“Iri a-ancien”

1. Tongana nyen la Jéhovah afa so awakua ti lo ayeke ye ti ngangu ngere na lê ti lo?

AWAKUA ti Jéhovah ayeke ye ti ngangu ngere na lê ti lo. Lo vo ala na mênë ti Jésus na lo zia a-ancien ti bâ lege ti ala (Kus. 20:28). Nzapa aye ti tene a sara ye na awakua ti lo na nzoni bê. Na gbe ti fango lege ti Christ, a-ancien ayeke dë bê ti awakua ti Jéhovah nga ala yeke aidé ala ti ngbâ nduru na lo.—És. 32:​1, 2.

2. Ti gue oko na Ézéchiel 34:​15, 16, azo wa la Jéhovah aye mingi ti aidé ala?

² Jéhovah apensé mingi na awakua ti lo kue, me lo ye mingi ti aidé ala so ayeke bâ pasi. Peut-être ambeni ayeke bâ pasi ndali ti so ala sara afaute, na Jéhovah ayeke sara kua na a-ancien ti aidé ala. (Diko Ézéchiel 34:​15, 16.) Me Jéhovah aye si e hunda ti tene a aidé e na ngoi so e bezoin ni. Na angoi tongaso, e yeke toto na Jéhovah ti aidé e, me e yeke hunda nga na “aberger na awafango ye” ti congrégation ti aidé e.—aÉph. 4:​11, 12.

3. Anzoni ye wa la e kue e peut ti wara tongana e gbu li na ndö ti kua ti a-ancien?

³ Na yâ ti article so, e yeke manda aye mingi na ndö ti lege so Jéhovah ayeke sara kua na a-ancien ti aidé azo so ayeke na kpengba songo na lo encore ape. E yeke kiri tënë na ahunda so: Na ngoi wa la a yeke nzoni e hunda na a-ancien ti aidé e? Ngbanga ti nyen la a yeke nzoni e sara ni? Ala yeke aidé e tongana nyen? Même tongana na ndembe so, e yeke na kpengba songo na Jéhovah, akiringo tënë na ahunda so ayeke sara si e kiri singila mingi na Nzapa ndali ti kua ti a-ancien nga mbeni lâ aide ti ala apeut ti sö fini ti e.

NA NGOI WA LA A YEKE NZONI E “IRI A-ANCIEN”?

4. E hinga tongana nyen so Jacques 5:​14-16, 19, 20 aye ti sara tënë ti kobela na lege ti yingo? (Bâ nga afoto.)

⁴ Disciple Jacques afa tongana nyen la Jéhovah ayeke aidé e na lege ti a-ancien. Lo tene: “Mbeni zo na popo ti ala ayeke na kobela? Zia lo iri a-ancien ti congrégation.” (Diko Jacques 5:​14-16, 19, 20.) Jacques ayeke sara tënë ti mbeni zo so ayeke na kobela na lege ti yingo. Na tapande, lo tene na zo ti kobela ni ti iri mbeni docteur ape me ti iri a-ancien. So Jacques atene zo ni apeut ti wara sava tongana a pardonné asiokpari ti lo, a fa so a yeke kobela na lege ti yingo. Na yâ ti ambeni ye, aye so a yeke sara ti sava kobela na lege ti yingo ague oko na aye so a yeke sara ti sava mbeni kobela. Tongana terê ti e ason, e yeke gue ti bâ mbeni docteur, e yeke fa na lo aye so ason e nga e yeke sara aye so lo hunda. Legeoko nga, tongana e yeke na kobela na lege ti yingo, a yeke nzoni e gue e bâ a-ancien, e yeke fa na ala kpale ti e ni nga e yeke sara ye alingbi na wango so ala mû na e.

5. Nyen la ayeke fa na e so songo ti e na Jéhovah akomanse ti woko?

⁵ Na Jacques chapitre 5, Jacques awa e ti gue ti bâ a-ancien tongana e bâ so songo ti e na Jéhovah akomanse ti woko. Me a yeke kota ye mingi ti hunda na ala ti aidé e kozo si songo ti e na Jéhovah abuba. Zia e handa terê ti e ape. Bible atene so tongana e sara hange ape, e peut ti pensé so e yeke zia ngia na bê ti Jéhovah me a yeke ni la ape (Jacq. 1:22). Ambeni kozo Chrétien so ayeke lani na Sardes apensé tongaso, me Jésus atene na ala so ala yeke zia ngia na bê ti Jéhovah encore ape (Apoc. 3:​1, 2). Mbeni ye so e peut ti sara ti hinga wala e yeke na kpengba songo na Jéhovah ayeke ti haka ngia so e yeke na ni ândö na yâ ti kua ti Jéhovah na ti so e yeke na ni laso (Apoc. 2:​4, 5). E peut ti hunda terê ti e: ‘Eskê dikongo Bible nga na gbungo li na ndö ni angbâ ti nzere na mbi tongana ti kozo? Eskê mbi yeke leke abungbi nzoni nga mbi yeke gue dä lakue? Eskê mbi yapu ti fa tënë tongana ti kozo ape? Eskê sarango ngia wala warango aye ti sese amû ngoi ti mbi mingi nga pensé ti mbi kue ayeke gï na ndö ni?’ Tongana kiringo tënë na ambeni hunda so ayeke en apeut ti fa so songo ti e na Jéhovah akomanse ti woko awe na ayeke ngbâ gï ti woko tongana e sara mbeni ye ape. Tongana e hinga ape tongana nyen ti leke kpale ni wala tongana e sara mbeni ye so ason bê ti Jéhovah, a yeke nzoni e hunda na a-ancien ti aidé e.

6. A yeke nzoni azo so asara mbeni kota siokpari asara nyen?

⁶ Azo so asara kota siokpari so apeut ti sara si a zi ala na yâ ti congrégation, a yeke nzoni ala gue ala bâ a-ancien (1 aCor. 5:​11-13). Mbeni zo so asara mbeni kota siokpari abezoin ti tene a aidé lo si lo leke songo ti lo na Jéhovah. Ti tene Jéhovah apardonné e grâce na ye so a futa ti zi azo, e doit ti sara “akusala so alingbi biani na changengo bê.” (Kus. 26:20). Mbeni oko ti akusala ni so ayeke ti gue ti fa na a-ancien so e sara mbeni kota siokpari.

7. Azo wa la a yeke nga nzoni ti tene ala hunda na a-ancien ti aidé ala?

⁷ A-ancien ayeke aidé azo so asara mbeni kota siokpari me ala yeke aidé nga azo so songo ti ala na Jéhovah awoko (Kus. 20:35). Na tapande, peut-être mo bâ so a yeke ngangu na mo ti kanga asioni nzara ti bê ti mo. Peut-être a yeke ngangu na mo mingi mbilimbili tongana kozo ti tene mo hinga tâ tënë mo yeke ngbâa ti adrogue, mo yeke bâ porno wala mo yeke sara lango-sioni. Pensé ape so mo doit ti leke kpale ni gï mo oko. Mo peut ti sara lisoro na mbeni ancien so ayeke mä mo nzoni, so ayeke mû nzoni wango na mo nga ayeke sara si mo hinga so mo peut ti zia ngia na bê ti Jéhovah tongana mo ke ti sara ye alingbi na sioni nzara ti bê ti mo (Zo-ti. 4:12). Peut-être mo découragé ndali ti so mo bâ so mo ngbâ ti sara nzara ti sara sioni ye. Ancien ni ayeke dabe ti mo so a nzere na Jéhovah so mo hunda ti tene a aidé mo, ye so afa so mo ye ti zia ngia na bê ti Jéhovah.—1 aCor. 10:12.

8. Eskê e bezoin ti sara lisoro na a-ancien na ndö ti afaute kue so e sara? Fa ndani so mo tene tongaso.

⁸ E bezoin ape ti sara lisoro na a-ancien na ndö ti afaute kue so e sara. Na tapande, imaginé so mo son bê ti mbeni ita, wala ngonzo asara mo mingi na terê ti lo. Ahon ti gue ti bâ mbeni ancien, mo peut ti sara ye alingbi na wango ti Jésus na lege so mo gue ti bâ ita ni ti leke tënë ni (Mat. 5:​23, 24). Mo peut nga ti sara recherche na ndö ti atënë tongana sarango ye na ngangu ape, kangango bê ti ku nga na kangango nzara ti bê tongaso si ti peko mo changé. Me tongana mo bâ so lakue mo bezoin ti tene a aidé mo, mo peut ti gue ti bâ mbeni ancien. Na yâ ti lettre so bazengele Paul atokua na aPhilippien, lo hunda na mbeni ita-koli ti aidé Évodie na Syntyche ti leke kpale so ayeke na popo ti ala. Peut-être mbeni ancien na yâ ti congrégation ti mo apeut ti aidé mo na ita ni ti mä terê.—aPhil. 4:​2, 3.

NGBANGA TI NYEN LA A YEKE NZONI E IRI A-ANCIEN?

9. Ngbanga ti nyen la a yeke nzoni ape ti tene e zia si kamene akanga lege na e ti iri a-ancien? (aProverbe 28:13).

⁹ Na peko ti so e sara mbeni kota siokpari wala e bâ so a yeke ngangu na e ti ke asioni nzara ti bê ti e, e bezoin ti sara ye na mbeto ape nga na mabe ti hunda ti tene a aidé e. A yeke nzoni e zia pëpe si kamene akanga lege na e ti iri a-ancien. Ngbanga ti nyen? Ngbanga ti so Jéhovah azia a-ancien ti aidé e ti ngbâ ti duti na kpengba songo na lo. Tongaso tongana e gue e bâ a-ancien, e fa so e sara confiance na Jéhovah nga e mä yanga ti lo. E hinga so e bezoin mungo maboko ti lo ti ngbâ ti sara ye na lege ni (Ps. 94:18). Na tongana e sara mbeni siokpari si e fa ni na gigi nga e zia lege ni, lo yeke sara nzoni bê na e.—Diko aProverbe 28:13.

10. Nyen la apeut ti si tongana e gi ti honde akota siokpari so e sara?

¹⁰ Tongana e fa na a-ancien asiokpari so e sara, Jéhovah apeut ti pardonné e nga e peut ti leke songo ti e na lo. Me tongana e ke ti fa ni na ala, e yeke kiri ti bâ pasi mingi. Na ngoi so Gbia David agi ti honde asiokpari so lo sara, lo buba songo ti lo na Jéhovah, lo yeke na ngia ape nga lo wara kpale ti seni (Ps. 32:​3-5). Tongana zo awara kä wala terê ti lo ason me lo gi ti sava ni ape, ye ni ayeke ga gï sioni. Legeoko nga, tongana e sara mbeni kota siokpari me e gue e bâ a-ancien ape, e yeke bâ pasi mingi. So Jéhovah ahinga ni, lo tisa e ti tene e na lo “e leke tënë” na lege so e hunda na a-ancien ti aidé e ti kiri ti ga akamarade ti lo.—És. 1:​5, 6, 18.

11. Tongana e honde mbeni kota siokpari apeut ti sara nyen na ndö ti ambeni zo?

¹¹ Tongana e honde mbeni kota siokpari so e sara, amba ti e apeut ti bâ pasi. A peut ti sara si yingo ti Jéhovah asara kua nzoni na yâ ti congrégation ape nga a peut ti ga na kpale na aita (aÉph. 4:30). Legeoko nga, tongana e hinga so mbeni ita asara mbeni kota siokpari, a yeke nzoni e wa lo ti sara tënë ni na a-ancien.a Tongana e honde kota siokpari so mbeni zo asara, e nga kue tënë ayeke na li ti e (Lév. 5:1). So e ye Jéhovah, e yeke sigi na tënë ti ye ti sioni so mbeni zo asara. Tongaso, e yeke aidé ti sara si sioni ye alï na yâ ti congrégation ape nga e yeke aidé zo so asara siokpari ti kiri ti duti na nzoni songo na Jéhovah.

A-ANCIEN AYEKE AIDÉ E TONGANA NYEN?

12. Tongana nyen la a-ancien ayeke aidé azo so ayeke na kpengba songo na Jéhovah encore ape?

¹² Bible awa a-ancien ti aidé azo so ayeke na kpengba songo na Jéhovah encore ape (1 aThes. 5:14). Tongana mo sara mbeni faute, ala peut ti hunda na mo ambeni tënë ti ‘gboto’ na gigi atënë ti bê ti mo (aProv. 20:5). Mo peut ti aidé ala na lege so mo sigi na atënë ti bê ti mo polele, même tongana a yeke ngangu na mo ti sara ni ndali ti ngobo ti mo, asarango ye ti mo wala même tongana kpale ti mo ni asara mo kamene. Même tongana mo pensé so mo yeke ‘diko ande tënë gï kirikiri’ na devant ti ala, gi bê ti mo ape (Job 6:3). A-ancien ayeke fâ ngbanga gï hio tongaso na li ti mo ape ndali ti tënë so mo tene. Me ala yeke mä mo nzoni ti hinga ye kue na ndö ti tënë ni kozo ti mû na mo wango (aProv. 18:13). Ala hinga so ti bâ lege ti ataba ti kundu ti Jéhovah nzoni ahunda ngoi, ni la ala yeke sara lisoro na mo fani mingi tongaso si ala aidé mo nzoni.

13. Tongana nyen la asambela ti a-ancien nga na wango ti ala apeut ti aidé e? (Bâ nga afoto.)

¹³ Na ngoi so mo yeke sara lisoro na a-ancien, ala yeke gi pëpe ti sara si mo bâ so tënë ayeke na li ti mo mingi. Me ala yeke sambela ndali ti mo. Peut-être bê ti mo ayeke dë ti hinga so asambela ti ala ayeke na ngangu ti “sara aye mingi.” Ala yeke aidé nga mo na lege so “ala sara mafuta na terê ti [mo] na iri ti Jéhovah.” (Jacq. 5:​14-16). “Mafuta” ni so ayeke tâ tënë so ayeke na yâ ti Bible. Tongaso, a-ancien ayeke sara lisoro na mo na ndö ti aversê ti Bible so apeut ti dë bê ti mo nga ti aidé mo ti kiri ti duti na kpengba songo na Jéhovah (És. 57:18). Wango ti Bible so ala mû na mo apeut ti kpengba mo ti ngbâ ti sara ye so Jéhovah aye. Na lege ti ala, mo peut ti mä go ti Jéhovah so ayeke tene na mo, atene: “So ayeke lege ni la. [Mo] tambela dä.”—És. 30:21.

14. Ti gue oko na aGalate 6:​1, tongana nyen la a-ancien ayeke aidé zo kue so amû mbeni “sioni lege”? (Bâ nga afoto.)

¹⁴ Diko aGalate 6:1. A-Chrétien so amû mbeni “sioni lege” ayeke sara pëpe ye so Nzapa ahunda. Sioni lege ni apeut ti ndu mbeni sioni desizion so zo amû wala mbeni kota siokpari so lo sara. Ndoye ayeke pusu a-ancien ti “tara ti kiri na zo so na nzoni lege, na ala [yeke] sara ni na ngangu pëpe.” Tënë ti Grec so a kiri peko ni na tënë ‘kiri na zo na nzoni lege’ apeut nga ti sara tënë ti kiringo na mbeni bio so akungbi na place ni si atingbi nzoni. Na ngoi so mbeni nzoni docteur ayeke gi ti kiri na mbeni bio so akungbi na place ni, lo yeke sara kue ti tene a son zo ni mingi ape. Legeoko nga, na ngoi so a-ancien ayeke gi ti kiri na mbeni zo na nzoni lege, ala yeke sara ni na nzoni bê. Bible awa nga ala ti tene “ala wani ala sara hange”. Na ngoi so ala yeke gi ti kiri na e na nzoni lege, ala yeke bata na li so ala nga ala yeke mbilimbili-kue ape nga ala yeke sara afaute. Tongaso, ala yeke sara hange mingi si ala pensé ape so ala yeke nzoni ahon zo so ala yeke gi ti aidé lo. Me ala yeke sara terê ti ala kete nga ala yeke bâ mawa ti zo ni.—1 Pi. 3:8.

15. Tongana e wara mbeni kpale, nyen la e peut ti sara?

¹⁵ E peut ti sara confiance na a-ancien. A fa na ala ti bata atënë so zo adoit ti mä ni kirikiri ape. A fa nga na ala ti sara kua na Bible ti mû wango na e ahon ti fa bango ndo ti ala wani nga ti aidé e ti ngbâ ti gbu ngangu na yâ ti akpale ti e (aProv. 11:13; aGal. 6:2). Asarango ye ti ala ayeke nde nde nga ambeni aninga na yâ ti kua ti ancien ahon ambeni, me na ngoi so e wara kpale, e peut ti sara lisoro na ancien so bê ti e aye. Me, e yeke sara pëpe lisoro na a-ancien nde nde juska e wara mbeni so a mû na e wango so e ye ti mä ni. Tongana e sara tongaso, e yeke sara ye tongana azo so aye ti tene a fa na ala atënë so “anzere na mê ti ala” ahon ti mä “nzoni fango ye” so ayeke na yâ ti Bible (2 Tim. 4:3). Tongana e sara lisoro na mbeni ancien na ndö ti mbeni kpale, lo peut ti hunda ti hinga wala e sara tënë ni na mbeni ancien nde nga wango wa la lo mû na e. Sarango terê kete apeut ti pusu lo ti hunda wango na mbeni mba ti lo.—aProv. 13:10.

YE SO E OKO OKO E DOIT TI SARA

16. Nyen la e doit ti sara?

¹⁶ Atâa so a-ancien ayeke mû na e wango nga ala yeke aidé e na ngoi so e yeke na akpale, ala yeke mû desizion na place ti e ape. A yeke na e oko oko ti fa so e yeke voro Nzapa na bê ti e kue. E yeke kiri tënë na Nzapa ndali ti atënë so e tene nga na aye so e sara. Na lo yeke aidé e ti mû anzoni desizion nga ti ngbâ be-ta-zo na lo (aRom. 14:12). Ndani la, a-ancien ayeke fa na e ape ye so e doit ti sara, me ala yeke fa na e pensé ti Jéhovah na ndö ti tënë ni si e wani e mû desizion ti e. Tongana e sara ye alingbi na wango ti ala ayeke aidé e ti sara kua nzoni na ‘ngangu ti gbungo li ti e’ ti mû anzoni desizion.—aHéb. 5:14.

17. Nyen la a yeke nzoni e leke na bê ti e ti ngbâ ti sara?

¹⁷ E kiri singila mingi na Jéhovah so ayeke bâ lege ti e nzoni, tongana ti so mbeni nzoni berger ayeke bâ lege ti ataba ti lo. Lo tokua Jésus, “berger so ayeke nzoni mingi”, ti mû ye so a futa ti zi azo si e ngbâ na fini lakue lakue (Jean 10:11). Jéhovah amû nga na e a-ancien ti bâ lege ti e na yâ ti acongrégation, tongana ti so lo mû zendo ni. Lo tene: “Mbi yeke mû na ala aberger. Aberger ni ayeke bata ala na lege ti hingango ndo nga na ndara.” (Jér. 3:15). Tongaso, tongana e bâ so songo ti e na Jéhovah akpengba encore ape, zia e sara mbeto ape ti iri a-ancien ti aidé e. Zia e ngbâ ti leke na bê ti e ti bâ nzoni mingi na lege ti a-ancien so Jéhovah amû ala na e ti aidé e.