Aidé ‘azo so ayeke nduru ti yeda na tënë ni’

1. Azo apeut ti sara ye tongana nyen na ngoi so ala mä nzoni tënë? (Kusala 13:​47, 48; 16:​14, 15).

NA NGOI ti akozo Chrétien, ambeni zo ayeda na tâ tënë gï na ngoi so ala mä ni ti kozoni. (Diko Kusala 13:​47, 48; 16:​14, 15.) Laso nga, terê ti ambeni zo anzere mingi na ngoi so ala mä nzoni tënë ti kozoni. Même azo so tënë ti Royaume so e yeke fa agbu bê ti ala kozo ape apeut ti yeda na ni na mbeni ngoi na pekoni. Nyen la a yeke nzoni e sara tongana e wara ‘azo so ayeke nduru ti yeda na tënë ni’?

2. Ngbanga ti nyen la e peut ti haka kua ti e ti sarango adisciple na kua ti zo ti fango yaka?

² Gbu li na ndö ti tapande so. E peut ti haka kua ti e ti sarango adisciple na kua ti zo ti fango yaka. Tongana mbeni lê ti kobe abe awe, peut-être lo yeke ko ni même tongana lo ngbâ ti tourné mbeni sese ti yaka ni wala lo ngbâ ti lu alê ti kobe na mbeni mbage ti yaka ni. Legeoko nga, na ngoi so e wara mbeni zo so aye ti mä tënë ni, e yeke aidé lo ti tene hio lo ga mbeni disciple ti Christ. Me ti ambeni zo, ala bezoin ngoi mingi ti bâ na nene ni ye so ala yeke manda (Jean 4:​35, 36). Bango yâ ti aye nzoni ayeke aidé e ti hinga kode wa la e peut ti sara kua na ni ti aidé azo nzoni. Zia e bâ fadeso ye so e peut ti sara na ngoi ti kozo lisoro so e sara na azo ti aidé azo so ayeke nduru ti yeda na tënë ni. E yeke bâ nga tongana nyen la e peut ti aidé azo so ti ngbâ ti gue na li ni.

AIDÉ AZO SO AYEKE NDURU TI YEDA NA TËNË NI

3. Nyen la a yeke nzoni e sara tongana e wara azo so tënë so e fa agbu bê ti ala? (1 aCorinthien 9:26).

³ Tongana e wara azo so tënë so e fa agbu bê ti ala, e ye ti aidé ala hio ti komanse ti tambela na ndö ti lege so ague na fini. Tongana a yeke tongaso, gï na ngoi ti kozo lisoro ni a yeke nzoni e hunda na ala ti sara étude nga e tisa ala ti ga na bungbi.—Diko 1 aCorinthien 9:26.

4. Fa tapande ti mbeni zo so ayeda hio ti manda Bible.

⁴ Hunda zo ni ti manda Bible. Ambeni zo so e sara lisoro na ala ayeke nduru ti manda Bible. Na tapande na mbeni jeudi, mbeni maseka-wali na Canada aga na terê ti mbeni présentoir na lo mû brochure Ngbâ na fini lakue lakue! Ita-wali so ayeke na terê ti présentoir ni atene na lo so tongana lo ye, a peut ti manda Bible na lo senge senge. A nzere na maseka-wali ni na lo mû numéro ti téléphone ti lo na ita-wali ni. Na pekoni na yâ ti lango ni so, maseka-wali ni atokua message na ita-wali ni. Ita-wali ni atene na lo so lo yeke ga ti bâ lo na nda-yenga, me maseka-wali ni ahunda lo, atene: “Mo peut ti ga kekereke ape? Mbi yeke na yanga-da.” Ala sara étude ni na vendredi. Maseka-wali ni ague na bungbi ti kozoni na nda-yenga ni na lo gue na li ni hio.

5. Nyen la apeut ti aidé e ti hinga kode wa la a yeke nzoni e sara kua na ni na ngoi so e ye ti komanse mbeni étude? (Bâ nga afoto.)

⁵ Me ti vrai ni, e ku pëpe ti tene azo kue so amä e ayeda na tënë ni hio tongana ti maseka-wali so. Peut-être ti ambeni zo, ala bezoin ngoi mingi. Peut-être e bezoin kozoni ti sara lisoro na ndö ti mbeni tënë so agbu bê ti ala. Me tongana e ngbâ ti duti na nzoni bango ndo nga e fa so e pensé na azo, na yâ ti kete ngoi, e peut ti komanse mbeni étude. Tënë wa la e peut ti tene na ngoi so e yeke hunda ti manda Bible na mbeni zo? Zia e bâ aye so ambeni ita so ayeke komanse a-étude hio atene.

6. Tënë wa la e peut ti tene ti aidé mbeni zo ti bâ so a yeke nzoni lo manda Bible?

⁶ Ambeni wafango tënë na apionnier so a sara lisoro na ala na ndö ti tongo nda ti a-étude afa so, na ambeni ndo, a yeke nzoni ti sara kua pëpe na atënë tongana “étude,” “mandango Bible” wala “fa ye na mo” na ngoi so mo yeke fa tongana nyen la a yeke sara étude ni. Ala tene so a yeke nzoni ti sara kua na atënë tongana “lisoro” nga “gi ti hinga ye so Bible atene.” Ti aidé zo ni ti yeda ti tene mo kiri mo sara lisoro na lo, mo peut ti tene mara ti tënë so: “Li ti ambeni zo akpe ti hinga so Bible ayeke kiri tënë na akota hunda so azo ayeke na ni” wala: “Bible ayeke pëpe mbeni mbeti so andu gï tënë ti vorongo Nzapa; wango ti yâ ni apeut ti aidé e mingi.” Mo peut nga ti tene: “Na yâ ti penze-ngbonga 10 wala 15, mo peut ti manda mbeni ye so apeut ti aidé mo mingi.” Mo bezoin même ape ti sara kua na atënë tongana “rendez-vous” wala “yenga oko oko,” so apeut ti sara si zo abâ so lo doit ti wara terê na mo lakue lakue.

7. Na ngoi wa la ambeni zo ahinga ti kozoni so ala wara tâ tënë? (1 aCorinthien 14:​23-25).

⁷ Tisa ala ti ga na bungbi. Na bango ni, na ngoi ti bazengele Paul, ambeni zo ahinga ti kozoni so ala wara tâ tënë na ngoi so ala ga na bungbi. (Diko 1 aCorinthien 14:​23-25.) Fani mingi, oko ye ni ayeke si laso. Mingi ti afini zo ayeke gue na li ni hio na ngoi so ala komanse ti ga na abungbi. Na ngoi wa la a yeke nzoni mo tisa ala? Na yâ ti buku Ngbâ na fini lakue lakue!, a yeke tisa zo ti ga na bungbi na ye ti manda 10, me mo bezoin pëpe ti ku juska mo si na ye ti manda ni so awe si mo tisa mbeni zo ti ga na bungbi. Gï na ngoi ti kozo lisoro, mo peut ti tisa zo ti ga na bungbi ti nda-yenga ni, mo peut ti fa na lo mama-tene ti diskur ni wala mbeni ye so e yeke bâ na ngoi ti mandango Tour ti Ba Ndo.

8. Atënë wa la e peut ti tene na mbeni zo na ngoi so e yeke tisa lo ti ga na bungbi? (Ésaïe 54:13).

⁸ Na ngoi so mo yeke tisa mbeni zo so aye tâ tënë ti ga na bungbi, fa na lo na alege wa la abungbi ti e ayeke nde na ti eglize ti lo. Mbeni zo ti mandango Bible so ague na bungbi ti mandango Tour ti Ba Ndo ti kozoni ahunda ita-wali so ayeke manda Bible na lo, lo tene: “Eskê zo so amû li ni ahinga iri ti azo kue?” Ita-wali ni atene na lo so e kue e yeke gi ti hinga iri ti azo so ayeke na yâ ti congrégation ti e tongana ti so e hinga iri ti azo ti sewa ti e. Zo ni atene so, na eglize ti lo, mingi ti azo ni ahinga iri ti mba ape. E peut ti fa na mbeni zo mbeni lege nde so na yâ ni bungbi ti e ayeke nde. (Diko Ésaïe 54:13.) E bungbi ti voro Jéhovah, ti hinga ye na ndö ti lo nga ti kpengba mba (aHéb. 2:12; 10:​24, 25). Ndani la a leke abungbi ti e ti aidé e ti manda ye, nga na ngoi ni, e yeke mû peko ti angobo ti vorongo nzapa ape (1 aCor. 14:40). Wâ ayeke za nzoni na yâ ti Da ti Royaume ndali ti so e ga na bungbi ti manda ye. So e duti ti e nde, e yeke sara lisoro na ndö ti tënë ti poroso ape, e yeke dekongo ape nga e yeke papa ape. Kozo si zo ni aga na bungbi, peut-être a yeke nzoni ti fa na lo vidéo E yeke sara abungbi ti e tongana nyen? Tongaso si, lo hinga tongana nyen la aye ayeke tambela na ngoi ti bungbi.

9-10. Na ngoi so e yeke tisa mbeni zo ti ga na bungbi, e peut ti tene na lo nyen si mbeto asara lo ape ti ga? (Bâ nga foto.)

⁹ Mbeto asara ambeni zo ti ga na bungbi ndali ti so ala pensé so a yeke hunda ande na ala ti changé eglize ti ala. Sara si zo ni ahinga so a nzere na e ti yamba afini zo nga so lo peut ti ga gï ti mä tënë sân ti zi yanga. A nzere na e ti yamba asewa, même akete molenge so ayeke na yâ ti sewa ni. Na ngoi ti abungbi ti e, a yeke fa ye na amolenge nde ape. Me ababâ na amama na amolenge ti ala ayeke duti place oko ti manda ye. Tongaso si ababâ na amama ahinga ndo so amolenge ti ala ayeke dä nga ye so a yeke fa na ala (Deut. 31:12). E yeke ro nginza ape nga a yeke hunda na azo ti mû enveloppe ape ndali ti so e yeke sara ye alingbi na commandement ti Jésus, so lo tene: “Ala wara ye senge senge, ala mû ni na azo senge senge.” (Mat. 10:8). Mo peut nga ti tene na zo ni so ti ga na bungbi, lo bezoin ape ti yü bongo ti nginza. Nzapa ayeke bâ bê ti zo me pëpe ye so lê ti zo abâ.—1 Sam. 16:7.

¹⁰ Tongana zo ni aga, sara kue ti sara si lo bâ so lo duti nzoni. Fa lo na a-ancien nga na ambeni ita. Tongana lo bâ so lo duti nzoni, peut-être a yeke nzere na lo ti kiri ti ga. Tongana lo yeke na Bible ape, fa na lo aversê na yâ ti Bible ti mo nga aidé lo ti comprendre fason so e yeke manda na ye.

TONGANA MO KOMANSE MBENI ÉTUDE

11. Tongana nyen la mo peut ti fa so mo yeke sara ye alingbi na kapa ti zo ni?

¹¹ Aye wa la a yeke nzoni e girisa ape na ngoi so e yeke manda Bible na mbeni zo? Sara ye alingbi na kapa ti zo ni. Na tapande, tongana mo tene mo yeke si na mbeni l’heure, si na l’heure ni so, même tongana azo ti ndo so mo yeke dä ayeke sara ye na l’heure ape. Peut-être a yeke nga nzoni ti mû ngoi mingi ape ti sara kozo étude ni. Ambeni ita atene so a yeke nzoni ti gboto yâ ti étude ni ape, même tongana zo ni aye ti hinga ambeni ye encore. Nga, diko tënë mingi ape. Zia zo ni afa atënë ti bê ti lo.—aProv. 10:19.

12. Nyen la a yeke nzoni e gi ti sara na ngoi ti kozo étude ni?

¹² Na ngoi ti kozo étude so mo sara na mbeni zo, a yeke nzoni mo gi ti aidé lo ti hinga Jéhovah na Jésus nga ti ye ala. Mo yeke sara ni tongana mo gboto lê ti lo na ndö ti ye so Bible atene ahon ti gboto lê na ndö ti ye so mo hinga (Kus. 10:​25, 26). Bazengele Paul azia na e nzoni tapande. Na ngoi so lo yeke fa ye na azo, lo sara tënë mingi na ndö ti Jésus Christ, lo so Jéhovah atokua lo ti aidé e ti hinga lo nga ti ye Lo (1 aCor. 2:​1, 2). Paul afa nga polele so a yeke kota ye mingi ti aidé afini disciple ti gi ti duti na anzoni sarango ye so a haka ni na lor, argent nga na atênë ti ngangu ngere (1 aCor. 3:​11-15). Na popo ti anzoni sarango ye so, a yeke wara mabe, ndara, bango yâ ti aye nzoni nga na kpengo mbeto ti Jéhovah (Ps. 19:​9, 10; aProv. 3:​13-15; 1 Pi. 1:7). Fa ye tongana Paul na lege so mo aidé azo so mo yeke manda Bible na ala ti gi ti duti na kpengba mabe nga na nzoni songo na Babâ ti ala ti yayu so aye ala mingi.—2 aCor. 1:24.

13. Tongana nyen la e peut ti kanga bê na azo so asara nzara ti tënë ni nga e fa so e comprendre ala na ngoi so e yeke aidé ala? (2 aCorinthien 10:​4, 5). (Bâ nga foto.)

¹³ Fa ye tongana Jésus na lege so mo kanga bê nga mo fa so mo comprendre zo. Kpe ti hunda atënë so ayeke sara si zo ni aduti nzoni ape. Tongana ala yeke manda mbeni ye so a yeke ngangu na lo ti comprendre ni, ngbâ ti sara tënë na ndö ni ape. Mo peut ti kiri na ndö ni mbeni lâ. Gi pëpe ti forcé lo ti yeda na mbeni fango ye kozo si lo yeke nduru ti yeda na ni, mû na lo ngoi ti tene tâ tënë amaï na yâ ti bê ti lo (Jean 16:12; aCol. 2:​6, 7). Bible ahaka afango ye ti wataka na mbeni ngangu gbagba so e gi ti huru na ndö ni. (Diko 2 aCorinthien 10:​4, 5.) Ahon ti sara si ngangu gbagba ni atuku na ndö ti zo ni, aidé lo ti sara si Jéhovah aga Ndo ti batango terê ti lo dä.—Ps. 91:9.

TONGANA AFINI ZO AGA NA BUNGBI

14. A yeke nzoni e sara ye tongana nyen na afini zo so aga na bungbi?

¹⁴ Jéhovah ahunda ti tene e sara ye na nzoni bê na afini zo so aga na bungbi, atâa ngobo ti ala, dutingo ti ala wala mara ti ala (Jacq. 2:​1-4, 9). Tongaso, tongana nyen la e peut ti fa na afini zo so ayeke ga na bungbi so e ye ala?

15-16. Nyen la e peut ti sara ti aidé afini zo ti bâ so ala duti nzoni na ngoi so ala ga na bungbi?

¹⁵ Ambeni zo apeut ti ga na bungbi gï ti bâ tongana nyen la aye ayeke tambela wala ndali ti so mbeni zo so ayeke na mbeni ndo nde atisa ala ti gue. Tongaso, tongana mo bâ mbeni fini zo na bungbi, gue na terê ti lo. Yamba lo, me sara ye ahon ndö ni ape. Tisa lo ti duti na terê ti mo. Aidé lo ti suivre bungbi na lege so mo na lo abâ aversê na yâ ti Bible ti mo nga ala bâ ambeti ti mo, wala mû na lo mbeni Bible nga na ambeti ni. Nga, gbu li na ndö ti ambeni ye so mo peut ti sara ti tene lo duti nzoni. Mbeni koli so ague lani na mbeni Da ti Royaume atene na ita-koli so atisa lo so lo gi bê ti lo ndali ti so lo bâ so lo yü bongo nzoni ape tongana tanga ti azo. Ita-koli ni adë bê ti lo nga lo tene na lo so aTémoin ti Jéhovah ayeke tongana tanga ti azo kue. Ambeni ngoi na pekoni, koli ni awara batême, na lo girisa lâ oko ape atënë so ita-koli ni atene. Me hange: Na ngoi so mo yeke sara lisoro na mbeni fini zo kozo na bungbi wala na pekoni, fa na lo so mo pensé na lo sân ti yôro terê ti mo na yâ ti aye so abâ gï lo wani.—1 Pi. 4:15.

¹⁶ E peut nga ti sara si afini zo abâ so ala duti nzoni na lege so e ne ala. Na tapande, na ngoi so e yeke sara lisoro na ala, e yeke sara acommentaire nga na adevoir, e yeke sara hange na atënë so e yeke tene na ndö ti azo so ayeke aTémoin ape wala aye so ala mä na bê na ni. Tene pëpe atënë so apeut ti son bê ti ala wala so apeut ti sara si ala ye ti ga na bungbi encore ape (Tite 2:8; 3:2). Na tapande, e yeke tene pëpe sioni tënë na ndö ti aye so ala mä na bê na ni (2 aCor. 6:3). Aita-koli so ayeke mû adiskur adoit ti sara hange mingi na atënë so ala yeke tene. Ala yeke fa nga so ala pensé na azo so ayeke aTémoin ape na lege so ala yeke fa nda ti atënë so azo kue apeut ti mä yâ ni ape.

17. Tongana, na fango tënë, e wara ‘azo so ayeke nduru ti yeda na tënë ni’, nyen la e yeke gi ti sara?

¹⁷ E doit ti sara kua ti sarango adisciple hio mingi, na e ngbâ lakue ti wara azo so ayeke “nduru ti yeda na tënë ni ti wara fini ti lakue lakue”. (Kus. 13:48). Tongana e wara mara ti azo tongaso, a yeke nzoni e tisa ala hio ti manda Bible wala ti ga na bungbi. Tongana e sara ni, e peut ti aidé ala ti komanse ti tambela na ndö ti “lege so ague na fini”.—Mat. 7:14.