Fini kapa ti kota bungbi ti circonscription

Azo ti sese so aye si e bâ so aye ti sese ti laso ayeke hunzi lâ oko pëpe. Ye oko, Bible afa na e so aye so ayeke hunzi biani mbeni lâ (1 Jean 2:15-17). Bible amû maboko na e ti bâ so ‘ti bungbi mosoro na sese so’ ayeke senge senge. Ti tene awakua ti Nzapa akpengba, fade kota bungbi ti circonscription ti ngu ti kusala 2007 ayeke zi nda ti kota li ti tënë: ‘Bungbi mosoro ti mo na yayu.’​—Mat. 6:19, 20.

A-Ephésien 2:2 asara tënë ti mbeni “yingo so ayeke sara na yâ amolenge ti azo so ake tënë.” Versê so andu nga azo so ayeke bi bê mingi ti wara mosoro. Legeoko tongana pupu so ayeke ya na ndo kue, na so azo kue ayeke wu ni, “yingo ti sese so” amû ndo kue (1 aCor. 2:12). Teti so a yeke sara ngangu mingi, a iri ni “angangu ti nduzu”. Fini kapa ti kota bungbi ti circonscription so ayeke mû ande maboko na e ti kpe bibe ti warango mosoro so azo ti sese ayeke na ni na ti bâ lakue ye so ayeke kota ye (Mat. 6:33). Na ndo ni, kapa so ayeke mû maboko na e ti zia bê ti e kue na Jéhovah na ngoi so e yeke sara kusala so lo mû na e atâa akpale na atara so e yeke wara ni.

Duti dä na yâ ti alango ni use kue nga “bata nzoni ahon”, wala dengi mê nzoni (aHéb. 2:1). Sû anduru tënë so mo lingbi ti sara na kusala na yâ ti fini ti mo nga na fango tënë. Tongana mo gue na yâ ti alango use ni kue, fade a yeke kpengba mo ti ngbâ ti ‘bungbi mosoro ti mo na yayu’.