Tënë so amû ngangu na zo “asigigi na yanga ti amolenge”

Na décembre, ngu 2009, Kota Da-ngbanga ti Russie ayeda na desizion so a mû na ndo ti aTémoin ti Jéhovah ti Taganrog. Ye so asara si a kanga lege na bungbi ti aTémoin ti Jéhovah, a kanga yanga ti Da ti Royaume nga a tene so ambeti ti e 34 ayeke sioni mingi. Na ndo ti site ti aTémoin ti Jéhovah a yeke wara tondo ti aye so asi so nga na afoto ti aTémoin ti Taganrog so na popo ti ala a yeke wara nga akete molenge.

Anze kete na pekoni, ndokua ti aTémoin ti Jéhovah ti Russie awara mbeni boîte na mbeni lettre so mbeni sewa ti aTémoin so ayeke na Queensland, Australie, atokua. Sewa so adiko tondo ti desizion ti Kota Da-ngbanga ni. Na yâ ti lettre ni, ala tene: “Aita, mabe ti aita ti e so ayeke na Russie nga na atara so asi na ala andu bê ti amolenge ti e Cody na Larissa mingi. Ala sû anduru mbeti na alettre nga e leke ambeni cadeau so e ye ti tene a tokua ni na amolenge so ayeke na Taganrog ti tene ala hinga so, atâa so lege ayo, ambeni molenge ayeke nga dä so ayeke sara na Jéhovah be-ta-zo nga so ayeke pensé na ala. Cody na Larissa atene so ala ye ala mingi.”

Na ngoi so amolenge ti Taganrog awara acadeau so, ala sû alettre nga ala sara adessin ala tokua na sewa so ayeke na Australie ti kiri singila na ala. Tënë so “asigigi na yanga ti amolenge” so, Cody na Larissa, amû ngangu na mbeni Témoin so ayeke sara kua na filiale ti Russie na apusu lo ti tokua lettre na ala. Na yâ ti lettre ni, lo tene: “Ala tara ti bâ vundu ti bê ti amolenge na akota zo na ngoi so a punir ala ndali ti mbeni ye so ala sara ape. Aita ti e ti Taganrog asara ye ti sioni ape me a kanga yanga ti Da ti Royaume ti ala. Ye so amû vundu na ala mingi. Ala yeke wara ngangu tongana ala hinga so mbeni zo so ayeke na mbeni kodoro so ayo apensé na ala. Merci na ala ndali ti ndoye nga na nzoni bê ti ala!”​—Ps. 8:3.

E yeke biani na yâ ti sewa ti aita ti ndo ti sese kue nga ndoye so e yeke na ni na mbage ti mba ayeke mû maboko na e kue ti gbu ngangu na yâ ti atara nga na akpale. A tene aTémoin ti Jéhovah ayeke pusu azo ti ke amba ti ala. Me amolenge ti e so ayeke na yâ ti akodoro nde nde nga so sarango ye ti azo ni ayeke nde nde afa so ala yeke na ndoye nga ala yeke bi bê na amba ti ala. Bibe ti ala so afa so atënë ti Jésus so ayeke tâ tënë: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.”​—Jean 13:35.

[Foto na lembeti 32]

Amolenge ti Russie (na mbage ti wali) so awara acadeau ti amolenge ti Australie (na mbage ti koli)