E mû na Jéhovah ye ti e ti nzoni kue
1 Ndia so Jéhovah amû na Israël atene so a lingbi anyama so a mû na Lo na sandaga aduti “nzoni kue”. Lo yeda pëpe na mbeni nyama so ayeke na sioye na tele ti lo (Lév. 22:18-20; Mal. 1:6-9). Na mbage, tongana a mû mbeni sandaga, mafuta ni kue (mbage ti nyama ni so ayeke nzoni ahon atanga ni kue) ayeke lani ti Jéhovah (Lév. 3:14-16). Teti Jéhovah ayeke Babâ nga na Mveni ti Israël, lo lingbi na ye so ayeke nzoni kue.
2 Legeoko tongana ngoi ti giriri, Nzapa abi bê mingi na ndo nzoni ti aye so e yeke mû laso. A lingbi kusala ti e afa na gigi mbilimbili kota kpengo mbito teti Jéhovah. Biani, dutingo ti azo ayeke nde nde. Ye oko, e yeke na nzoni nda ti tënë ti bâ bê ti e mbilimbili ti hinga wala e yeke mû na lo ye ti e ti nzoni kue.—aEph. 5:10.
3 Kusala so a sala na bê kue: Ti tene fango tënë ti e amû gonda na Jéhovah na andu bê ti azo so ayeke mä e, a lingbi e sala ni gi tongaso pëpe. A lingbi atënë so e yeke tene na ndo Nzapa ti e nga na ndo pendere ye so lo leke ti sala alondo na bê ti e so asi singo na singila (Ps. 145:7). Ye so agboto lê na ndo nene ti ngbâ ti bata mbeni nzoni programme ti dikongo ye na ti mandango ye e mveni.—aProv. 15:28.
4 Mungo na Jéhovah ye ti e ti nzoni kue andu hakango peko ti ndoye ti lo teti azo (aEph. 5:1, 2). Ndoye teti azo ayeke pusu e ande ti gi ti gue na tâ tënë na azo kue so e lingbi ti ndu ala (Marc 6:34). A yeke pusu e ti fa so e yeke bi bê biani na azo so e yeke sala tënë na ala, ti bata ala lakue na li ti e na pekoni so e tingbi na ala ti kozoni nga ti kiri ti bâ ala. A yeke gue na e ti sala ye kue so e lingbi ti sala ti mû maboko na ala ti gue na li ni na lege ti yingo.—Kus. 20:24; 26:28, 29.
5 “Sacrifice ti merci” wala ti sepela: Mbeni lege nde ti mû na Jéhovah ye ti e ti nzoni kue ayeke na fango tënë na bê oko. Tongana e leke tele ti e nzoni na e zia lê ti e kue na ndo kusala so ayeke na gbele e, e lingbi ti sala ye ti nzoni mingi na yâ ngoi so angbâ na e (1 Tim. 4:10). Lekengo tele nzoni ayeke mû lege na e ti sala tënë polele nga na mabe, na tongaso e yeke sala si azo alingbi hio ti yeda na tënë ni (aProv. 16:21). Na ngoi so e yeke fa nzo tënë na azo, a lingbi tâ na lege ni ti hiri atënë ti bê ti e “sacrifice ti merci” wala ti sepela.—aHéb. 13:15.