Mo nga kue mo lingbi ti sara ni!
1 Azo oke na yâ ti congrégation ti mo ahinga tâ tënë na lege ti mbeni lisoro so a sara na ala sân ti fa tënë na ala da na da? Peut-être kiringo tënë ni ayeke pika bê ti mo. Ti fa tënë na alege kue so azi andu fango nzoni tënë na azo so e yeke tingbi na ala na yâ ti akusala ti e ti lâ oko oko: na tapande na voyage, na ekole, na place ti kua, tongana e yeke gue ti bâ asewa wala avoizin, e yeke gue ti vo ye, nga na ambeni ngoi nde. Na yâ ti mbeni groupe ti aita so ahon 200, ala so a fa tënë na ala na mara ti alege tongaso, wungo ti ala ahon 80. Kode ti fango tënë tongaso alë lengo nzoni mingi.
2 Akozo Chrétien ayeke fa ka lani tënë na alege kue so azi na ala. Na tapande, lani tongana Jésus ayeke hon na yâ ti Samarie, lo fa tënë na mbeni wali so ayeke tö ngu na dungu ti Jacob (Jean 4:6-26). Philippe ato nda ti lisoro na mbeni kota zo ti Éthiopie so ayeke diko lani buku ti Ésaïe, lo hunda lo: “Mo yeke mä yâ ti ye so mo yeke diko so biani?” (Kus. 8:26-38). Na ngoi so bazengele Paul ayeke na da ti kanga na kodoro ti Philippe, lo fa tënë na zo ti batango da ti kanga ni (Kus. 16:23-34). Na pekoni, tongana Paul akiri asara kanga na Rome, lo “yamba na nzoni bê ala kue so aga ti bâ lo; lo yeke fa tënë ti royaume ti Nzapa na ala, lo yeke fa nga aye so andu Seigneur Jésus Christ”. (Kus. 28:30, 31). Mo nga kue mo lingbi ti fa tënë na alege kue so azi, même tongana mo yeke kamene mingi. Tongana nyen?
3 Tongana nyen ti to nda ni: Mingi ti e abâ so a yeke ngangu ti to nda ti lisoro na azo so e hinga ala pëpe. Même azo so e hinga ala, a yeke ngangu kete na e ti fa tënë na azo ni so. Me, tongana e gbu li ti e nzoni na ndo ti anzoni ye so Jéhovah asara, tâ tënë so ayeke tongana mbeni mosoro so lo mû na awakua ti lo, nga na sioni dutingo so azo ti dunia so ayeke na yâ ni, ayeke pusu e ti fa tënë ti lo (Jonas 4:11; Ps. 40:6; Mat. 13:52). Na ndo ni, e lingbi ti hunda na Jéhovah ti “zi mbeto na yâ ti bê ti e.” (1 aThes. 2:2). Mbeni ita so ague na ekole ti Guiléad atene: “Mbi bâ lakue so sambela ayeke mû maboko na mbi na ngoi so a yeke ngangu na mbi ti sara tënë na azo.” Tongana mo yeke gi ka bê ti mo ti sara tënë, sambela kete na yâ ti bê ti mo.—Néh. 2:4.
4 Tongana e yeke fa tënë na alege kue so azi a hunda pëpe ti leke atënë ni lekengo si e tene wala ti diko mbeni versê. Peut-être ye so ayeke mû maboko na e ayeke ti gi ti sara kozoni kue gi senge lisoro na zo ni, me pëpe ti gi gi ti fa tënë na lo. Awafango tënë mingi atene so sarango tongaso amû maboko na ala ti zi mbeto na bê ti ala na ti yôro na nda ni tënë ti Nzapa na yâ ti lisoro ni. Tongana zo ni aye ti sara lisoro pëpe, gbu lo na ngangu pëpe. Na mbeni lege so ane zo zia lisoro ni.
5 Na ngoi so mbeni ita-wali so ayeke kamene mingi ayeke sara gara, kozoni kue lo yeke bâ yâ ti lê ti zo so lo ye ti fa tënë na lo na lo he kete ngia. Tongana zo ni ahe nga ngia na lo, ita-wali ni atene mbeni kete tënë na lo. Tongana zo ni akiri tënë na lo nzoni, ye so amû lege na lo ti ngbâ ti sara lisoro. Lo mä zo ni nzoni na lo gi ti bâ tënë wa si anzere na zo ni, so na yâ ni lo lingbi ti yôro tënë ti Nzapa dä. Kode so asara si lo zia gbâ ti mbeti na tïtî azo, na même lo to nda ti manda Bible na mbeni zo.
6 Bi mbeni tënë na sese: Tënë wa e lingbi ti tene ti to nda ti mbeni lisoro? Tongana Jésus ayeke sara lani tënë na wali so aga ti tö ngu, lo to nda ni gi na senge hundango ngu na lo (Jean 4:7). E nga kue e lingbi peut-être ti to nda ti lisoro gi na barango zo ni na ngia na yanga wala na hundango mbeni tënë na lo. Na ngoi ti lisoro ni, mo lingbi ti bâ ndo wa si mo lingbi ti yôro tënë ti Nzapa dä na peut-être ti lu tâ tënë na yâ ti bê ti zo ni (Zo-ti. 11:6). Ambeni ita abâ so ti bi mbeni tënë na sese so apika bê ti zo ni, so apusu lo ti hinga nda ni na ti hunda tënë, a lë ka lengo. Na tapande, na ngoi so mo na ambeni zo ayeke ku docteur, mo lingbi ti to nda ti lisoro na tenengo tënë so: “Mbi yeke duti na ngia tongana mbi tï kobela encore pëpe.”
7 Ti hinga ti bâ ndo ayeke mû nga maboko na e ti to nda ti lisoro. Tongana e bâ mbeni babâ wala mama na amolenge ti lo so asara ye nzoni, e lingbi ti gonda lo na ti hunda, “Nyen la amû maboko na mo ti fa lege nzoni na amolenge ti mo?” Mbeni ita-wali ayeke dengi ka mê na atënë ti lisoro so amba ti lo ti place ti kua ayeke tene ka, na pekoni lo yeke fa na ala ambeni tënë so andu lisoro ti ala ni. Na tapande, tongana lo mä so mbeni wali na place ti kua ti lo aye ti sara mariage, ita-wali ni amû na lo mbeni Réveillez-vous! so afa tongana nyen ti leke si mariage ni atambela nzoni. Ye so asara si ala sara lisoro na ndo ti Bible mingi.
8 Mbeni lege ti to nda ti alisoro ayeke ti diko ambeti ti e na lê ti azo. Mbeni ita-koli ayeke zi ka Tour ti Ba Ndo wala Réveillez-vous! na mbeni article so li ti tënë ni ayeke gboto lê ti azo na lo diko ni na yâ ti bê ti lo. Tongana lo bâ so mbeni zo na tere ti lo ayeke bi lê na mbage ti mbeti so lo yeke diko so, ita ni ayeke hunda na lo mbeni tënë wala lo yeke tene mbeni kete tënë na ndo ti article ni. Ye so asara ka si lo to nda ti lisoro na azo na lo fa tënë na ala. Na ekole wala na place ti kua, ti zia gi ambeti ti e na ndo so azo kue alingbi ti bâ ni alingbi ti zia nzara ni na yâ ti ala na ti pusu ala ti hunda tënë na ndo ni.
9 Gi alege ti sarango lisoro: Teti so ngoi angbâ mingi pëpe na a yeke kota ye ti tene e fa tënë, a yeke nzoni e tene pëpe so alege ayeke zi ande gi na bê ti ala wani na e ti fa tënë na azo. Me a yeke nzoni e gi alege gingo ti fa tënë na azo na ngoi kue so e yeke sara akusala ti e ti lâ oko oko. Gbu li ti mo na ndo ti azo so peut-être mo yeke tingbi na ala, na bâ alege so mo lingbi ti to nda ti mbeni nzoni lisoro na ala. Zia si Bible nga na ambeni mbeti ti e aduti lakue nduru na tere ti mo, si mo lingbi ti fa ni na azo so aye ti mä mo.—1 Pi. 3:15.
10 Na sarango ye na ndara, awafango tënë mingi ahinga tongana nyen ti fa tënë na azo na alege kue so azi. Mbeni ita-wali alango na ndo so zo kirikiri alingbi ti lï dä pëpe. Tongaso na ndo so azo ti ndo ni ayeke wara ka tere dä ti sara ngia oko, lo yeke tingbi ka afoto ti apendere ye nde nde tongana akeke, abale, na ambeni tongaso. Tongana azo ni aluti na asara tënë na ndo ti pendere ti afoto ni, lo yeke mû ngoi so ti to nda ti lisoro na lo yeke fa na ala zendo so ayeke na yâ ti Bible ti “fini yayu na mbeni fini sese”. (Apoc. 21:1-4). Mo lingbi ti bâ ambeni lege nde so azi na mo ti fa tënë na azo?
11 Kiri ti bâ azo ni: Tongana mbeni zo ayeda ti mä mo, kiri mo bâ lo. Tongana lege ayeke dä, mo lingbi ti tene na lo: “Lisoro so e sara so anzere na mbi mingi. Mbi lingbi ti wara mo tongana nyen ti kiri ti sara lisoro?” Ambeni wafango tënë ayeke mû numero ti téléphone ti ala nga na iri ti ala na zo ni, na ala tene: “Lisoro ni anzere na mbi. Tongana mo ye ti wara ambeni sango na ndo ni, bâ adresse ti mbi la.” Tongana a yeke ngangu na mo ti kiri ti bâ zo ni, sû iri ti lo na lê ti kete mbeti Veuillez suivre l’intérêt (S-43) na mû ni hio na secrétaire ti congrégation ti mo, si lo lingbi ti bâ congrégation wa alingbi ti kiri ti bâ lo.
12 Ngoi so e yeke mû ti fa na tënë na azo na alege kue so azi, a yeke nzoni e zia ni na yâ ti rapport ti e. Ni la, girisa pëpe ti sû angbonga ni na mbeti, même tongana mo sara gi akete penze-ngbonga na yâ ti lango ni. Bâ ye so: Tongana lâ oko oko, awafango tënë kue, ala oko oko, afa tënë na alege kue so azi na ala teti penze-ngbonga oku, andâ ngbonga ni kue ayeke hon kutu 17 nze na nze!
13 Akota ye so apusu e biani ti fa tënë na alege kue so azi ayeke ndoye so e yeke na ni na mbage ti Nzapa nga na mbage ti amba ti e (Mat. 22:37-39). Na bango apendere sarango ye ti tere ti Jéhovah nga na aye so lo leke ti sara, bê ti e asi na singila na apusu e ti fa tënë ti “kota gloire ti royaume ti [Lo].” (Ps. 145:7, 10-12). Tâ bingo bê na amba ti e apusu e ti mû angoi kue so lege azi na e ti fa nzoni tënë na ala, so ngoi ade so (aRom. 10:13, 14). Tongana e gbu li ti e kozo na e leke tere ti e, e kue e lingbi ti fa tënë na alege kue so azi, na peut-être ti duti na ngia ti fa tâ tënë na mbeni zo so ayeda ti mä e.
[Ahundango tënë ti manda na ye]
1. (a) Fango tënë na alege kue so azi andu nyen? (b) Azo oke so aga na bungbi laso ge ahinga tâ tënë na lege ti mara ti fango tënë tongaso?
2. Tapande ti azo wa e yeke na ni na yâ ti Bible so afa lani tënë na alege kue so azi?
3. Nyen la alingbi ti mû maboko na e ti sara kamene pëpe?
4. Ye wa e lingbi ti zia kozoni na gbele e ti sara? Ngbanga ti nyen?
5. Nyen la amû maboko na mbeni ita-wali so ayeke kamene mingi ti fa tënë na alege kue so azi?
6. Tënë wa e lingbi ti tene ti to nda ti lisoro na ngoi so lege azi na e?
7. Ti hinga ti bâ ndo ayeke mû maboko na e ti fa tënë na alege kue so azi tongana nyen?
8. E lingbi ti sara tongana nyen ti to nda ti alisoro na lege ti ambeti ti e?
9, 10. (a) Nyen la e lingbi ti sara ti fa tënë na azo na alege kue so azi? (b) Mo sara ti mo ni tongana nyen?
11. Tongana mbeni zo asara nzara ti tënë ni, e lingbi ti sara nyen ti tene a kiri a bâ lo?
12. (a) A yeke nzoni e sû na mbeti angbonga so e sara nga e zia ni na yâ ti rapport ti e. Ngbanga ti nyen? (b) Aye ti nzoni wa aita awara tongana ala fa tënë na alege kue so azi na ala? (Bâ encadré “Fango tënë na alege kue so azi alë lengo!”)
13. A yeke nzoni aye wa la apusu e ti fa tënë na alege kue so azi?
[Kete tënë na lembeti 4]
Peut-être ye so ayeke mû maboko na e ayeke ti gi ti sara kozoni kue gi senge lisoro na zo ni
[Kete tënë na lembeti 5]
Na sarango ye na ndara, awafango tënë mingi ahinga tongana nyen ti fa tënë na azo na alege kue so azi
[Encadré na lembeti 5]
Awango ti to nda ti lisoro
◼ Sambela Jéhovah ti to nda ti lisoro
◼ Sara tënë na azo so akpa anzoni zo na so ayeke na ngoi ti mä mo
◼ Bâ yâ ti lê ti lo, he kete ngia nga sara tënë na ndo ti mbeni ye so agbu bê ti ala use kue
◼ Mä azo nzoni
[Encadré na lembeti 6]
Fango tënë na alege kue so azi alë lengo!
• Mbeni ita-koli ague na garage ti tene a lekere kutukutu ti lo. Na ngoi so lo yeke ku, lo fa tënë na azo na tere ti lo nga lo mû na ala atract so atisa azo ti ga ti mä diskur na congrégation. Ngu oko na pekoni, na mbeni kota bungbi, mbeni ita aga abara lo na ngia, me lo hinga lê ti lo pëpe. Ita ni so ayeke mbeni oko ti akoli so lo mû lani tract na ala so! Koli ni so ague lani amä diskur ni na lo hunda ti tene a manda Bible na lo. Fadeso lo na wali ti lo kue la awara batême.
• Mbeni ita-wali so ayeke na amolenge ota ahinga tâ tënë ngbanga ti so a fa lani tënë na lo na alege kue so azi. Ti lo, territoire ni ayeke azo so amolenge ti lo ayeke sara si lo na ala ayeke tingbi. Territoire ti lo ayeke avoizin nga na ababâ na amama so lo yeke tingbi ala na ekole nga na ngoi so aparent d’élève asara bungbi ti ala. Na ngoi so lo yeke fa tere ti lo na amba ti lo, lo tene gi mbeni nduru tënë so alondo na gbe ti bê ti lo, lo fa so Bible la amû maboko na lo mingi ti bata amolenge ti lo, na pekoni lo gue na mbeni tënë nde. Me teti so lo bi tënë so na sese awe, lo bâ so a yeke ngangu na lo oko pëpe ti sara lisoro na azo na ndo ti Bible na pekoni. Kode so asara si lo mû maboko na azo 12 ti wara batême.
• Na ngoi so mbeni koli so asara kua na ndokua ti assurance aga na yanga-da ti mbeni ita-wali, ita ni afa tënë na lo. Lo hunda na koli ni wala lo ye ti wara mbeni assurance so ayeke bata seni ti lo nzoni, ayeke sara si lo duti na ngia nga lo duti na fini lakue lakue. Koli ni ayeda, na lo hunda na ita ni assurance wa la lo yeke sara tënë ni so? Ita ni afa na lo zendo so ayeke na yâ ti Bible na lo mû na lo ambeti ti e, na koli ni adiko ni na bï ni kue. Lo yeda ti manda Bible, lo gue na abungbi nga lo wara batême na pekoni.
• Na yâ ti avion, mbeni ita-wali ato nda ti mbeni lisoro na mbeni wali so aduti na tere ti lo na lo fa tënë na lo. Tongana avion ni atï na sese awe, ita ni amû adresse ti lo nga na iri ti lo na wali ni. Lo tene nga na lo so ti peko tongana lo tingbi na aTémoin ti Jéhovah a yeke nzoni lo hunda ti manda Bible. Na ndade ni, aTémoin use asi na yanga-da ti wali so. Wali ni ayeda ti manda Bible, lo gue na li ni hio, lo wara batême, na kete na pekoni lo wara a-étude ota.
• Mbeni ita-koli ti ngu 100 ayeke lango na ndo so a yeke bata ambakoro dä. Lê ti lo akanga kue na lo yeke tene ka, “E yeke na bezoin ti Royaume.” Tënë ti lo ni apusu awanganga nga na ambeni mbakoro ti hunda tënë na lo, na lo fa nda ti Royaume na ala. Mbeni wali so asara kua kâ ahunda lo ti fa ye so lo yeke sara ande na yâ ti Paradis. Ita ni atene: “Mbi yeke kiri ti bâ ndo, mbi yeke kiri ti tambela na mbi yeke gbi chaise ti mbi ni.” Ndali ti so lo bâ ndo pëpe, lo hunda na wali ni ti diko apériodique na lo. Tongana molenge ti ita ni ti wali aga ti bâ babâ ti lo, wali ni ahunda na lo wala ni lingbi ti mû ambeti ni ti gue na ni na yanga-da. Mbeni wanganga ni atene na molenge ni: “Fini tënë ni ge fadeso ayeke, ‘E yeke na bezoin ti Royaume.’”
• Mbeni ita-wali akpo molongo na yâ ti mbeni restaurant, na lo mä tënë so ambeni mbakoro-koli so aduti ayo na lo pëpe ayeke tene na popo ti ala, ala yeke sara tënë na ndo ti poroso. Mbeni oko ti ala atene so ngorogbia alingbi ti leke akpale ti e pëpe. Ita ni atene na bê ti lo, ‘Lege la azi na mbi so.’ Lo sambela Jéhovah hio na lo gue na mbage ti akoli ni. Tongana lo fa iri ti lo na ala awe, lo sara tënë ti mbeni ngorogbia so ayeke leke akpale ti azo. A yeke Royaume ti Nzapa. Lo fa nga na ala mbeni brochure so lo yeke na ni na tere ti lo. Mo ye ti bâ, patron ni aga. Ti ita ni, lo ga ti tomba ni la. Me, patron ni atene na lo so ni mä lo fade, na ni kue ni ye ti wara brochure ni. Mbeni wali so asara kua na yâ ti restaurant ni ayeke mä nga lo fade na ngu ti lê ti lo ayuru. Lo nga kue lo pusu nduru na ita ni. Lo manda ândö Bible na lo ye si a kiri a sara na lo étude.