E fa tënë na mbeto pëpe nga e sara ye na siriri
1 Azo mingi so e yeke fa tënë na ala ayeke mä na bê ngangu na aye so ague nde na Bible. Atâa so a lingbi e fa tënë na mbeto pëpe, e ye nga ti “duti na siriri na azo kue” na ti so bê ti ala senge senge pëpe (aRom. 12:18; Kus. 4:29). Tongana nyen e lingbi ti fa nzo tënë ti Royaume na mbeto pëpe nga na yâ ti siriri?
2 E gi ambeni tënë so e na azo ni e lingbi ti mä tere dä: Zo so aye siriri, lo yeke kpe ti papa na azo. Tongana na fango tënë e ke senge senge atënë so zo ni amä na bê dä ngangu, ye so alingbi ti sara si lo ke ti mä e. Tongana lo tene mbeni tënë so ayeke na lege ni pëpe, e lingbi peut-être na kode ti sara tënë na ndo ti mbeni ye so e na lo e lingbi ti mä tere dä. Ye so ayeke mû lege na e ti zi asioni bibe so ayeke na yâ ti li ti lo nga ti ndu bê ti lo.
3 Ka tongana zo ni atënë mbeni tënë so ayeke na lege ni pëpe si e zi yanga na ndo ni pëpe, a ye ti fa so e yeda na tënë ti lo la? Oko pëpe. E awafango tënë, kungba ti e ayeke ti fa nzo tënë ti Royaume ti Nzapa, me pëpe ti ke atënë kue so ayeke na lege ni pëpe (Mat. 24:14). Ahon ti tene e gi lakue ti leke yâ ti atënë ti zo ni so ayeke na lege ni pëpe, e lingbi ti bâ ni tongana mbeni lege so azi na e ti hinga ye so ayeke na yâ ti li ti lo.—aProv. 16:23.
4 E ne azo ni: Na ambeni ngoi, a lingbi e ke na mbeto pëpe afango ye so ayeke na lege ni pëpe. Ye oko, teti so e ye ti duti na siriri na azo, e yeke zia pëpe asioni iri na ndo ti azo so ayeke mä na bê na atënë ti wataka wala so ayeke fa ni, nga e yeke he ala pëpe. Ti bâ tere ti e so e hinga Bible mingi ayeke tomba azo na tere ti e. Me, tongana e sara ye na tâ be-ti-molenge nga na nzoni bê, azo so aye tâ tënë ayeke duti ande nduru ti mä e. Ti yekia azo so e yeke fa tënë na ala nga ti bâ atënë ti mabe ti ala na nene ni ayeke fa na ala so e ne ala. Ye so ayeke pusu ande ala ti yeda na tënë ti e.
5 Bazengele Paul ayeke bâ lani na nene ni atënë ti mabe ti azo so lo yeke fa tënë na ala. Lo yeke gi nga lani ti fa nzo tënë na mbeni lege so andu bê ti ala (Kus. 17:22-31). Na bê ti lo kue, lo ga ‘ye kue na popo ti azo kue, si na lege ti ye so kue, lo lingbi sö ambeni zo.’ (1 aCor. 9:22). E nga kue e lingbi ti sara tongaso na dutingo na siriri na azo na ngoi so e yeke fa nzo tënë na mbeto pëpe.