Iri ti Jéhovah ayeke kota ye mingi na lê ti e

1-2. E hinga tongana nyen so iri ti Jéhovah ayeke kota ye na lê ti Jésus?

IRI TI Jéhovah ayeke kota ye mingi na lê ti Jésus. Mbeni zo so asara aye mingi ti tene azo ahinga iri ti Jéhovah ahon Jésus ayeke dä ape. Tongana ti so e bâ na yâ ti article so ahon, Jésus ayeke lani nduru ti kui ndali ti iri ti Jéhovah nga ndali ti aye kue so andu iri ni so (Marc 14:36; aHéb. 10:​7-9). Nga na peko ti Komandema ti lo ti ngu saki oko, lo yeke duti ande nduru ti kiri na Jéhovah ngangu kue so lo mû na lo ndali ti so lo ye ti tene gloire kue ague na Jéhovah (1 aCor. 15:​26-28). Yengo so Jésus aye na iri ti Nzapa afa nga ye mingi na ndö ti songo so ayeke na popo ti lo na Babâ ti lo. Ye so afa so Jésus aye Jéhovah mingi.

² Jésus aga lani na sese na iri ti Babâ ti lo (Jean 5:43; 12:13). Lo fa lani iri ti Babâ ti lo na adisciple ti lo (Jean 17:​6, 26). Lo fa ye lani na iri ti Jéhovah nga lo sara amiracle na iri ni so (Jean 10:25). Ti vrai ni, Jésus ahunda lani na Jéhovah ti bâ ndo na ndö ti adisciple ti lo “ndali ti iri ti [Lo] wani”. (Jean 17:11). A yeke polele so iri ti Nzapa ayeke lani kota ye mingi na lê ti Jésus ahon tanga ti aye kue. Tongaso, tongana nyen la mbeni zo apeut ti tene so lo yeke disciple ti Jésus sân ti hinga iri ti Babâ ti lo wala ti di ni?

3. Nyen la e yeke bâ na yâ ti article so?

³ So e yeke aChrétien so ayeke gi ti mû peko ti gere ti Jésus, e bâ na nene ni mingi iri ti Babâ ti lo (1 Pi. 2:21). Na yâ ti article so, e yeke bâ ndani so Jéhovah amû iri ti lo na azo so ayeke fa “nzoni tënë ti Royaume”. (Mat. 24:14). E yeke bâ nga tongana nyen la iri ti Jéhovah adoit ti duti kota ye mingi na lê ti e oko oko kue.

“MBENI BUNGBI TI AZO NDALI TI IRI TI LO”

4. (a) Tënë ti nyen la Jésus atene na adisciple ti lo kozo si lo kiri na yayu? (b) Tënë ti lo ni asara si hunda wa la alondo?

⁴ Kete kozo si Jésus akiri na yayu, lo tene na adisciple ti lo, lo tene: “Ala yeke wara ande ngangu tongana yingo vulu aga na ndö ti ala, ala yeke duti atémoin ti mbi na Jérusalem, na yâ ti Judée kue nga na Samarie, nga juska na ambage ti sese so ayeke tâ yongoro.” (Kus. 1:8). Tongaso, adisciple ayeke fa nzoni tënë na ndo kue, me gï na Israël ape. A si na mbeni ngoi, azo ti amara kue ayeke wara ande pasa ti ga adisciple ti Jésus (Mat. 28:​19, 20). Me Jésus atene: “Ala yeke duti atémoin ti mbi.” Eskê afini disciple so abezoin ti hinga iri ti Jéhovah wala ala yeke duti gï atémoin ti Jésus? Aye so a sara tënë ni na Kusala chapitre 15 ayeke aidé e ti kiri tënë na hunda so.

5. Tongana nyen la abazengele nga na a-ancien so ayeke na Jérusalem afa so azo kue abezoin ti hinga iri ti Jéhovah? (Bâ nga foto.)

⁵ Na ngu 49, abazengele nga na a-ancien so ayeke na Jérusalem abungbi ti sara lisoro na ndö ti ye so azo so afâ ganza ape abezoin ti sara ti ga aChrétien. Na hunzingo ti lisoro ni, Jacques, so ayeke ita ti Jésus so mama ti lo na lo ayeke oko, atene: “[Pierre] afa kue awe tongana nyen Nzapa abi lê ti lo ti kozoni na mbage ti azo ti amara ti soro na popo ti ala mbeni bungbi ti azo ndali ti iri ti lo.” Jacques ayeke sara lani tënë ti iri ti zo wa? Lo fa peko ti tënë ti prophète Amos, lo tene: “Si tanga ti ala so angbâ na popo ti azo so alingbi ti gi Jéhovah na bê ti ala kue, ala legeoko na azo ti amara kue, azo so iri ti mbi ayeke na ndö ti ala. So ayeke tënë ti yanga ti Jéhovah la.” (Kus. 15:​14-18). Afini disciple so ayeke manda ye na ndö ti Jéhovah nga ala yeke duti azo so ‘iri ti lo ayeke na ndö ti ala.’ Ye so aye ti fa so ala yeke fa iri ti Nzapa na azo nga azo ayeke hinga ala tongana azo so asara kua na iri so.

6-7. (a) Jésus aga lani na sese ngbanga ti nyen? (b) Kota raison wa la ndali ni Jésus aga na sese?

⁶ Nda ti iri ti Jésus aye ti tene “Jéhovah ayeke salut” na Jéhovah asara kua na Jésus ti sö azo kue so amä na bê na lo nga na Molenge ti lo. Jésus aga lani na sese ti mû fini ti lo ndali ti azo (Mat. 20:28). So lo sara tongaso, lo mû lege na azo ti wara pardon ndali ti asiokpari ti ala nga ti wara fini ti lakue lakue.—Jean 3:16.

⁷ Me nyen la asara si azo abezoin ti tene a sö ala? Azo abezoin ti tene a sö ala ngbanga ti ye so apassé lani na yaka ti Éden. Tongana ti so a fa na yâ ti article so ahon, Adam na Ève, so ayeke kozo babâ na mama ti e, asara lani kpengba-li na Jéhovah na ala perdre pasa ti ngbâ na fini lakue lakue (Gen. 3:​6, 24). Me Jésus aga lani na sese ti sara mbeni ye so ayeke même kota mingi ahon ti sö fini ti azo. Satan atene lani asioni mvene na iri ti Jéhovah (Gen. 3:​4, 5). Tongaso, azo abezoin ti hinga so Jéhovah asara mbeni sioni ye ape nga iri ti lo ayeke nzoni-kue. So Jésus ayeke sara lani kua na iri ti Jéhovah nga iri ti Jéhovah ayeke na ndö ti lo, lo sara mbeni kota ye ti sara si iri ti Jéhovah aga nzoni-kue.

8. Nyen la azo kue so amä na bê na Jésus abezoin ti hinga?

⁸ Adisciple ti Jésus kue, aJuif nga na azo so ayeke aJuif ape, abezoin ti hinga zo so ayeke sö ala, mbilimbili Jéhovah Nzapa, Babâ ti Jésus (Jean 17:3). Na ndö ni, tongana ti Jésus, a yeke hinga ala na iri ti Jéhovah. Ala bezoin nga ti hinga so a yeke kota ye ti sara si iri ti Nzapa aga nzoni-kue. Ala doit ti sara ni si a sö ala (Kus. 2:​21, 22). Tongaso, adisciple ti Jésus kue abezoin ti manda ye na ndö ti Jéhovah nga na Jésus. Ndani la Jésus ahunzi sambela ti lo so ayeke na Jean 17 na atënë so: “Mbi sara si ala hinga iri ti mo, na mbi yeke sara si a hinga ni, tongaso si ndoye so mo ndoye na mbi aduti na popo ti ala nga mbi duti beoko na ala.”—Jean 17:26.

“ALA YEKE ATÉMOIN TI MBI”

9. Tongana nyen la e peut ti fa so iri ti Jéhovah ayeke kota ye na lê ti e?

⁹ Na lege ti aye so e londo ti bâ, a yeke polele so ti ga disciple ti Jésus, e doit ti sara si iri ti Jéhovah aga nzoni-kue (Mat. 6:​9, 10). Na lê ti e, iri ti Jéhovah adoit ti duti iri so ayeke kota ahon atanga ni kue. E doit ti fa ni na lege ti sarango ye ti e. Tongaso, nyen la e peut ti sara ti tene iri ti Jéhovah aga nzoni-kue nga ti fa so atënë so Satan atene na iri ti Jéhovah ayeke tâ tënë ape?

10. Ngbanga wa la a sara tënë ni na lege ti fä na Ésaïe chapitre 42 ti si na 44? (Ésaïe 43:9; 44:​7-9). (Bâ nga foto.)

¹⁰ Ésaïe chapitre 42 ti si na 44 afa ye so e peut ti sara ti tene iri ti Jéhovah aga nzoni-kue. Na yâ ti achapitre so, Jéhovah ahunda na azo so ayeke voro lo ape ti fa aye so afa so anzapa ti ala ayeke dä biani. Tongana ti so a yeke sara na ngoi ti mbeni ngbanga, lo hunda ti hinga wala atémoin ayeke dä so apeut ti fa so anzapa ti ala ayeke dä biani. Me zo oko apeut ti fa ape.—Diko Ésaïe 43:9; 44:​7-9.

11. Tënë wa la Jéhovah atene na azo ti lo na Ésaïe 43:​10-12?

¹¹ Diko Ésaïe 43:​10-12. Jéhovah atene na azo ti lo, atene: “Ala yeke atémoin ti mbi na mbi yeke Nzapa.” Jéhovah ahunda ala ti kiri tënë na hunda so: “Mbeni Nzapa nde na mbi ayeke dä?” (És. 44:8). E yeke na kota pasa ti kiri tënë na hunda so. Na lege ti atënë ti yanga ti e nga na sarango ye ti e, e yeke fa so Jéhovah la ayeke oko tâ Nzapa. Iri ti lo ayeke kota ahon tanga ti airi kue. Na lege ti fason so e yeke vivre na ni, e yeke fa so e ye biani Jéhovah nga e yeke be-ta-zo na lo atâa akpale so Satan aga na ni na ndö ti e. Tongana e sara tongaso, e yeke fa so e yeke na pasa ti mû maboko ti tene iri ti lo aga nzoni-kue.

12. Prophétie so ayeke na Ésaïe 40:​3, 5 aga lani tâ tënë tongana nyen?

¹² Tongana e gbu koko ti iri ti Jéhovah, andâ e yeke mû tapande ti Jésus Christ la. Ésaïe atene nga lani kozo awe so mbeni zo ayeke “zi aye kue na ndö ti [wala “leke”] lege ti Jéhovah!” (És. 40:​3, kete tënë na gbe ni). Tënë so aga lani tâ tënë tongana nyen? Jean Baptiste aleke lani lege ti Jésus so aga na iri ti Jéhovah nga asara tënë na iri ti Jéhovah (Mat. 3:3; Marc 1:​2-4; Luc 3:​3-6). Oko prophétie so atene: “A yeke fa gloire ti Jéhovah na gigi.” (És. 40:5). A fa ni lani tongana nyen? Na ngoi so Jésus ayeke na ndö ti sese, lo sara kua tâ nzoni mingi na iri ti Jéhovah mo bâ mo tene Jéhovah wani la aga na sese.—Jean 12:45.

13. Tongana nyen la e peut ti mû tapande ti Jésus?

¹³ Tongana ti Jésus, e yeke aTémoin ti Jéhovah. Iri ti Jéhovah ayeke na ndö ti e nga e yeke fa na azo kue apendere ye so lo sara. Me ti duti anzoni Témoin ti Jéhovah, e doit nga ti fa na azo aye kue so Jésus asara ti tene iri ti Jéhovah aga nzoni-kue (Kus. 1:8). Jésus ayeke kota Témoin ti Jéhovah na e yeke mû tapande ti lo (Apoc. 1:5). Me mbeni ye nde wa la e peut ti sara ti fa so iri ti Jéhovah ayeke kota na lê ti e?

IRI TI JÉHOVAH AYEKE KOTA NA LÊ TI E

14. Tongana ti so a fa na Psaume 105:​3, tënë ti bê ti e na ndö ti iri ti Jéhovah ayeke nyen?

¹⁴ E pika kate na ndö ti iri ti Jéhovah. (Diko Psaume 105:3.) Terê ti Jéhovah anzere mingi so e pika kate na ndö ti iri ti lo (Jér. 9:​23, 24; 1 aCor. 1:31; 2 aCor. 10:17). Ti “pika kate na ndö ti Jéhovah” aye ti tene a nzere na e so Jéhovah ayeke Nzapa ti e. E bâ so e yeke na pasa ti gonda iri ti Jéhovah nga ti gbu koko ni. Kamene adoit ti sara e lâ oko ape ti tene na amba ti e ti place ti kua, ti ekole, avoizin ti e nga na ambeni zo so e yeke aTémoin ti Jéhovah. Zabolo aye ti tene e zia ti fa na azo iri ti Jéhovah (Jér. 11:21; Apoc. 12:17). Ti vrai ni, Satan na aprophète ti lo ti wataka aye ti sara si azo agirisa iri ti Jéhovah (Jér. 23:​26, 27). So e ye iri ti Jéhovah, e yeke na ngia ndali ni “na yâ ti lango ni kue”.—Ps. 5:11; 89:16.

15. Ti di iri ti Jéhovah aye ti tene nyen?

¹⁵ E yeke ngbâ ti di iri ti Jéhovah (Joël 2:32; aRom. 10:​13, 14). Ti di iri ti Jéhovah aye ti tene ti hinga ni nga ti sara kua na ni, me a ngbâ gï ge ape. A ye nga ti tene ti hinga lo nzoni, ti sara confiance na lo, ti bâ ndo na mbage ti lo ti aidé e nga ti fa lege na e (Ps. 20:7; 99:6; 116:4; 145:18). Ti di iri ti Jéhovah aye nga ti tene e fa na azo iri ti lo nga na apendere sarango ye ti lo, e wa ala ti changé bê ti ala nga ti sara achangement na yâ ti fini ti ala tongaso si ala peut ti zia ngia na bê ti lo.—És. 12:4; Kus. 2:​21, 38.

16. Tongana nyen la e peut ti fa so Satan ayeke zo ti mvene?

¹⁶ E yeke nduru ti bâ pasi ndali ti iri ti Jéhovah (Jacq. 5:​10, 11). Tongana e ngbâ be-ta-zo na Jéhovah na ngoi so e wara akpale, e yeke fa so Satan ayeke zo ti mvene. Na ngoi ti Job, Satan atene na ndö ti azo so ayeke voro Jéhovah, atene: “Zo ayeke mû ye kue so lo yeke na ni ti sö na fini ti lo.” (Job 2:4). Satan atene so azo ayeke voro Jéhovah gï tongana aye atambela nzoni na ala. Me tongana gigi akpengba na ala, ala yeke dö Jéhovah ti zia. Job so ayeke be-ta-zo afa so tënë so ayeke mvene. Laso, e nga kue e peut ti fa so e yeke ngbâ ti sara na Jéhovah, atâa gigi akpengba na e tongana nyen wala tongana Satan agi ti découragé e. E peut ti hinga na bê ti e kue so Jéhovah ayeke ngbâ ti bâ ndo na ndö ti e ndali ti iri ti lo.—Jean 17:11.

17. Na mbeni lege nde wa la e peut ti mû gloire na Jéhovah tongana ti so a tene na 1 Pierre 2:12?

¹⁷ E yeke fa so e ne iri ti Jéhovah (aProv. 30:9; Jér. 7:​8-11). So azo ahinga so e yeke aTémoin ti Jéhovah, aye so e sara apeut ti mû gonda na iri ti lo wala ti bi zonga na ndö ni. (Diko 1 Pierre 2:12.) Tongaso, e ye ti sara ye kue so e peut ti sara ti gonda Jéhovah na lege ti tënë ti yanga ti e nga na sarango ye ti e. Tongana e sara tongaso, atâa so e yeke mbilimbili-kue ape, e yeke ngbâ ti mû gonda na iri ti Jéhovah.

18. Na mbeni lege nde wa la e peut ti fa so iri ti Jéhovah ayeke kota na lê ti e? (Bâ nga kete tënë na gbe ni.)

¹⁸ E bâ so iri ti Jéhovah ayeke kota ahon ye so azo apensé na ndö ti e (Ps. 138:2). Ngbanga ti nyen la ye so ayeke kota mingi? Ngbanga ti so tongana e sara ye so anzere na Jéhovah, fani mingi a nzere na azo ape na ala peut ti tene asioni tënë na ndö ti e.a Jésus ayeke lani nduru ti kui kuâ ti kamene tongana mbeni sioni zo ti mû gonda na iri ti Jéhovah. Lo “bi kamene yongoro” wala lo gi bê ti lo mingi ape na ndö ti tënë so azo ayeke tene na ndö ti lo (aHéb. 12:​2-4). Lo zia li ti lo na ndö ti sarango ye so bê ti Nzapa aye.—Mat. 26:39.

19. Tënë ti bê ti mo na ndö ti iri ti Jéhovah ayeke so wa? Ngbanga ti nyen?

¹⁹ E pika kate na ndö ti iri ti Jéhovah nga so a iri e aTémoin ti Jéhovah, e bâ so a ne e. So iri ti Jéhovah ayeke kota mingi na lê ti e, e yeke ngbâ ti mû gonda na ni atâa azo abâ e tongana ambumbuse zo. Iri ti Jéhovah ayeke kota mingi na lê ti e ahon même iri ti e wani. Tongaso, zia e leke na bê ti e ti ngbâ ti mû gonda na ni atâa nyen la Satan asara ti kanga lege na e. Tongana e sara tongaso, e yeke fa so iri ti Jéhovah ayeke kota mingi na lê ti e tongana ti so a yeke kota mingi na lê ti Jésus Christ.