E yeke atémoin na ngoi kue
1. Ye wa e lingbi ti manda na yâ ti tondo ti Jésus so afa tënë na mbeni wali na tere ti dungu?
1 Jésus atambela teti angbonga mingi. Lo nze nga nzara ti ngu asara lo. Na ngoi so adisciple ti lo ague ti vo kobe, lo duti na tere ti mbeni dungu na gigi ti gbata ti Samarie ti wu tere ti lo. Jésus ague lani na Samarie ti fa tënë pëpe. Lo yeke hon ti lo hongo ti gue na Galilée ti fa tënë kâ. Atâa so kue, lo gbu lege so azi na lo ti fa tënë na mbeni wali so aga ti gi ngu (Jean 4:5-14). Lo sara ni ngbanga ti nyen? Lo zia lâ oko pëpe ti duti “témoin so ayeke be-ta-zo si ayeke tene gi tâ tënë”. (Apoc. 3:14). E yeke mû tapande ti Jésus na lege so e yeke aTémoin ti Jéhovah na ngoi kue.—1 Pi. 2:21.
2. Tongana nyen e lingbi ti leke tere ti e ti fa tënë na alege kue so azi?
2 Leke tere ti mo: E lingbi ti leke tere ti e ti fa tënë na alege kue so azi na mungo ambeti na tere ti e. Mingi ti awafango tënë abata atract na tere ti ala na ala yeke mû ni na azo so ayeke kä ye na yâ ti amagazin, azo na place ti kango essence, nga na ambeni zo so ala tingbi na ala na yâ ti lango oko oko (Zo-ti. 11:6). Mbeni ita-wali so ayeke voyagé ka lakue aleke ti duti lakue na kete Bible nga na buku Bible afa na yâ ti kete bozo ti lo. Lo yeke tara ti to nda ti lisoro na azo so aduti na tere ti lo.
3. Tongana nyen e lingbi ti to nda ti lisoro?
3 To nda ti lisoro: Na ngoi so e yeke fa tënë na alege kue so azi, e yeke to nda ti lisoro pëpe na lege ti mbeni tënë na ndo ti Bible. Jésus ato nda ti lisoro lani na wali so na tere ti dungu na fango pëpe na wali ni so ni yeke Messie. Lo hunda na wali ni gi ngu ti nyon, ye so apusu wali ni ti gi ti hinga ye (Jean 4:7-9). Mbeni ita-wali abâ so mara ti kode so amû lege na lo ti to nda ti lisoro na ngoi so a hunda lo wala lo yeke sara ka matanga ti Noël nga na ti Fini Ngu. A hon ti kiri tënë so lo yeke sara ni pëpe ndali ti so lo yeke Témoin ti Jéhovah, lo tene: “Mbi wani mbi ye ti sara amatanga so pëpe.” Mingi ni zo so ahunda tënë ni ayeke gi ti hinga ngbanga ti nyen, ye so amû lege na ita-wali ni ti fa tënë.
4. Ngbanga ti nyen Matthieu 28:18-20 apusu mo ti fa tënë?
4 Atâa so Jésus ahunzi awe kusala ti fango tënë so lo sara na bê ti lo kue na ndo ti sese ge, lo ngbâ lakue ti bi bê ti lo mingi na kusala ti fango tënë si a sara ni tongana ti so lo sara lani (Mat. 28:18-20). Ni la, na tapande ti Jésus, e yeke aTémoin so ayeke nduru ti fa tënë ti mabe ti ala dandara na ngoi kue.—aHéb. 10:23.