Lâ ti Jéhovah aga ndulu
1 A-Chrétien ayeke ku kungo singo ti lâ ti Jéhovah, so na lege ni lo yeke futi ande aye ti sese ti fadeso na lo yeke zia na place ni mbeni fini sese ti mbilimbili (2 Pi. 3:12, 13). Teti so e hinga pëpe tâ ngoi ti singo ti lâ ni so, a lingbi e zia lê ti e angbâ na zingo ni na e mû maboko na amba ti e ti sala tongaso (Ezéch. 33:7-9; Mat. 24:42-44). Fade gbungo li na ndo prophétie ti Mbeti ti Nzapa ayeke mû ngangu na e ti hinga biani na bê ti e so “kota lâ ti L’Eternel aga ndulu”.—Soph. 1:14.
2 Agbia so aga na peko ti tele: Tongana ti so a sû ni na Apocalypse 17:9-11, bazengele Jean afa tënë ti “agbia mbasambala” so aduti fä ti angangu ti komande mbasambala so ayeke ga na peko ti tele. Jean asala nga tënë ti gbia “miombe ni” so aduti laso fä ti Bendo ti Gigi. E yeke ku ti tene ambeni ngangu ti komande nde abâ gigi na pekoni? Oko pëpe. Prophétie ni atene so lo gbia miombe ni so lo yeke ‘gue na futingo’, nga a sala pëpe tënë ti ambeni gbia nde so ayeke ga ande na peko ti lo. Prophétie so amû biani maboko na mo ti bâ so e lï mingi na yâ ti ngoi ni so?
3 Daniel 2:31-45 amû maboko na e ti hinga ngoi ti gango ti lâ ti Jéhovah. Na yâ ti prophétie ni so, kota yanda so Gbia Nebucadnetsar abâ ni na suma aduti fä ti angangu ti komande sese so ayeke ga na peko ti tele. Angangu ti komande so oko oko kue abâ gigi awe. Me lo so wa si ayeke komande laso? A yeke lo so si agere ti yanda ni aduti fä ni. Prophétie ni afa na e polele ye so ayeke si ande na pekoni. Fade a yeke futi biaku biaku ngangu ti komande ti azo, na a yeke zia lege na mbeni ‘royaume so ayeke futi lâ oko pëpe’. Mo lingbi ti bâ na lege wa ye so afa biani so lâ ti Jéhovah ayeke ndulu?
4 Ambeni ye so afa ni: E yeke azo so abâ na lê ti ala ambeni ye so afa so lâ ti Jéhovah aga ndulu. E bâ gango tâ tënë ti ye so bazengele Paul asala giriri tënë ni na ndo tënë ti salango ye ti azo “na lâ ti nda ni”. (2 Tim. 3:1-5). E yeke mû mbage na yâ kusala ti fango tënë na ndo lê sese mobimba, so a lingbi a fa kozoni si nda ni aga (Mat. 24:14). Zia kusala ti e ti fango tënë angbâ ti fa na gigi so tokua ti ange ni ahunda na e ti sala ye hio: “I kpe mbito ti Nzapa, i mû gloire na Lo, teti l’heure ti Lo ti fâ ngbanga asi awe.”—Apoc. 14:6, 7.