I amaseka, zia i diko Tënë ti Nzapa!
1 Lâ ti pendere ayeke ngoi ti kpale na ti mungo angangu desizion. Lâ na lâ, a yeke sala ngangu na ndo mingi ti i amaseka ti doro andia ti Nzapa so andu nzoni tambela. Kozo ti tene i mû adesizion na ndo mandango mbeti, gingo kua nga na salango mariage, a lingbi i zia aye ti yingo na gbele i. A yeke gi na lege so si i lingbi ti mû ambeni desizion so ayeke sala nzoni ande na tanga ti fini ti i. Ambilimbili ye ti yingo so i zia na gbele i ayeke mû maboko ande na i ti sala ye na ndara na ayeke sala si lege ti i aga nzoni. Na dikongo Tënë ti Nzapa nga na gbungo li na ndo ni lakue, fade ye so ayeke pusu i ti duti na fini alingbi na wango so a mû na gbe ti yingo ti Nzapa. Nga, angangu so i sala na lege ni ayeke ga ande nzoni.—Jos. 1:8; Ps. 1:2, 3.
2 A yeke ga na i nzoni tongana nyen? Sese ti Satan asi singo na aye so ayeke pusu zo ti sala sioni (1 Jean 2:15, 16). I hinga peut-être ambeni kamarade ti i ti ekole wala ambeni maseka tongana i so awara vundu teti so ala tï na gbe ti ngangu so a sala na ndo ala. Batango wango ti Bible ayeke mû na i ande ngangu na lege ti yingo ti bata nzoni salango ye si i kpe lege ti siokpari. Na ndo ni, wango ti Tënë ti Nzapa alingbi ti mû maboko na i ti kpe agbanda ti Satan so lo zia na mayele (2 aCor. 2:11; aHéb. 5:14). Ti tambela alingbi na ye so Nzapa afa ayeke ga ande na i tâ ngia: nzerengo bê na yâ fini ti i.—Ps. 119:1, 9, 11.
3 Akpengba-ndia ti Tënë ti Nzapa so ayeke gbian lâ oko pëpe ahon ndara ti azo (Ps. 119:98-100). Ti hinga akpengba-ndia ti Bible nzoni nga ti gbu li na ndo aye so Jéhovah aleke ti sala, so lo fa ni, legeoko na sambela so alondo na bê, alingbi ti mû maboko na i ti leke mbeni kpengba songo na Mveni ti Bible so ayeke na ndara mingi, Jéhovah Nzapa. Lo mû zendo so: “Fade Mbi wa mo, na Mbi fa na mo lege so a lingbi mo tambela dä; fade Mbi wa mo, na lê ti Mbi angbâ na ndo mo.”—Ps. 32:8.
4 Zia mbeni ngoi nde ti diko ni: Mbeni maseka-wali Chrétien azia lani na gbele lo ti diko Bible kue, na lo hunzi ni na yâ ti ngu oko. Nzoni wa lo wara dä? Lo tene: “Mbi manda ye mingi na ndo Jéhovah, aye so aga na mbi ndulu mingi na lo na asala si mbi ye ti kpe mbito ti lo teti tanga ti fini ti mbi kue.” (Jacq. 4:8). I diko Bible kue awe? Tongana ade, ngbanga ti nyen ti leke pëpe ti sala tongaso? Fade Jéhovah ayeke hiri deba nzoni na ndo ngangu so i yeke sala, na fade i yeke wara futa mingi.