Nzoni bungbi ti vorongo Nzapa amaï bango na nene ni Mbeti ti Nzapa
Jésus abâ na nene ni mingi Mbeti ti Nzapa. E bâ ni polele na yâ ti kiringo tënë ti lo tongana Zabolo atara lo (Matthieu 4:4-11). Na tapande, tongana Satan atene na Jésus ti changé tênë ti ga mapa, lo sara tongana nyen? Jésus ake, na fango na lo atënë ti Nzapa so asigigi na yanga ti Moïse so mo lingbi ti diko na Deutéronome 8:3. Na tongana Zabolo ahunda na Jésus ti voro lo si lo wara komandema na ndo ti aroyaume ti dunia kue, Jésus akiri tënë na lo tongana nyen? Lo ke, na lo fa na Satan kpengba-ndia so mo lingbi ti wara na Deutéronome 6:13.
Gbu li ti mo kete! Atâa so lo yeke Molenge ti Nzapa, Jésus azia bê ti lo na Mbeti ti Nzapa tongana ye so amû na lo ngangu na ngoi so lo yeke fa tënë ti Nzapa. Biani, lo zia lâ oko pëpe tënë ti yâ ti Mbeti ti Nzapa ndali ti tënë ti akotara ( Jean 7:16-18). Jésus abâ ti lo na nene ni Mbeti ti Nzapa, me ti amokonzi-nzapa ti ngoi ti lo ayeke tongaso pëpe. Ngbanga ti nyen? Ala mû tënë ti akotara ti ala na nene ni ahon tënë ti Mbeti ti Nzapa. Ni la Jésus atene na ala polele: ‘I buba yâ ti tënë ti Nzapa kue, gi ndali ti yanga ti akotara ti i. Azo ti yanga use! Tënë so prophète Ésaïe atene na li ti i, lo tene tâ tënë biani: Azo so, ala yeke gonda mbi na yanga ti ala senge; bê ti ala angbâ yongoro na mbi. Ala yeke gonda mbi gbä, ngbanga ti so, tënë so ala yeke fa ayeke gi tënë ti yanga ti zo senge.’—Matthieu 15:6-9, Fini Mbuki, 1988.
Mingi ti abungbi ti vorongo Nzapa ti dunia so, ala so atene ani yeke mû peko ti Christ na ala so atene ani yeke ti Christ pëpe, atene ani bâ na nene ni Bible. Ye oko, abungbi ti vorongo Nzapa oke so mo hinga ake atënë ti yanga ti azo tongana ague nde na afango ye so ayeke polele na yâ ti Mbeti ti Nzapa? E bâ gi atapande use.
TËNË TI: Iri so a mû na azo ti nzapa.
YE SO BIBLE AFA:Jésus ake na amokonzi-nzapa ti ngoi ti lo so aye mingi ti wara akota iri na ala ye nga ti duti na akota ndo. Lo tene so ‘ala ye ti mû kozo gbogbo na yâ ti matanga, na kozo ngende na yâ ti synagogue. Ala ye, azo abara ala na lê ti gara, airi ala Rabbi. Ti i, i zia azo airi i Rabbi pëpe, tënë ti so, Gbia ti i ayeke gi oko, si i kue i yeke aita. I mû iri ti Babâ na mbeni zo na ndo ti sese pëpe; Babâ ti i ayeke gi oko, lo so lo yeke na yayu.’—Matthieu 23:1-10, FM 88.
HUNDANGO NDO: Amokonzi-nzapa ti bungbi ti vorongo Nzapa ni so aye ti tene azo airi ala na akota iri na ala gi akota ndo na popo ti azo? wala ala sara ye alingbi na commandement so Jésus amû ti kpe sarango ye tongaso?
TËNË TI: Sambelango Nzapa na lege ti a-image.
YE SO BIBLE AFA: “A lingbi mo sara mbeni yanda so a leke na kode teti mo mveni pëpe, wala mbeni ye so akpa ye ti yayu na nduzu, wala a kpa ye ti sese na gbe ti yayu, wala a kpa ye ti ngu na gbe ti sese; a lingbi mo zuku tere ti mo na gbele ye tongaso pëpe, na mo sambela ala pëpe.”—Exode 20:4, 5.
Bazengele Jean asû mbeti so na aChrétien: ‘Ala mû peko ti ayanda pëpe!’—1 Jean 5:21, Fini Mbuki, 2001.
HUNDANGO NDO: Bungbi ti vorongo Nzapa ni so asara ye alingbi na commandement ti Bible so ake sambelango Nzapa na lege ti a-image nga na ayanda?
Mo lingbi ti wara nzoni lege ni
E lingbi ti wara bungbi ti vorongo Nzapa oko so ague na zo na fini ti lakue lakue atâa so abungbi ti vorongo Nzapa ayeke gbani laso. Aye mingi ayeke dä so amû lege na e ti hinga na ‘mbilimbili vorongo Nzapa so sioni ye ayeke dä pëpe.’ (Jacques 1:27, FM 01). Aversê so e sara lisoro na ndo ni na yâ ti a-article so ayeke tongana mbeni ye so alingbi ti mû maboko na mo ti hinga na nzoni bungbi ti vorongo Nzapa.
Hunda na aTémoin ti Jéhovah ti fa na mo akiringo tënë ti ala na ndo ti atënë so a hunda na yâ ti a-article so. Tongana mo yeke gbu li na ndo ti ye so ala yeke tene, mû peko ti tapande ti azo so ayeke na ngoi ti akozo Chrétien na gbata ti Bérée. Na pekoni so ala mä fango tënë ti bazengele Paul, ‘ala yeke diko Mbeti ti Nzapa ti gi tënë dä so afa atene, ye ni ayeke tongaso biani.’ (Kusala 17:11, FM 88). Na tapande ti azo ti Bérée, tongana na mo bâ Mbeti ti Nzapa na nene ni na mo manda ni nzoni, mo yeke wara ande lege so ague na mo na fini. Na pekoni ayeke na mo ti soro ti mû lege ti fini so.
[Kete tënë na lembeti 9]
Bungbi ti vorongo Nzapa wa la awa azo ti manda Mbeti ti Nzapa na ti bâ wala ye so ala yeke manda so ayeke tâ tënë?