Mo lingbi ti sara ye mingi ahon ti kozo ti fa tënë na azo?

A fa mbeni pendere film so mo mä go ti azo ni dä ape. Film ni anzere mingi na azo so abâ ni, iri ni ayeke na yanga ti anglais (A Trip Down Market Street). Na yâ ti film ni, a fa ye so azo ti San Francisco, na États-Unis, ayeke sara ka lâ oko oko na tongo nda ti angu 1900. Azo ti sarango film ni amû lani caméra ti ala so mbeni ye ayeke na tere ni so ala yeke turnê ni ti filmé na azo; ala zia ni na ndo ti hôn ti mbeni oto na ala hon na ni na ndo ti kota lege so azo ayeke hon dä mingi na ala yeke filmé na azo na yâ ti akua ti ala. Na yâ ti film ni, mo yeke bâ acharette nga na akozo oto ti giriri, azo ti vongo ye nga na amolenge ti kango ambeti-sango so ayeke sara akusala ti ala.

Ye so asara si film ni amû vundu mingi na azo ayeke so na ngoi so a sara film ni lani na avril ngu 1906, azo ahinga pëpe so ngoi kete na pekoni na lango 18 ti avril ni sese ayeke yengi na ndo ni so na wâ ayeke gbi ndo ni si azo saki mingi ayeke kui na kota mbage ti gbata ni ayeke buba. Peut-être ambeni zo so ala filmé ala so ahinga lani ape so na yâ ti kete lango ala yeke kui. Scott Miles, âta ti mbeni zo so asara film ni, atene: “Mbi bâ gi azo ni na yâ ti film ni andâ ala hinga ape ye so ayeke si na ala. A yeke mbeni ye ti mawa.”

E lingbi ti haka dutingo ti azo so ayeke na yâ ti film so na ti azo laso. E nga kue e bâ amba ti e mawa ti ala asara e. Ala yeke sara akua ti ala ti lâ na lâ me ala hinga pëpe so mbeni ye ti sioni aga nduru ti si awe: futingo sioni dunia ti Satan. Nde na yengingo ti sese so azo ahinga ka lango so ayeke si na ni ape, ti lango ti fango ngbanga ti Jéhovah kete ngoi angbâ na e ti fa tënë ni na amba ti e kozoni si a si. Peut-être mo leke yâ ti kapa ti mo awe na mo yeke fa tënë da na da yenga na yenga, me mo lingbi ti sara ye mingi ahon ti kozo ti fa tënë ti lango ti fango ngbanga ti Jéhovah na azo?

JÉSUS AYE LANI FANGO TËNË MINGI

Jésus azia na e nzoni tapande na lege so lo ye lani fango tënë mingi. Lo fa tënë na azo kue so lo tingbi na ala. Lo fa tënë na mbeni zo ti rongo nginza ti lapo na lege nga lo fa tënë na mbeni wali so lo wara lo na tere ti mbeni dungu na midi na ngoi so lo yeke wu tere ti lo (Luc 19:1-5; Jean 4:5-10, 21-24). Jésus aye lani mingi ti fa ye na azo, même na ngoi ti wungo tere ti lo. Mawa ti azo so ayeke nduru na Jésus apusu lo ti fa tënë mingi ahon ti kozo (Marc 6:30-34). Tongana nyen la laso e lingbi ti mû tapande ti Jésus so abâ so ayeke kota ye ti fa tënë hio?

ALA FA TËNË NA ALEGE KUE SO AZI NA ALA

Melika alango na mbeni gbagba so azo kirikiri la ayeke lï ka ape. Mingi ti avoizin ti lo so alango na yâ ti gbagba ni, a yeke awamandango mbeti so alondo na ambeni kodoro nde. Ala yeke na téléphone portable me numero ti ala ayeke na yâ ti annuaire ti téléphone ape nga iri ti ala ayeke pëpe na tere ti asonnette ti ala. Melika abâ so a yeke nzoni lo gbu alege so azi na lo ti komanse ti fa tënë na azo ti gbagba ni so lo tingbi ala na yanga ti gbagba ni nga na yâ ti ascenseur. Lo tene: “Mbi bâ gbagba ni so tongana territoire ti mbi.” Melika ayeke mû ambeti ti e na ayanga ti kodoro nde nde na tere ti lo, nga mingi ti azo ni ayeda ti mû atract na apériodique. Lo gboto nga lê ti ala na ndo ti site ti e, jw.org. Lo komanse ti sara étude ti Bible na ala mingi.

Sonia nga kue afa tënë na azo kue so lege azi na lo ti wara ala. Lo sara kua na hôpital ti mbeni docteur, na lo zia na gbele lo ti fa tënë na azo kue ti place ti kua ti lo. Kozoni, lo mû ngoi ti gi ti hinga aye so agbu bê ti azo ni oko oko kue nga ti sara lisoro na ala. Na pekoni, lo gbu ngoi ti wungo tere ti ala ti tengo kete ye ti sara lisoro na ala oko oko na ndo ti Bible. Ye so asara si Sonia awara lege ti sara étude ti Bible na azo use. Lo leke nga ti mû ambeni ngoi ti wungo tere ti lo ti fa tënë na azo so aga na hôpital ni so ayeke ku ti bâ docteur.

GI TI FA TËNË NA ALEGE KUE SO AZI NA MO

Mbeni koli so asö kuâ na ngoi ti yengingo sese so asi na ngu 1906 atene: “So ayeke ye ti ngangu so mara ni ade ti si lâ oko ape na yâ ti mbeni gbata.” Me na yâ ti kete ngoi mbeni ye ti ngangu ayeke si na ayeke duti kota mingi ahon ati so asi na yâ ti dunia kue. A yeke si na lango ti futango kula na “azo so ahinga Nzapa pëpe”. (2 aThes. 1:8). Jéhovah aye mingi ti tene azo achangé bê ti ala nga na bibe ti ala na ala yeda na tënë so aTémoin ti lo ayeke fa.—2 Pi. 3:9; Apoc. 14:6, 7.

Mo yeke na pasa ti zi lê ti azo na ndo ti angoi ti aye ti ngangu so e yeke dä laso, nga ti mû maboko na ala ti zia lege ti gingo aye gi ngbanga ti ala wani tongaso si ala lingbi ti wara lege ti gi Jéhovah (Soph. 2:2, 3). Mo lingbi ti gbu angoi kue so azi na mo ti fa tënë na azo ti place ti kua ti mo, avoizin ti mo nga na azo so mo yeke tingbi na ala na yâ ti akua ti mo ti lâ na lâ? Mo yeke sara ande ye mingi ahon ti kozo ti fa tënë na azo?