Mo dabe ti mo na ni?
Mo diko a-article ti Tour ti Ba Ndo so asigi ade ti ninga ape so nzoni? Bâ wala mo peut ti kiri tënë na ahundango ndo so ge:
Nyen la ayeke pusu e ti mû gloire na Jéhovah?
E yeke mû gloire na Jéhovah ndali ti so e ne lo nga e ye lo mingi. E yeke mû nga gloire na Jéhovah ndali ti so e ye ti tene azo ahinga lo.—w25.01, l. 3.
Tongana mbeni zo ason bê ti e, tongana nyen la e peut ti duti nduru ti pardonné lo?
Tongana bê ti e ason, e doit ti sara sanka ni ape; tongana e bata tënë ni na bê ti e ape, bê ti e ayeke ngbâ ti son ape.—w25.02, l. 15-16.
Ngbanga ti nyen la disciple Marc ayeke nzoni tapande ndali ti aita-koli so ade maseka?
Marc ayeda na bê ti lo ti sara mbeni kua so a mû na lo. Atâa so peut-être vundu asara lo nga bê ti lo ason ndali ti mbeni ye so asi, lo zia kua ni ape. Lo leke songo ti lo na Paul nga na ambeni ita so akpengba.—w25.04, l. 27.
So Jésus asambela, atene: “Mbi sara si ala hinga iri ti mo”, lo ye ti tene nyen la? (Jean 17:26).
Adisciple ti lo ahinga iri ti Nzapa awe. Me Jésus a-aidé lani ala ti hinga Jéhovah nzoni, na tapande, lo fa na ala ye so lo leke na bê ti lo ti sara ndali ti sese nga na azo, aye so lo sara nga na asarango ye ti lo.—w25.05, l. 20-21.
Tongana e bâ terê ti e kete, nyen la e yeke yeda na ni?
E yeke yeda so ambeni ye ayeke dä so e hinga ape. Na tapande, e hinga lawa la nda ni ayeke ga ape wala tongana nyen la Jéhovah ayeke sara ye na ngoi ni so. E hinga nga ape nyen la ayeke si kekereke wala e comprendre kue ape tongana nyen la Jéhovah ahinga e nzoni.—w25.06, l. 15-18.
Nyen la apeut ti aidé e ti bâ nzoni na lege ti mbeni article wala mbeni diskur so a mû ndali ti azo kue?
E peut ti hunda terê ti e, e tene: ‘Aye wa la a sara kua na ni ti sara si azo ayeda na tâ tënë ti Bible so? Eskê mbeni nzoni tapande ayeke dä so mbi peut ti sara kua na ni na ngoi so mbi yeke fa tâ tënë na mbeni zo? Zo wa la tënë so apeut ti gbu bê ti lo?’—w25.07, l. 19.
Nyen la e peut ti manda na lege ti fason so Jéhovah apardonné na David?
Atâa so David asara akota siokpari, na ngoi so lo changé bê ti lo Jéhovah apardonné lo (1 aGbia 9:4, 5). Tongana Nzapa apardonné zo, lo yeke kiri na ndö ti faute so zo ni asara ape.—w25.08, l. 17.
Tongana a yeke ngangu na mbeni zo so mo yeke manda Bible na lo ti comprendre mbeni tënë, nyen la mo peut ti sara?
Tongana a yeke ngangu na mbeni zo so mo yeke manda Bible na lo ti comprendre mbeni ye so Bible afa, ngbâ ti sara tënë na ndö ni ape. Mo peut ti kiri na ndö ni mbeni lâ.—w25.09, l. 24.
Bible atene so siokpari ayeke na ‘ngangu ti handa zo.’ (aHéb. 3:13). A ye ti tene nyen?
Siokpari apeut ti pusu e ti sara asioni ye. A peut nga ti pusu e ti duti lakue na kite na ndö ti ambeni ye, na tapande e peut ti duti na kite so Jéhovah aye e.—w25.10, l. 16.
Aye ota wa la apeut ti aidé e ti sambela nzoni ahon ti kozo?
(1) E peut ti gbu li na ndö ti apendere sarango ye ti Jéhovah. (2) E peut ti gbu li na ndö ti akpale so e yeke na yâ ni nga ti fa ni na Jéhovah, na tapande tongana e bâ so e doit ti pardonné mbeni zo. (3) E peut ti sambela aninga. A peut ti mû lege na e ti fa na Jéhovah atënë ti gbe ti bê ti e.—w25.10, l. 19-20.
Tongana nyen la e peut ti aidé ambakoro?
E peut ti gue ti bâ ala wala ti iri ala na téléphone. E peut nga ti gue na ala ti bâ docteur. Wala e peut ti fa tënë legeoko na ala na alege nde nde.—w25.11, l. 6-7.
Akota ye wa la mo peut ti sara ti mû gonda na Jéhovah na lango ti mariage ti mo?
Sara ye alingbi na andia ti kodro. Sara kue ti tene aye so a sara na lango ti mariage ti mo ague oko na lengo ti yingo ti Nzapa. Sara si bongo ti mariage ti mo agboto lê na ndö ti mo ahon ndö ni ape nga sara hange na angobo so ague nde na Bible. Sara lisoro polele na ngoi so mo yeke leke aye ndali ti mariage ti mo.—w25.12, l. 21-24.