Atënë so azo ahunda
Kua ti fango tënë ayeke hunzi ande lawa?
Jésus atene lani, atene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” (Mat. 24:14). Tënë ti Grec so a kiri peko ni na tënë “nda ni” na yâ ti versê so nga na versê 6 nga na 13 ayeke télos. A ye ti sara tënë ti ngoi so a yeke futi ande biani biani dunia ti Satan na Harmaguédon (Apoc. 16:14, 16). Tongaso, e yeke ngbâ ande ti fa nzoni tënë juska na ngoi so Harmaguédon aye ti komanse. Ye so achangé yâ ti fason so e mä na yâ ti tënë so kozo.
Kozo, e tene so e yeke zia ti fa nzoni tënë na ngoi so kota ye ti vundu ayeke komanse na futingo Babylone, Ngangu gbata (Apoc. 17:3, 5, 15, 16). E tene lani so na ngoi so kota ye ti vundu ayeke komanse, “ngu so na yâ ni Jéhovah ayeke sara nzoni na azo” ayeke hunzi (És. 61:2). E bâ lani nga so azo so ayeke sö kuâ na kota ye ti vundu ayeke azo so afa so ala yeke be-ta-zo na Jéhovah kozo ti tene kota ye ti vundu akomanse. E haka azo so na aJuif so asö kuâ lani na ngoi so a futi Jérusalem na ngu 607 K.N.E. A sara marque na ndö ti lê ti ala ndali ti so ala yeke voro Jéhovah nga ala ke asioni ye (Ézéch. 5:11; 9:4). Me hakango ye so ague nde na atënë ti Jésus so ayeke na Matthieu 24:14, so afa so azo ayeke wara lege ti yeda na nzoni tënë kozo si a futi ande biani biani dunia so na Harmaguédon.
Fini fango nda ti ye na ndö ti Matthieu 24:14 achangé nga fason so e mä na yâ ti Apocalypse 16:21, so a haka tënë so e yeke fa na azo na akota glason. Ambeni gingo nda ti ye afa so aversê use so ague oko. Na lege wa? Ye so a-aidé e ti hinga ni ayeke fason so azo ayeke sara ye na ngoi so ala mä tokua ti Royaume. Bazengele Paul atene so ti “ala so a ngbâ ti sö ala”, tënë so e yeke fa ayeke nzoni tënë, so ti tene, “fion ti fini”. Me ti awato ti Nzapa, tënë so e yeke fa ayeke sioni tënë, so ti tene, “fion ti kuâ”. (2 aCor. 2:15, 16). Ala ke tënë ti Royaume so e yeke fa ndali ti so e fa so dunia so ala ye ni so ayeke sioni, Satan la akomande ni nga a ga nduru ti futi ni awe.—Jean 7:7; 1 Jean 2:17; 5:19.
Bâ nga so akota glason so alondo na yayu atï na ndö ti azo, so Apocalypse 16:21 asara tënë ni, “mara ni ayeke use pëpe.” Peut-être so aye ti tene so, na ngoi ti kota ye ti vundu, tënë so e yeke fa ayeke duti ande mbeni ngangu tënë nga ayeke si na azo encore mingi. A yeke sara si iri ti Jéhovah amû ndo mingi (Ézéch. 39:7). Na ngoi ni so, na peko ti so a yeke futi ande Babylone, Ngangu gbata, eskê tënë so e yeke fa ayeke fun pendere na hôn ti ambeni zo? A peut ti duti tongaso. Na yâ ti angu mingi, aTémoin ti Jéhovah atene so a yeke futi abungbi ti vorongo nzapa ti wataka, peut-être ambeni zo ayeke dabe ti ala na tënë so, na ala yeke ga ti hinga so tënë so la ayeke ga tâ tënë so. Me ti ambeni, a yeke na ngoi ni so la ala yeke mä ni.
A yeke mara ti ye so asi lani na ngbene Égypte na peko ti aye ti ngangu bale-oko. Na peko ti so Jéhovah ‘afâ ngbanga na li ti anzapa kue ti Égypte,’ “gbâ ti azo nde nde” so ayeke azo ti Israël ape abungbi oko na azo ti lo (Ex. 12:12, 37, 38). Peut-être awande so asoro ti gue na azo ti Jéhovah na ngoi so ala bâ so aye ti ngangu bale-oko kue so Moïse asara tënë ni asi.
Zo kue so ayeke ga ande na mbage ti Jéhovah na peko ti so a futi Babylone, Ngangu gbata ayeke wara pasa ti mû maboko na aita ti Christ so angbâ encore na ndö ti sese (Mat. 25:34-36, 40). Ti vrai ni, pasa ti tene a bâ mbeni zo tongana taba ayeke hunzi kete kozo na Harmaguédon na ngoi so tanga ti aita ti Christ ayeke wara futa ti ala na yayu.
Fini fango nda ti ye so afa kota ndoye ti Jéhovah nga na nzoni bê ti lo na mbage ti azo. Biani, “lo ye si a futi zo oko pëpe, me lo ye si azo kue achangé bê ti ala.”—2 Pi. 3:9.