Fini kapa ti kota bungbi ti lango oko

Yingo vulu ti Nzapa amû ngangu na akozo Chrétien si ala fa nzo tënë na ngangu ti ala kue juska na nda ti sese kue (Kus. 1:8; aCol. 1:23). Fade kota bungbi ti lango oko ti ngu ti kusala 2007 so kota li ti tënë ni ayeke: “ ‘Mû ngoi ti mo kue’ na tënë ni”, ayeke mû ande maboko na e ti mû nzoni tapande ti ala.​—Kus. 18:5.

Tongana lo yeke sara tënë na ndo tënë ti Nzapa, Gbia David atene: “Tënë ti témoin ti L’Eternel ayeke tâ tënë, a sara si zo so li ti lo ayeke dä pëpe aga zo ti ndara.” (Ps. 19:8). Kapa ti kota bungbi ti lango oko so a leke ni nzoni ayeke luti ande na ndo ngangu so Bible ayeke na ni ti “kiri zo na lege ni”, na a yeke wa e ti sara kusala na Mbeti ti Nzapa ti fa tënë nga ti fa ye tongana azo so abâ nene ti sara ye hio (2 Tim. 3:16, 17). Fini kapa so ayeke fa ande na e tongana nyen ti kpe agbanda na ti wara nzoni tongana e sara ye alingbi na akpengba-ndia ti Bible na yâ fini ti e lâ oko oko. A yeke fa nga na e tongana nyen ti sara kusala na Bible ti mû maboko na amaseka nga na afini zo si ala gue na li ni na lege ti yingo.

Duti dä na ngoi so kapa ni ayeke to nda ni nga dengi mê nzoni. Sû na mbeti aye so mo ye ti sara kusala na ni na yâ fini ti mo. Fa bê ti kiri singila teti awango na atënë ti dango bê so mo wara nga gbu li na ndo lege so mo lingbi ti sara ye alingbi na aye so mo manda.

Kapa ti kota bungbi ti lango oko so ayeke pusu ande e ti kiri ti bâ Mbeti ti Nzapa na nene ni, ayeke dabe e ti ngbâ ti fa nzo tënë ti Royaume na wâ nga a yeke fa na e tongana nyen ti mû maboko na ambeni zo ti sara legeoko. Tongaso, leke na bê ti mo ti duti dä ti wara fango lege ti Jéhovah na anzoni wango kue so lo mû na lege ti kapa so!—​Es. 30:20b, 21.