko oko, e yeke sara nga akota bungbi so na ngoi ni e yeke manda ye na ndö ti Bible. Tongana a fa avidéo na ngoi ti akota bungbi ti e, e yeke sara kue ti fa peko ti atënë ti yâ ni na ti azo so aye ti mä ni. Tongana lege ayeke dä, e yeke fa peko ti kapa ti abungbi nga na akota bungbi ti e na azo so ayeke awabuburu na lege ti signe nga ti azo so abâ ndo ape, mbeni zo la ayeke gbu maboko ti ala ti fa peko ti atënë ni na ala. E yeke yamba azo kue so aga na abungbi nga na akota bungbi ti e, sân ti sara kangbi na popo ti ala.
Ti hinga mbeni ndo so a yeke sara bungbi ni dä.
Gi ti hinga ye na ndö ti akota bungbi so e yeke sara ni ngu oko oko.
Gue na Dango bê na kuâ ti Jésus, so a yeke mbeni kpengba bungbi so e yeke sara ni ngu oko oko.
José Luis Ayala ayeke vivre na Mexique. A dü lo lani wabuburu nga na ngoi so lo yeke na ngu 29, lo bâ ndo ape. Bâ tongana nyen la abungbi ti e a-aidé lo ti ga mbeni zo so ahinga ti fa ye nzoni na azo na ndö ti Bible.
a Mbeni zo so ayeke bâ ndo nzoni ape ayeke na kpale ti bango ndo so a peut ti soigné ni ape nga ayeke ngangu na lo ti sara ambeni kua. Na yâ ti article so, tënë “zo so abâ ndo ape” aye ti sara tënë ti zo so abâ ndo oko ape nga na zo so abâ ndo nzoni ape.
b Jéhovah ayeke iri ti Nzapa (Psaume 83:18). Bâ article “Jéhovah ayeke zo wa?”
c Mo peut ti hunda ti tene a manda Bible na mo senge senge.
d Aye ti mungo na anote na braille ayeke mbeni kete appareil portable so akete kete point ayeke dä so zo ni apeut ti changé apoint ni na lege ti curseur ni wala mbeni ordinateur so ayeke mä go ti zo dä. A peut ti wara na ndö ti appareil ni aye ni so use kue. Akete kete point ni so ayeke sigi nga ayeke kiri amû lege ti créé atënë ti braille. Grâce na a-appareil ni so, zo abezoin ape ti wara gbâ ti acopie ti atënë ti braille.
e Afichier so mbeti ni ayeke sigi na lê ti écran nga na abuku so a sara a-audio ni, a yeke diko aye ni na kota go na lege ti mbeni ordinateur so ayeke mä go ti zo dä. Aye ni so ayeke mû lege na azo so asara kua na ni ti wara ambeni mbilimbili mbage ti mbeni mbeti so ala ye.
f Avidéo so a fa peko ti atënë ti yâ ni ayeke avidéo so a yeke fa na yâ ni nda ti aye so ayeke passé na lê ti écran.