Eskê ajeu olympique apeut vraiment ti sara si azo aduti beoko? Bible atene nyen na ndö ni?

Azo milliard oku tongaso ayeke bâ ande ye so a-athlète so alondo na yâ ti akodro 206 ayeke sara na ngoi ti ajeu olympique so a sara ka na ngoi ti ndowa ti ngu 2024. Thomas Bach so ayeke président ti Comité international Olympique, atene: “Ajeu olympique asara si na yâ ti dunia kue e yeke na siriri nga beoko. Zia e duti na oko bibe so sarango ajeu olympique aga na ni so ti tene e kue e duti na siriri nga beoko, atâa so e yeke nde nde.”

Eskê ajeu olympique apeut ti sara si na yâ ti dunia kue azo aduti na siriri nga beoko? Eskê mbeni lâ e peut vraiment ti duti na siriri nga beoko?

Eskê ajeu olympique apeut ti sara si azo aduti na siriri nga beoko?

Ajeu olympique ti ngu so andu gï sport ape. Ajeu ni ayeke ga na kangbi na popo ti azo ndali ti ndo so ala londo dä nga na tënë ti poroso. Ambeni ye ni andu tënë ti droit ti azo, tënë ti mara, kengo zo senge senge ndali ti bungbi ti vorongo Nzapa ti lo nga na sarango ye na zo na lege ni ape.

Legeoko tongana ti ajeu ti sport so azo ayeke sara na yâ ti dunia, ajeu olympique ayeke sara nga si terê ti azo anzere. Me na mbage, a yeke pusu azo ti duti na asarango ye so ayeke ga na kangbi ahon ti tene azo aduti na tâ siriri nga beoko.

Bible asara tënë na ndö ti asarango ye so azo ayeke na ni laso so asara si ayeke ngangu ti tene azo aduti beoko na yâ ti dunia (2 Timothée 3:1-5). Ti hinga ye mingi na ndö ti prophétie ti Bible so, diko article “La Bible a-t-elle prédit la mentalité et la conduite des gens de notre époque?”

Tâ ye so apeut ti sara si azo aduti na siriri nga beoko

Bible afa tâ ye so apeut ti sara si azo aduti na siriri nga beoko. Bible amû zendo so na gbe ti “Royaume ti Nzapa” so ayeke mbeni gouvernement so ayeke na yayu, azo ayeke duti ande na siriri nga beoko.—Luc 4:43; Matthieu 6:10.

Jésus Christ so ayeke Gbia ti Royaume ni ayeke ga ande na siriri na yâ ti dunia kue. Bible atene:

• “Azo ti mbilimbili ayeke maï nga siriri ayeke duti dä mingi.”—Psaume 72:7.

• “Lo yeke zi awayere so atoto ti tene a mû maboko na ala . . . Lo yeke zi ala na yâ ti pasi nga na yâ ti ye ti ngangu so a yeke sara na ala.”—Psaume 72:12, 14.

Même laso afango ye ti Jésus asara si azo million mingi na yâ ti akodro 239 aduti beoko. So e yeke aChrétien, e aTémoin ti Jéhovah na yâ ti dunia kue e manda ti duti na siriri na azo. Ti hinga tongana nyen la e wara lege ti sara tongaso, diko Tour ti Ba Ndo so li ni ayeke “Hon ndö ti bibe ti kengo zo.”