Hundango Ndo
◼ Ngbanga ti nyen a hunda ti sara ye na ndara na sarango kusala na téléphone ti mä na abungbi ti congrégation?
Acongrégation mingi asara kusala na téléphone teti azo so na ambeni ngoi ala lingbi pëpe ti gue na abungbi na Da ti Royaume ti tene ala mä abungbi na da ti ala ndali ti so kobela wala ambeni ye nde akanga lege na ala. Ti bâ si azo so ayeke biani na bezoin ni asara kusala na ye so a leke na lege ti ndoye, a hunda ti sara ye na ndara nga ti leke aye nzoni. Ni la, a-ancien so ayeke bâ ndo na ndo ti mara ti lekengo ye tongaso aye ti leke ni nga ti bi lê na ndo ti lege so a yeke sara kusala na ni si “ye kue atambela na lege ni nga na yâ ti wusuwusu pëpe.”—1 aCor. 14:40.
A-ancien ayeke bâ si a sara kusala na ni kozoni kue ndali ti awafango tënë ti congrégation ti ala so ayeke na mbeni ngangu kobela, so mbeni mbage ti tere ti ala abuba wala ala so alingbi ti sigigi na da pëpe. Mbeni wafango tënë so ngoi na ngoi ayeke tï kobela wala alingbi ti tambela pëpe, wala mbeni wamandango Bible so ayeke gue na li ni na so alingbi pëpe ti sigigi na da alingbi peut-être nga ti bâ nzoni na lege ti ye so na a yeke diko lo na popo ti azo so aga na bungbi. Na ndo so téléphone ayeke dä mingi pëpe ti mû maboko na azo so ayeke tâ na bezoin ni, a lingbi peut-être ti leke ambeni ye nde, na tapande ti mû bungbi ni na ndo ti kassette na ti gue na ni na ala ti mä ni.
Ye oko, mbeni ye ti hon aye ti nzoni so zo ayeke wara tongana lo mveni lo ga na abungbi ti e ayeke dä pëpe. Ti gue na Da ti Royaume legeoko na aita ti e ayeke mû lege na e ti “kpengba tere na popo ti e,” na a yeke mû maboko na afini zo ti bâ so a yeke kota ye mingi ti gue na abungbi. Tongana e duti dä na ngoi ti abungbi ti e, e yeke manda ye mingi na lege ti adémonstration, a-ancien alingbi ti mû maboko na e oko oko, na e yeke bâ tâ na lê ti e kota ndoye ti aita. Atënë so mbeni ita-wali mbakoro atene na ngoi so lo yeke sigigi na Da ti Royaume na pekoni so mbeni ita agbu lo na kate ti lo afa so ye so ayeke tâ tënë, lo tene: “A lingbi ti sara ye so na mo na lege ti téléphone pëpe!”—aRom. 1:11, 12.
Na tapande ti Anne so ‘ayeke manke ti gue na temple lâ oko pëpe,’ mingi ti aita ti e so aga mbakoro awe ayeke gue lakue na abungbi tongana seni ti ala wala dutingo ti ala amû lege na ala (Luc 2:36, 37). Na ngoi so a yeke sara kusala na téléphone ti mä na abungbi tongana bezoin ni ayeke dä, ala yeke bâ ni pëpe tongana mbeni ye so amû place ti guengo na abungbi na Da ti Royaume. Na mungo nzoni tapande ti ala, zia e ngbâ lakue ti duti na ngia ti sara kue ti duti dä na ngoi ti abungbi ti e ti voro Jéhovah, kota Nzapa ti e.—Ps. 95:1-3, 6; 122:1.