Mbage gumbaya ni: Salango a-étude so ayeke gue na li ni
Lekengo ala ti fa tënë na alege kue so azi
1 Na ngoi so André na Philippe ahinga so Jésus ayeke lani Messie ti zendo ni, ala lingbi pëpe ti gbanzi tele ti ala ti sala tënë ti pendere sango so na ambeni zo (Jean 1:40-45). Legeoko nga laso, tongana azo so ayeke manda Bible ato nda ti fa na gigi mabe na yâ ye so ala yeke manda, ye so ayeke pusu ala ti sala tënë ni (2 aCor. 4:13). Tongana nyen e lingbi ti mû wâ na ala ti fa tënë na lege kue so azi na ti leke tele ti ala ti sala ni nzoni?
2 Mo lingbi ti hunda gi senge na wamandango ye ni ti hinga wala lo sala awe tënë ti ye so lo yeke manda ni na yâ ti Bible na ambeni zo. Peut-être lo yeke na ambeni kamarade nga ambeni sewa so lo lingbi ti tisa ala ti ga ti duti na yâ ti étude ni. Hunda lo wala ambeni mba ti lo ti kua, akamarade ti lo ti ekole wala ambeni zo so lo hinga ala afa na gigi nzara ti mä nzo tënë. Na salango tongaso lo lingbi ti to nda ti fa tënë. Mû maboko na lo ti hinga nene ti bango yâ ti ye nzoni, ti sala ye na yekiango ndo nga na be-nzoni na ngoi so lo yeke sala tënë na amba ti lo na ndo Jéhovah nga na ndo aye so Lo leke ti sala.—aCol. 4:6; 2 Tim. 2:24, 25.
3 Fango tënë ti mabe ti ala: A yeke kota ye mingi ti fa lege na awamandango Bible ti sala kusala na Mbeti ti Nzapa na ngoi so ala yeke fa tënë ti mabe ti ala. Na ambeni ngoi so mo soro ni nzoni, hunda wamandango ye ni: “Tongana nyen mo lingbi ti sala kusala na Bible ti fa tâ tënë so na azo ti sewa ti mo? Wala versê wa ti Bible mo yeke sala kusala na ni ti fa ye ni na akamarade ti mo?” Bâ lege so lo yeke kiri tënë na ni, na fa na lo tongana nyen ti sala si afango ye ti lo aluti na ndo ti Bible (2 Tim. 2:15). Na salango tongaso, mo yeke leke wamandango ye ni ti mû alege kue so azi na lo ti fa tënë, nga mo yeke leke lo ti tene lo lingbi kue teti fango tënë legeoko na kongregation.
4 A yeke na lege ti ndara ti leke kozoni awamandango Bible ti luti na gbele kengo ndo (Mat. 10:36; Luc 8:13; 2 Tim. 3:12). Tongana ambeni zo ahunda atënë wala asala ambeni tënë na ndo ti aTémoin ti Jéhovah, ye so alingbi ti zi lege na awamandango Bible ti fa tënë. Brochure A-Témoin ti Jéhovah: Ala Yeke Azo Wa? Ala Mä na Bê na Nyen? alingbi ti leke ala “ti kiri tënë lakue na azo kue”. (1 Pi. 3:15). A yeke wara na yâ ti brochure ni atâ sango so afini zo alingbi ti sala kusala na ni ti mû maboko na akamarade nga na azo ti sewa ti ala, so na nzoni bibe aye pëpe ti tene ala manda Bible, ti gbu nda ti atënë ti mabe ti e nga na asalango ye ti e so gere ni alondo na yâ ti Bible.