Aye ti sioni ayeke si mingi na ngoi ti bira
Ambeni ye so amû vundu mingi na azo so ahon atanga ni kue ayeke bira nga na sarango ye ti ngangu na zo. Aturugu nga na asenge zo so avivre na ngoi ti bira na yâ ti dunia kue ahinga so bira ayeke sioni mingi.
ATURUGU
“Lakue mo yeke bâ azo so a fâ ala wala so ayeke wara akota kä na ndo so mo yeke dä. Mo bâ so mo yeke na sécurité ape.”—Gary, na Grande Bretagne.
“Alê ti ngombe ayeke hon lani na terê ti mbi, mbi bâ gbâ ti azo so akui, amolenge nga na akota zo. Bira ayeke ga na kuâ nga azo ayeke bâ pasi mingi.”—Wilmar, na Colombie.
“Tongana a fâ mbeni zo na lê ti mo, image ni ayeke hon na yâ ti li ti mo hio ape. Adema ti zo ni ayeke ngbâ gï lakue na li ti mo. Mo yeke girisa ye so a sara na zo ni ape.”—Zafirah, na États-Unis.
ASENGE ZO
“Mbi pensé so mbi peut ti kiri ti duti na ngia lâ oko ape. Mbi sara lani mbeto so a yeke fâ mbi, azo ti sewa ti mbi wala akamarade ti mbi.”—Oleksandra, na Ukraine.
“A yeke ye ti mbeto ti sara rang na 2 h juska 23 h ti gue ti mû kobe ndali ti so lê ti ngombe apeut ti wara mo.”—Daler, na Tadjikistan.
“Babâ na mama ti mbi akui na yâ ti bira na asara si mbi ngbâ gï mbi oko. Ndali ti bira, mbi perdre babâ na mama ti mbi nga zo oko ti aidé mbi wala ti bâ lege ti mbi ayeke dä ape.”—Marie, na Rwanda.
Atâa so azo so abâ pasi ndali ti bira, ala yeke fadeso na siriri. Nga, ala hinga biani so bira nga na sarango ye ti ngangu na zo ayeke hunzi ande. Tour ti Ba Ndo so asara kua na atënë so ayeke na yâ ti Bible ti fa tongana nyen la ye ni ayeke si ande.