Atënë so azo ahunda
Fafadeso, nyen la Jéhovah ayeke zia na yâ ti bê ti amara ti sara?
Na ndö ti tongo nda ti kota ye ti vundu, Apocalypse 17:16, 17 atene: “Adidi bale-oko so mo bâ, nga na nyama ti ngonda ni, ala yeke ke ande wali-ndumba so, na ala yeke sara si lo ngbâ na ye oko pëpe na ala zia lo terê senge, na ala yeke te ande nyama ti terê ti lo si ala yeke gbi lo kue na wâ. Biani, Nzapa azia na yâ ti bê ti ala ti sara ye so ayeke na bê ti lo, so ti tene ti sara ye so ayeke na bê ti ala na mungo royaume ti ala na nyama ti ngonda ni.” Ândö na yâ ti ambeti ti e, e tene so Nzapa ayeke zia na yâ ti bê ti amara ti futi abungbi ti vorongo nzapa ti wataka.
Me e bâ so e bezoin ti changé tënë ni so. Ye so Jéhovah ayeke zia na yâ ti bê ti amara ayeke ti tene ala mû “royaume ti ala na nyama ti ngonda ni.” Ti tene e hinga tongana nyen la tënë so ayeke ga tâ tënë, zia e kiri tënë na ahunda so.
Azo wa la prophétie so asara tënë ti ala? A sara tënë ti mbeni “wali-ndumba” so a iri lo nga “Babylone, Ngangu gbata”; lo ye ti sara tënë ti abungbi ti vorongo nzapa ti wataka kue. “Bengba nyama ti ngonda” ni aye ti sara tënë ti Bendo ti gigi. A zia ni na sese na ngu 1919 ti ga na siriri na yâ ti dunia na a iri ni lani Bungbi ti amara (Apoc. 17:3-5). “Adidi bale-oko” aye ti sara tënë ti agouvernement kue so amû maboko na nyama ti ngonda ni.
Songo wa la ayeke na popo ti wali-ndumba ni na bengba nyama ti ngonda ni? Wali-ndumba ni “aduti na ndö ti” nyama ti ngonda ni, lo mû maboko na lo nga lo gi ti sara si lo sara ye so bê ti lo aye.
Nyen la ayeke si ande na wali-ndumba ni? Nyama ti ngonda ni nga na adidi bale-oko “ayeke ke ande wali-ndumba ni” mingi asara si ala zi aye kue so lo yeke na ni nga ala yeke fa na azo kue so lo yeke sioni mingi. Na pekoni, ala yeke futi lo, tongana ti so Jéhovah atene lani ayeke si na lo (Apoc. 17:1; 18:8). So ayeke duti ande hunzingo ti abungbi ti vorongo nzapa ti wataka. Me kozo ti tene ye so asi, Jéhovah ayeke sara si amara asara mbeni ye so ade asi lâ oko ape na yâ ti mbaï ti komandema ti azo.
Nyen la Jéhovah ayeke pusu ande amara ti sara? Lo yeke zia na yâ ti bê ti adidi bale-oko ti sara ye so ayeke na bê ti lo, so ayeke ti ‘mû royaume ti ala na [bengba] nyama ti ngonda ni’, so ti tene Bendo ti gigi (Apoc. 17:13). Gbu li na ndö ti ye so tënë so aye ti tene. Eskê a ye ti tene so agouvernement ayeke mû desizion na bê ti ala wani ti mû ngangu nga na komandema ti ala na nyama ti ngonda ni? Ên-ën. Prophétie ni afa so Nzapa wani la ayeke pusu ala ti sara ni (aProv. 21:1; bâ Ésaïe 44:28). Eskê changement so ayeke si yeke yeke? Ên-ën. Na bango ni, a yeke si gï gbagburu tongaso. Na pekoni, nyama ti ngonda ni ayeke futi biani biani abungbi ti vorongo nzapa ti wataka kue.
Tongaso, nyen la e peut ti ku ti tene asi? E yeke ku ape ti bâ na yâ ti asango atënë so a tene so yeke yeke agouvernement ayeke mû maboko mingi na Bendo ti gigi. Ye so e peut ti ku ni ayeke so: Gï gbagburu tongaso, Jéhovah ayeke zia na yâ ti bê ti amara ti mû ngangu ti ala na nyama ti ngonda ni. Tongana a si ande, e yeke hinga so kota ye ti vundu aga nduru ti komanse awe. Ti ku na ngoi ni so, “zia lê ti e angbâ na zingo ni na e zia li ti e kpô” ndali ti so achangement so ayeke si gï gbagburu tongaso aga nduru ti si awe.—1 aThes. 5:6