Eskê a yeke nzoni mbi zia ti kpe na oto wala moto?

Eskê a yeke ye so asi na mo la? Tongana a yeke tongaso, nyen la apeut ti mû lege na mo ti hinga wala a yeke nzoni mo ngbâ ti kpe na oto?

Na yâ ti ambeni kodro, azo ti kpengo na oto so awara mbeni ngu awe, docteur adoit ti mû yanga na ala si ala ngbâ ti kpe na oto. A-Chrétien so ayeke na yâ ti akodro so adoit ti sara ye alingbi na andia nga na adesizion ti akota zo ti kodro ni (aRom. 13:1). Me atâa ndo wa la mo yeke dä, ambeni ye ayeke dä so apeut ti aidé mo ti hinga wala mo yeke ngbâ ti kpe na oto.

GI TI BÂ KPENGO NA OTO TI MO NZONI

Mbeni bungbi so ayeke bâ lege ti ambakoro awa ala ti hunda terê ti ala na ahunda so:

• Eskê a yeke ngangu na mbi ti diko aye so ayeke na lê ti apanneau wala ti bâ ndo na bï?

• Eskê a yeke ngangu na mbi ti tourné ti bâ ndo na yâ ti rétroviseur nga ti bâ ndo na peko?

• Eskê mbi peut lakue ti sara ye hio, na tapande ti zi gere hio na ndö ti accélérateur ti dö frein?

• Eskê mbi kpe na oto yeke yeke mingi na a kanga lege na amba ti mbi ti kpe nzoni?

• Eskê ade a ninga ape a ngbâ kete mbi sara accident, wala eskê terê ti oto ti mbi abuba ndali ti so mbi pika ambeni ye?

• Eskê azo ti lapolice ahunda na mbi ti luti ndali ti fason ti kpengo na oto ti mbi?

• Eskê lango ayeke sara mbi na ngoi so mbi yeke kpe na oto?

• Eskê mbi yeke nyon ayorö so apeut ti sara si mbi kpe na oto nzoni ape?

• Eskê azo ti sewa ti mbi wala akamarade ti mbi atene na mbi so fason so mbi yeke kpe na oto asara si ala gi bê ti ala?

Tongana mo kiri tënë en na mbeni hunda so oko wala use, peut-être a yeke ngoi ti tene mo sara ambeni changement la. Na tapande, mo peut ti mû desizion ti kpe na oto mingi ape, mbilimbili na bï. Lakue gi ti bâ fason ti kpengo na oto ti mo. Mo peut ti hunda na mbeni zo ti sewa ti mo wala mbeni kamarade ti mo bango ndo ti lo na ndö ti kpengo na oto ti mo. Mo peut nga ti hunda na mbeni zo ti aidé mo ti kpe na oto nzoni ahon ti kozo. Me, tongana mo kiri tënë en na mingi ti ahunda so, peut-être a yeke ngoi ti tene mo zia ti kpe na oto.a

ZIA SI AMAMA-NDIA TI BIBLE AFA LEGE NA MO

A peut ti duti ngangu na e ti yeda so e yeke kpe na oto nzoni encore ape. Nga a peut ti duti ngangu na e ti sara lisoro na ndö ti tënë so. Tongaso, amama-ndia wa ti Bible la apeut ti aidé mo ti changé bango ndo ti mo na ndö ti dutingo ti mo nga ti mû nzoni desizion? Zia e bâ ambeni use.

Ngbâ ti sara terê ti mo kete (aProv. 11:2). Na ngoi so ngu ti e ayeke gue na li ni, e yeke bâ ndo nga e yeke mä ndo nzoni encore ape, e yeke na ngangu nga e yeke sara ye hio tongana ti kozo ape. Na tapande, mingi ti azo azia ti sara ambeni sport ndali ti so, so ngu ti ala ayeke gue na li ni a yeke ngangu ape ti tene ala wara kpale. Kpengo na oto ayeke nga tongaso. A si na mbeni ngoi, mbeni zo apeut ti mû desizion ti zia ti kpe na oto ti tene kpale asi na lo ape (aProv. 22:3). Tongana azo ayeke gi bê ti ala, zo so asara terê ti lo kete ayeke mä ala.—Bâ 2 Samuel 21:​15-17.

Kpe ti tene ngbanga ti mênë aduti na li ti mo (Deut. 22:8). Tongana mbeni zo akpe na oto nzoni ape, lo peut ti ga na kpale na azo wala ti fâ ala. Zo so angbâ ti kpe na oto atâa so lo yeke kpe na ni nzoni encore ape apeut ti zia fini ti lo wala ti mbeni zo na lê ti kuâ. Ngbanga ti mênë ti zo apeut même ti duti na li ti lo.

Pensé ape so tongana mo zia ti kpe na oto, azo ayeke ne mo encore ape. Jéhovah aye mo ndali ti apendere sarango ye so mo yeke na ni, na tapande sarango terê ti mo kete nga na bingo bê na ndö ti nzoni ti amba ti mo. Nga lo mû zendo ti ngbâ ti aidé mo nga ti dë bê ti mo (És. 46:4). Lo yeke dö mo ti zia lâ oko ape. Tongaso, hunda na lo ti aidé mo ti sara ye na ndara nga ti bâ yâ ti aye nzoni na ngoi so mo yeke bâ wala a yeke nzoni mo zia ti kpe na oto.