E yeke manda ande buku Ga ndulu na Jéhovah nga na abrochure ota na ngoi ti Mandango Buku ti Kongregation
1 Ti londo na nze ti janvier 2007 ti si na juillet 2008, e yeke manda ande abrochure ota so ge na ngoi ti Mandango Buku ti Kongregation: Lege ti fini ti lakue lakue: Mo wara ni awe?, A-Témoin ti Jéhovah: Ala yeke azo wa? na Ayingo ti akua. E yeke manda nga ande buku Ga ndulu na Jéhovah. Abrochure so ayeke mû ande na e anzoni kode so alingbi ti mû maboko na e na fango tënë. A yeke mû nga maboko mingi na afini zo ti gbu nda ti aye so Bible afa nga ti bâ nene ti zia lege ti asarango ye ti wataka nga na ti ayingo sioni.
2 Na nze ti mai 2007, e yeke to nda ti manda buku Ga ndulu na Jéhovah. Nyen la ayeke mû maboko na e ti wara aye ti nzoni na lege ti mandango buku so? Lekengo tere ayeke kota ye. E yeke mû ande yenga use ti manda chapitre oko oko, nga a leke ti manda gi mbeni kete wungo ti aparagraphe yenga oko oko. Ye so ayeke mû lege ande na mo ti wara ngoi mingi ti mû akiringo tënë so alondo na bê na so aluti na ndo mandango ye ti mo nga na gbungo li ti mo na ndo tënë ni. Na ndo ni, na yâ ti ayenga so a yeke sara dango bê na ndo ndangba mbage ti mbeni chapitre, e yeke manda ande gi mbeni kete wungo ti aparagraphe. Na lege so, e yeke wara ngoi ti sara kusala na mbeni mbilimbili mbage ti buku ni.
3 A to nda ni na chapitre 2, nduru na hunzingo ti chapitre oko oko, e yeke wara mbeni encadré so li ti tënë ni ayeke: “Atënë ti gbu li dä”. Na peko ti mandango ndangba paragraphe ti chapitre ni, surveillant ti mandango buku ni ayeke sara ande lisoro na ndo encadré ni na azo so aga. Lo yeke pusu ande azo ni ti fa atënë ti bê ti ala na ndo aye ti nzoni so ala wara na lege ti gbungo li ti ala na ndo aversê (aProv. 20:5). Na ndo ahundango tënë so a zia na yâ ti encadré ni, lo lingbi ngoi na ngoi ti hunda ambeni tënë tongana: “Atënë so afa nyen na mo na ndo Jéhovah? A ndu fini ti mo tongana nyen? Tongana nyen mo lingbi ti sara kusala na atënë so ti mû maboko na ambeni zo?” Ye so lo yeke gi ayeke ti pusu azo ni ti sigigi na akiringo tënë so alondo na bê ti ala, me pëpe ti hunda gbâ ti atënë na ndo anzene nzene tënë so ayeke kota ye pëpe.
4 Ga ndulu na Jéhovah ayeke mbeni buku so ayeke nde mingi. Atâa so ambeti kue ti “ngbâa be-ta-zo na ti ndara” ayeke mû gloire na Jéhovah, nda ti buku so ayeke ti lo ti sara tënë na ndo asarango ye ti Jéhovah (Mat. 24:45-47, NW ). So tâ mbeni pendere ye si ayeke ku e! E yeke wara ande ye ti nzoni mingi na lege ti mbeni mandango ye so alï mingi na ndo asarango ye ti Jéhovah. Zia mandango ye ni amû maboko na e ti ga nduru mingi na Babâ ti e ti yayu, na zia e ga azo so alingbi biani ti mû maboko nzoni na amba ti ala ti sara legeoko tongaso.