Sarango ye ti ngangu na azo ndali ti tënë ti poroso: Bible atene nyen na ndö ni?

Sarango ye ti ngangu na azo ndali ti tënë ti poroso ague na li ni mingi ahon ti kozo.

Ngbanga ti nyen la a yeke sara ye ti ngangu na azo mingi ndali ti tënë ti poroso? Eskê a yeke hunzi ande mbeni lâ? Bible atene nyen na ndö ni?

Bible afa kozo awe so yâ ti azo ayeke kangbi ndali ti tënë ti poroso

Bible afa kozo awe so, na “lâ ti nda ni,” sarango ye ti mingi ti azo ayeke sara si tiri nga na sarango ye ti ngangu na zo ayeke hon ndö ni.

“Na lâ ti nda ni, angoi ti akpale so ayeke ngangu na zo ti kanga bê na yâ ni ayeke duti dä, ngbanga ti so azo ayeke duti ande . . . azo so ahinga ti kiri singila pëpe, azo so ayeke abe-ta-zo pëpe, . . . azo so aye ti mä terê na amba ti ala pëpe, . . . azo so ayeke asioni zo, . . . azo ti kango amba ti ala, azo so li ti ala akpengba, azo so wuma ti ala ahon ndö ni.”—2 Timothée 3:1-4.

Bible afa nga kozo awe so ayeke ande mbeni ngoi so aye ti wusuwusu ayeke duti dä, aye tongana kengo yanga ti azo ti gouvernement nga na agrève so azo asara ndali ti tënë ti poroso (Luc 21:9, kete tënë na gbe ni). Ye oko, sarango ye ti ngangu na zo ndali ti tënë ti poroso nga na tënë ti kangbi ayeke hunzi ande biani biani.

Sarango ye ti ngangu na zo ndali ti tënë ti poroso ayeke hunzi

Bible afa so Nzapa ayeke zi agouvernement ti azo kue na lo yeke zia gouvernement ti lo na place ni.

“Nzapa ti yayu ayeke sigi na mbeni royaume so . . . ayeke neka [ambeni r]oyaume so kue nga ayeke futi ala biaku biaku, na gï royaume so oko la ayeke ngbâ lakue lakue.”—Daniel 2:44.

Royaume ti Nzapa ayeke sara ande si azo na yâ ti dunia kue aduti beoko nga na siriri.

Jésus Christ, Gbia ti Royaume ni, so a iri lo “Mokonzi ti siriri,” ayeke sara ande si “siriri ayeke hunzi ande pëpe.”—Ésaïe 9:6, 7.
Même laso, azo ti gbe ti Royaume ni ayeke manda ti duti na siriri. Bible atene kozo awe so: “Ala yeke pika a-épée ti ala si aga alê ti kpoka ti charrue nga ala yeke pika alikongo ti ala si aga azembe ti fango na amaboko ti keke. Mara ayeke mû épée na terê ti mbeni mara pëpe, nga ala yeke manda sarango bira encore ape.”—Ésaïe 2:3, 4.

Ti hinga aye mingi na ndö ni, diko article “Nyen la Royaume ti Nzapa ayeke ga ande ti sara?” nga bâ vidéo Royaume ti Nzapa ayeke nyen?