Lekengo Mbeni Sewa so Akpengba na Lege ti Yingo
“I ngbâ ti bata ala nzoni na yâ wango-tene nga na fango lege ti bibe ti Jéhovah.”—AÉPHÉSIEN 6:4, NW.
1. Ye nyen Nzapa aleke la ni ti sala teti sewa, me atä ye so kue, ye nyen asi?
“I DÜ amolenge mingi, i wu, i si singo na sese.” (Genèse 1:28) Na salango atene so na Adam na Ève, Jéhovah Nzapa aleke gere ti dutingo ti sewa. (aEphésien 3:14, 15) Na bango ndo na gigi ti kekereke, kozo koli na kozo wali alingbi ti ba na li sese so ayeke si singo na amolenge ti ala, mbeni kota sewa ti azo ti mbilimbili-kue so ayeke duti na ngia na ndo mbeni sese so aga paradis na ala kue avoro Kota Wasalango ala na beoko. Me Adam na Ève atï na yâ siokpari, na sese asi singo mbeni pepe na azo ti mbilimbili, so akpe mbito ti Nzapa. (aRomain 5:12) Nde na so, fini ti sewa abuba hio mingi, na kengo tele, salango ngangu, na azo so “andoye asongo ti ala pepe” amu ndo kue, mbilimbili na ngoi ti “lâ ti nda ni” so.—2 Timothée 3:1-5; Genèse 4:8, 23; 6:5, 11, 12.
2. Ahale ti Adam ayeke na angangu wa, me ye nyen a hunda na ala ti duti na ni tongana ala ye ti leke mbeni sewa so akpengba na lege ti yingo?
2 A leke la ni Adam na Ève na image ti Nzapa. Atä so Adam aga fadeso wasiokpari, Jéhovah amu lege na lo ti dü amolenge. (Genèse 1:27; 5:1-4) Tongana babâ ti ala, ahale ti Adam ayeke na ngangu ti soro lege ti tambela ti ala, na ala lingbi ti manda ti sala kangbi na popo ti nzoni na sioni. A lingbi ti fa na ala tongana nyen ti voro Wasalango ala, na nene ti ndoye lo na bê ti ala kue, na âme ti ala kue, na bibe ti ala kue nga na ngangu ti ala kue. (Marc 12:30; Jean 4:24; Jacques 1:27) Na ndo ni, a lingbi ti fa na ala “ti sala mbilimbili, ti ndoye nzobe na ti tambela na tâ be-ti-molenge na Nzapa.” (Mika 6:8, NW) Ye oko, teti ala yeke awasiokpari, a yeke hunda ande na ala ti bi bê mingi ti leke mbeni sewa so akpengba na lege ti yingo.
Vo Ngoi
3. Tongana nyen ababâ na mama alingbi ti ‘vo ngoi’ ti bata amolenge Chrétien?
3 Laso na ngoi ti kirikiri so akpale ayeke dä mingi, a lingbi a sala kota ngangu ti tene amolenge aga azo ti “ndoye Jéhovah” so biani ‘ake ye so ayeke sioni.’ (Psaume 97:10, NW) Fade ababâ na mama ti ndara ayeke “vo ngoi” ti sala mbeni ye teti ngangu kusala so. (aEphésien 5:15-17) Tongana mo yeke mbeni babâ wala mama, mo lingbi ti sala ye so tongana nyen? Kozoni, zia na sese aye so aga na kozo ndo, na bingo bê na “aye so ayeke kota ahon,” so andu fango ye na fango lege na amolenge ti mo. (aPhilippien 1:10, 11) Use ni, gi ti duti pepe na ye mingi mingi ti sala na yâ fini. Peut-être a lingbi lungula yamba akusala so ayeke kota ye pepe. Wala peut-être a lingbi mo zia lege ti ambeni gbakuru so ayeke kota ye pepe, so ahunda ngoi mingi ti bata ni. Tongana babâ wala mama Chrétien, fade mo duti na vundu lâ oko pepe so mo sala ngangu so a hunda ti bata amolenge so akpe mbito ti Nzapa.—aProverbe 29:15, 17.
4. Tongana nyen a lingbi ti bata mbeni sewa na yâ beoko?
4 Mungo ngoi teti amolenge ti mo, mbilimbili tongana a luti na ndo aye ti yingo, alingbi biani na ngangu so ala sala, na a yeke mbeni oko ti alege ti nzoni ahon ti bata mbeni sewa na beoko. Me sala ye so pepe gi tongana ngoi ayeke dä. Leke ambeni ngoi so na ndembe ni ala yeke sala ande ye legeoko. So aye ti tene pepe gi ti duti na yâ ti da oko, zo oko oko ayeke sala ye so bê ti lo mveni aye. Amolenge ayeke maï nzoni ahon tongana a bi bê na ndo ala lâ na lâ. A lingbi mo gbanzi tele pepe ti fa na gigi ndoye nga na bingo bê kue teti amolenge ni. Même kozoni si ala mu desizion ti wara amolenge, a lingbi akoli na awali so asala mariage awe abi bê nzoni na ndo kpengba kungba so. (Luc 14:28) Tongaso, ala yeke ba ande pepe batango amolenge tongana mbeni kungba so ane mingi. Nde na so, fade ala yeke ba ni tongana mbeni nzoni matabisi.—Genèse 33:5; Psaume 127:3.
Fa Ye na Yanga nga na Tapande
5. (a) Fango na amolenge ti ndoye Jéhovah ato nda ni na nyen? (b) A mu wango wa na ababâ na mama na Deutéronome 6:5-7?
5 Fango na amolenge ti mo ti ndoye Jéhovah ato nda ni na ndoye ti mo mveni teti lo. Mbeni kpengba ndoye teti Nzapa ayeke pusu ande mo ti mu peko ti awango tene ti lo na be-biani. Ye so andu batango amolenge “na yâ wango-tene nga na fango lege ti bibe ti Jéhovah.” (aÉphésien 6:4, NW) Nzapa awa ababâ na mama ti duti tapande teti amolenge ti ala, ti sala lisoro na ala, na ti fa ye na ala. Deutéronome 6:5-7 (NW) atene: “A lingbi mo ndoye Jéhovah Nzapa ti mo na bê ti mo kue na âme ti mo kue nga na ngangu ti fini ti mo kue. Na a lingbi atene so mbi hunda na mo laso aduti na ndo ti bê ti mo; na a lingbi mo yôro ala na bê ti molenge ti mo nga mo sala tene ni na ngoi so mo duti na da ti mo nga tongana mo tambela na lege na tongana mo gue ti lango nga na ngoi so mo yeke londo.” Na lege ti agbotongo mê na fango ye so mo yeke mu fani mingi, mo lingbi ti yôro akomandema ti Nzapa na yâ amolenge ti mo. Na lege so, amolenge ti mo ayeke ba ande ndoye so mo yeke na ni teti Jéhovah, na tongaso, a yeke pusu ande ala ti ga ndulu na lo nga.—aProverbe 20:7.
6. Tongana nyen ababâ na mama alingbi ti sala kusala nzoni na ngangu so amolenge ayeke na ni ti manda ye na lege ti tapande?
6 Amolenge ayeke na kota nzala ti manda ye. Ala yeke mä tene hio mingi, ala yeke ba ye hio mingi, na dutingo ndulu ti mu tapande ti mo. Tongana ala ba so mo yeke pepe zo ti tombango peko ti mosoro, ye so ayeke mu maboko na ala ti manda tongana nyen ti mu peko ti wango ti Jésus. Mo yeke fa na ala ti duti pepe na gingo bê na ndo aye ti mitele me ti ‘gi kozoni royaume ti Nzapa.’ (Matthieu 6:25-33) Na salango apendere lisoro so akpengba zo na ndo tâ tene ti Bible, na ndo kongregation ti Nzapa, nga na ndo a-ancien so a hiri ala na kusala, mo yeke fa na amolenge ti mo ti kpe mbito ti Jéhovah na ti yekia aye ti yingo so lo yeke mu. Teti so amolenge ayeke ba hio mingi aye so atambela nzoni pepe, a lingbi tambela na bango ndo ti mo, so afa polele kota yekiango ndo teti aye ti yingo, ague legeoko na ye so mo tene. A yeke duti ye ti nzoni tongana ababâ na mama aba so nzoni tapande ti ala amu lege na amolenge ti ala ti lë ndoye teti Jéhovah, ndoye so alondo na bê ti ala kue.—aProverbe 23:24, 25.
7, 8. Tapande wa afa ngele ti fango lege na amolenge na ngoi so ala de pendere mingi, na gonda ti nzoni lengo ni ague na zo wa?
7 A lingbi ti ba ngele ti fango lege na amolenge na ngoi so ala de kete mingi na yâ mbeni tapande so alondo na Vénézuela. (2 Timothée 3:15) A ndu mbeni maseka-koli na wali ti lo, Félix na Mayerlín so asala mariage awe. Ala sala kusala tongana pionnier. Tongana ala dü molenge ti ala ti koli, Félito, ala yeke la ni ndulu ti sala ye kue so ala lingbi sala ti fa lege na lo tongana tâ wavorongo Jéhovah. Mayerlín ato nda ti diko na kota go na Félito buku Mbeti ti atene ti Bible so aTémoin ti Jéhovah asigigi na ni. Hio na ngoi so lo de kete mingi, a ba so Félito alingbi ti hinga Moïse na ambeni zo so a sala dessin ti ala na yâ buku so.
8 Na ngoi so lo de pendere mingi, Félito ato nda ti fa tene lo mveni. Lo ga wafango tene ti sala ye alingbi na ye so lo leke na bê ti lo, na pekoni lo wara batême. Tongana ngoi ayeke hon, lo ga pionnier permanent. Ababâ na mama ti lo atene: “Tongana e yeke ba guengo na li ni ti molenge ti e ti koli, e ba so gonda ni kue ague gi na Jéhovah na fango lege ti lo.”
Mu Maboko na Amolenge ti Maï na Lege ti Yingo
9. Ngbanga ti nyen alingbi e kiri singila teti fango lege ti yingo so e yeke wara na lege ti ngba ti be-ta-zo na ti ndara?
9 A yeke wara ambeti-sango mingi, abuku ngbangbo mingi, na andokua ti Internet saki mingi so ayeke mu awango na ndo lege ti bata amolenge. Mbeni article ti Newsweek so andu gi amolenge atene so fani mingi “atene ni ague nde. Même ye so asala si li ti zo akpe kirikiri mingi ahon ayeke ti so atene so mo ba a lingbi ti zia bê kue dä aga gi tene ti wataka biani.” So tä singila si e kiri na Jéhovah teti lo mu gbâ ti aye teti fango lege na sewa nga teti maïngo ni na lege ti yingo. Mo yeke gi ti wara aye ti nzoni na yâ aye kue so amu na lege ti ngba ti be-ta-zo na ti ndara?—Matthieu 24:45-47.
10. Tongana nyen nzoni mandango Bible na sewa ayeke ga na ye ti nzoni na ababâ na mama nga na amolenge?
10 Mbeni kota ye so a hunda ti sala ayeke nzoni mandango Bible na sewa lakue na yâ mbeni dutingo so ayapu. Ti sala si a duti ye so afa lege, ye so amu ngia, na ye so akpengba zo, a hunda nzoni lekengo tele. Na pusungo amolenge ni ti fa tene ti bê ti ala polele, ababâ na mama alingbi ti hinga ye so ayeke na yâ bê nga na bibe ti ala. Mbeni oko lege ti hinga nzoni lengo ti mandango ye na sewa ayeke ti ba wala azo ti da ni kue ayeke ku ni kungo.
11. (a) Aye wa ababâ na mama alingbi ti mu maboko na amolenge ti ala ti zia na gbele ala? (b) Ye nyen asi tongana mbeni molenge-wali ti Japon agi ti si na ye so lo zia na gbele lo?
11 Legeoko nga, gingo ti wara aye so Mbeti ti Nzapa ahunda alingbi ti mu lege ti leke mbeni sewa so akpengba na lege ti yingo, na a lingbi ababâ na mama amu maboko na amolenge ti ala ti zia aye tongaso na gbele ala. Anzoni ye so zo alingbi ti zia na gbele lo ti sala andu dikongo Bible lâ na lâ, dutingo mbeni wakua so ayeke fa nzo tene lakue, na guengo na li ni ti mu tele na Nzapa na ti wara batême. Ambeni ye so zo alingbi ti zia na gbele lo ti si dä alingbi ti duti mungo kusala ti pionnier, salango kua na Bethel, wala tongana mbeni missionnaire. Na ngoi so lo de na kete da-mbeti, mbeni molenge-wali ti Japon so hiri ti lo ayeke Ayumi azia na gbele lo ti fa tene na azo kue na yâ classe ti lo. Ti zingo nzala ti wafango mbeti na lo na ti akamarade ti lo ti classe, lo wara lege ti zia ambeti mingi so andu Bible na yâ ti da so azia ambeti ti ekole ni dä ti tene azo aba. Ye ti pekoni ayeke so lo wara lege ti manda Bible na azo 13 na yâ ti angu omene so lo sala na kete da-mbeti. Mbeni oko na popo ti azo so amanda Bible ni, na ambeni zo na yâ ti sewa ti wamandango Bible ni awara batême.
12. Tongana nyen amolenge alingbi ti wara ye ti nzoni mingi ahon na lege ti abungbi ti Chrétien?
12 Nga, mbeni ye so ayeke kota mingi ti kpengba seni na lege ti yingo ayeke ti gue lakue na abungbi. Bazengele Paul awa afon lo wamabe ‘ti zia pepe ti bungbi tele ti ala, tongana ti so ambeni ayeke sala lakue.’ Zia si aduti pepe ye so e yeke sala lakue, teti apendere na mbakoro nga ayeke wara ye ti nzoni mingi na dutingo dä lakue na abungbi ti Chrétien. (aHébreu 10:24, 25, NW; Deutéronome 31:12) A lingbi a fa na amolenge ti mä tene nzoni. A yeke nga kota ye mingi ti leke tele kozoni teti abungbi, teti so ye ti nzoni ti kota ahon aga na lege ti mungo mbage na wâ na lege ti akiringo tene. Atä so mbeni pendere alingbi peut-être ti to nda ni ti tene ambeni kete tene wala ti diko kete mbage ti mbeni paragraphe, a yeke duti ande nzoni ahon tongana a fa na amolenge ni ti gi ala mveni akiringo tene teti ahundango tene, na ti tene ni na lege ti atene so alondo na bê ti ala mveni. Babâ na mama, i yeke zia tapande na kiringo tene i mveni so alingbi, lakue? A yeke nga nzoni teti zo oko oko na yâ sewa ti duti na Bible, mbeti ti bia, na mbeti so a yeke sala na kusala teti lisoro na ndo Bible.
13, 14. (a) Ngbanga ti nyen a lingbi ababâ na mama asala kusala na tele ti amolenge ti ala na yâ fango tene? (b) Ye nyen ayeke mu ande maboko ti sala si kusala ti fango tene aga ye ti nzoni na ye so amu ngia teti amolenge?
13 Fade ababâ na mama ti ndara ayeke fa na amolenge ti ala ti mu ngangu ti pendere ti ala ti sala na Jéhovah, na mungo maboko na ala ti sala si fango tene aga mbeni kota mbage ti fini ti ala. (aHébreu 13:15) A yeke gi na salango kusala na amolenge ti ala na yâ fango tene si ababâ na mama alingbi ti hinga na bê kue so amolenge ti ala ayeke wara ande fango lege so alingbi, ti ga wakua so “kamela asala lo pepe, zo so afa nda ti tene-biani na lege ni.” (2 Timothée 2:15) Tongaso, ti mo ayeke tongana nyen? Tongana mo yeke mbeni babâ wala mama, mo yeke mu maboko na amolenge ti mo ti leke tele teti kusala ti fango tene? Salango tongaso ayeke mu ande maboko ti sala si kusala ti fango tene amu ngia, nda ni ayeke dä, na alë lengo teti ala.
14 Ngbanga ti nyen a yeke nzoni teti ababâ na mama na amolenge ti ala ti sala kusala legeoko na yâ fango tene? Na lege so, amolenge alingbi ti ba na ti mu nzoni tapande ti ababâ na mama ti ala. Na oko ngoi ni nga, ababâ na mama alingbi ti ba nga bibe ti amolenge ti ala, salango ye ti ala, na akode ti ala. Sala kue ti gue na amolenge ti mo na yâ ambage nde nde ti kusala ti fango tene. Tongana lege ayeke dä, zia si molenge oko oko aduti na bozo ti lo ti fango tene, na fa na lo ti bata ni nzoni si a lingbi sigigi na ni. Na ngbango lakue ti leke amolenge na ti mu wango so akpengba zo, fade a kpengba nene ni so amolenge ayeke na ni teti kusala ti fango tene, na ala yeke ba ande kusala ti fango tene tongana mbeni lege ti fa ndoye teti Nzapa nga teti zo so ayeke ndulu na ala.—Matthieu 22:37-39; 28:19, 20.
Bata Nzoni Dutingo na Lege ti Yingo
15. Teti so batango dutingo ti sewa na lege ti yingo ayeke kota ye mingi, ambeni lege ti sala ni ayeke so wa?
15 Ti bata dutingo ti sewa na lege ti yingo ayeke kota ye mingi. (Psaume 119:93) Mbeni oko lege ti sala ni ayeke salango lisoro na ndo aye ti yingo na sewa ti mo na ngoi kue. Mo yeke sala lisoro na ala na ndo versê ti Bible ti lâ oko oko? A yeke na yâ salango ye ti mo ti kangbi na ala aye so asi na yâ kusala ti fango tene wala ambeni tene so alondo na yâ andangba Tour ti Ba Ndo na Réveillez-vous “tongana mo tambela na lege”? Mo yeke dabe ti mo ti kiri singila na Jéhovah na yâ sambela teti lâ oko oko ti fini nga teti gbâ ti aye so lo yeke mu “tongana mo gue ti lango nga na ngoi so mo yeke londo”? (Deutéronome 6:6-9, NW) Tongana amolenge ti mo aba ndoye ti Nzapa na yâ ye kue so mo yeke sala, fade ye so amu maboko na ala ti sala si tâ tene aga ye ti ala mveni.
16. Kota ti fa na amolenge ti gi nda ti aye ala mveni ayeke so wa?
16 Na ambeni ngoi, amolenge ayeke na bezoin ti tene a fa lege na ala ti hon ndo ti akpale na aye so asi. Ahon ti fa na ala lakue ye so ala lingbi ti sala, ngbanga ti nyen pepe ti fa na ala tongana nyen ti wara bango ndo ti Nzapa na ndo atene ni na mungo wango na ala ti gi nda ti aye ni ala mveni? Fango na amolenge ti sala kusala nzoni na agbakuru nga na ambeti kue so ‘ngba ti be-ta-zo’ amu ayeke mu ande maboko na ala ti maï nzoni songo na Jéhovah. (1 Samuel 2:21b) Na tongana ala kangbi na ambeni zo ti da ni aye ti nzoni so ala wara na yâ gingo nda ti mbeti ti Nzapa, dutingo ti sewa ni na lege ti yingo ayeke ga nzoni ahon.
Zia Bê Kue na Jéhovah
17. Ngbanga ti nyen a lingbi bê ti ababâ na mama so ayeke gi ala oko anze pepe tongana a ndu batango amolenge ti ala tongana aChrétien?
17 Ka ti asewa so gi babâ wala mama lo oko si ayeke bata amolenge ni ayeke tongana nyen? Ababâ na mama so ayeke wara aye ti ngangu mingi ahon na ndo tene ti batango amolenge. Me i ababâ wala amama so i yeke bata amolenge ti i gi i oko, zia bê ti i anze pepe! Lege ti hon na ngangu ayeke dä, tongana ti so a sigigi polele na tapande ti ababâ na mama mingi so ayeke gi oko, na so azia bê kue na Nzapa, amä wango ti lo, na abata amolenge nzoni, so akpengba na lege ti yingo. (aProverbe 22:6) Biani, a hunda na aChrétien so gi babâ wala mama ti ala oko si ayeke bata ala ti zia bê kue na Jéhovah. A lingbi ala duti na mabe so fade lo yeke mu ande maboko na ala.—Psaume 121:1-3.
18. A lingbi ababâ na mama abi bê na ndo aye wa so amolenge ti ala ayeke na bezoin ni na lege ti bibe na ti mitele, me a lingbi a gboto lê mingi na ndo nyen?
18 Ababâ na mama ti ndara ahinga so ‘ngoi ti he ngia na ngoi ti hulu na dodo ayeke dä.’ (Zo-ti-fa-tene 3:1, 4) Mbeni ye so alingbi ti kpengba tele na bibe ti mbeni molenge ayeke ngoi ti salango ngia, na nzoni ngoi ti wungo tele, so azia ye kue na ndo so alingbi. Abia so akpengba zo, na mbilimbili hengo abia ti sepela Nzapa ayeke mu ande maboko na mbeni molenge ti maï nzoni bango ndo so alingbi ti duti kota ye mingi ti kpengba songo ti lo na Jéhovah. (aColossien 3:16) Lâ ti pendere ayeke nga ngoi ti leke tele ti ga mbeni biazo so akpe mbito ti Nzapa, si warango ngia na yâ fini alingbi ti ngbâ lakue na ndo mbeni sese so aga paradis.—aGalate 6:8.
19. Ngbanga ti nyen ababâ na mama alingbi ti zia bê kue so Jéhovah ayeke hiri ande deba nzoni na ndo angangu so ala sala ti bata amolenge ti ala?
19 Jéhovah aye si asewa kue ti Chrétien akpengba na lege ti yingo. Tongana e ndoye biani Nzapa na e sala kue ti bata Tene ti lo, fade lo deba nzoni na ndo angangu ti e na lo mu na e ngangu so e hunda ti mu peko ti fango lege so lo mu na lege ti yingo ti lo. (Esaïe 48:17; aPhilippien 4:13) Dabe ti mo so lege so mo yeke fadeso na ni ti fa lege na ti fa ye na amolenge ti mo ayeke na katikati ni na fade akiri ti ga mbeni pepe. Sala ngangu kue biani ti bata wango ti Tene ti Nzapa, na fade Jéhovah ahiri deba nzoni na ndo angangu so mo yeke sala ti leke mbeni sewa so akpengba na lege ti yingo.
E Manda Nyen?
• Ngbanga ti nyen vongo ngoi ayeke kota ye mingi tongana a yeke fa lege na amolenge?
• Ngbanga ti nyen nzoni tapande ti ababâ na mama ayeke kota ye mingi?
• Ambeni kpengba lege ti mu maboko na amolenge ti maï na lege ti yingo ayeke so wa?
• Tongana nyen a lingbi ti bata dutingo ti sewa na lege ti yingo?
[Afoto na alembeti 20 na 21]
Asewa so akpengba na lege ti yingo ayeke manda Tene ti Nzapa lakue, ayeke gue na abungbi ti aChrétien lakue, na ayeke mu mbage na kusala ti fango tene