E Zia Royaume Kozoni
1 A yeke ngangu ti zia Royaume ti Nzapa kozoni na yâ fini, na ti ngbâ ti sala tongaso tongana akpale ti konomi nga na ambeni kpale nde asi na e. Tongana nyen e yeke zia Royaume kozoni tongana akpale alondo? Ye ni ayeke tongana nyen tongana a mû na e mbeni kusala ti mitele so ahunda na e ti manke abungbi wala akanga lege na fango tënë ti e? Tongaso a lingbi a zia Royaume aga na peko na yâ fini?
2 A Hunda Mabe So Akpengba: Tongana a tara mabe ti e na yâ amara ti adutingo tongaso, a lingbi e glisa pëpe zendo ti Jéhovah, nga tënë so Jésus atene fade Nzapa ayeke mû maboko tongana e gi Royaume kozoni. (Ps. 37:25; Mat. 6:31-34) Angangu nga na akpale ti sese so alingbi ti vuko bango ndo ti e na akanga lege na e ti zia Royaume na kozo ndo. Azo mingi ayeke zia abeku ti dutingo kota zo na ndo ti kusala wala ti wara nginza ti ga kota ye na yâ fini. Ye oko, tongana Paul, a lingbi e bâ na lege ni aye so ayeke biani kota ye na yâ fini.—aPhil. 3:7, 8.
3 A Hunda ti Gbian Aye? Mbeni ita-wali atene lani: “Mbi zia bê ti mbi mingi na ndo ti dengo buze ti mbi; a yeke lani ye so mbi ndoye ni mingi ahon. Mbi bâ so mbi lingbi ti ngbâ lakue Témoin ti Jéhovah atâa so mbi mû mingi ti angoi ti mbi na akusala ti dengo buze.” Ye oko, mbeni ye ayeke tene na lo lakue so lo lingbi ti sala na Jéhovah mingi ahon. Na nda ni, lo zia lege ti kusala ti dengo buze so akanga lani lege na guengo na li ni ti lo na lege ti yingo. Tongana lo mû tele ti lo mveni kue teti kusala ti Royaume awe, lo lingbi ti tene: “Fadeso, mbi bâ so fini ti mbi ayeke nzoni na lê ti Jéhovah, ye so ayeke biani kota ye.”
4 Ye ti nzoni ayeke so, azo mingi azia kusala ti mitele na abeku ti wara amosoro mingi ahon, ala zia ye mingi pëpe na yâ fini ti ala ti mû kusala ti ngoi kue. Apendere, aserviteur ti mungo maboko na a-ancien so ayeke kumbamba, so asala Ekole ti Formation Ministérielle, asala tongaso, na ala yeke wara anzoni matabisi ti kusala. Na mandango pendere tapande ti Paul, ala yeke na tâ ngia na yâ aye ti mitele so a hunda.—1 aCor. 11:1; 1 Tim. 6:6-8; aHéb. 13:5.
5 Atâa so sese abâ bango ndo ti e na ndo fini tongana mbeni ye ti he, e yeke na deba nzoni ti Jéhovah. (1 aCor. 1:26-31) A yeke duti ye ti mungo maboko pëpe ti hinga so tongana lege ayeke dä, fade lo yeke sala kusala na e mingi ahon nga lo yeke mû maboko na e ti sala kusala ti lo? Alege so e yeke na ni laso ti fa tënë ti Royaume ti Nzapa, so a leke gere ni awe, ayeke kiri ti duti dä mbeni lâ oko pëpe. Tongaso, a yeke fadeso ngoi ti zia Royaume na kozo ndo na yâ fini ti e.