“Tongana nyen Ala Lingbi ti Mä?”
1 Jésus atënë lani na ngangu: “A lingbi a fa Tene-nzoni na amara kue kozoni.” (Marc 13:10) Atâa angangu so e yeke sala na bê kue, azo kutu ngbangbo mingi ade amä tënë ti témoin ala mveni pëpe. Ambeni ngorogbia akanga lege na kusala ti e. Akodoro mingi ayeke na wungo ti azo so ayeke gue na li ni na loro. Tongaso, “tongana nyen ala lingbi ti mä?”—aRom. 10:14, NW.
2 Zia Bê Kue na Jéhovah: A lingbi e dabe ti e so Jéhovah ahinga dutingo ti bê ti azo kue. Atâa dutingo ti lo ayeke tongana nyen, tongana mbeni zo agi na bê ti lo kue ti hinga tâ tënë na ndo ti Nzapa, fade lo yeke wara ni.—1 Chron. 28:9.
3 Bê ti Abraham agi lo lani na ndo azo ti Sodome na Gomorrhe. Ye oko, Nzapa adë bê ti lo so a lingbi pëpe ti futi Sodome atâa tongana a wara gi azo ti mbilimbili bale oko dä. (Gen. 18:20, 23, 25, 32) Jéhovah afuti lâ oko pëpe zo ti mbilimbili legeoko na zo ti sioni, ye so Lo fa lani tongana Lo sö Lot na amolenge ti lo ti wali.—2 Pi. 2:6-9.
4 Mbeni lâ, Éliya abi bê so lo yeke gi lo oko na salango kusala ti tâ Nzapa. Ye oko, Jéhovah adë bê ti lo so lo yeke biani pëpe gi lo oko, nga a yeke hunzi kua so lo to nda ti sala. (1 aGbia 19:14-18) Ye ni ayeke tongana nyen na ngoi ti e?
5 E Duti na Ye Mingi ti Sala na yâ Kusala ti Nzapa: E hinga pëpe juska na ndo wa a yeke ngbâ ti sala kusala ti fango tënë. Jéhovah ayeke na gunda ti kua ni, nga Lo yeke sala kusala na a-ange ti bata ni. (Apoc. 14:6, 7) Lo yeke gi lo oko so alingbi ti fa juska na ndo wa a lingbi a fa tënë na amara kue. Tongana Jéhovah ayeda, lo lingbi ti bâ wala a kangbi tokua ti Royaume na alege so e lingbi pëpe ti bi bê dä, si azo mingi ahon alingbi “mä Tene-nzoni . . . ala mä na bê.” (Kus. 15:7) Ye so Jéhovah asala ayeke gue ande kue legeoko na mara ti zo wa lo yeke, Nzapa ti ndoye, ti ndara, nga ti mbilimbili.
6 A yeke matabisi teti e ti sala kusala legeoko na ye so bê ti Jéhovah aye, na salango kue ti mû lege na zo oko oko ti mä nzo tënë.—1 aCor. 9:16.