Mo lingbi ti wara tâ ngia biani

TÂ NGIA so aninga ayeke mbeni ye so ngoi na ngoi a yeke ngangu ti wara ni. Mingi ni, a yeke ngangu ti wara tâ ngia ndali ti so azo mingi ayeke gi ni lakue na mbilimbili ndo ni pëpe. Tongana fade ala wara mbeni kamarade so a lingbi ti zia bê kue na lo nga so lo lingbi ti mû maboko na ala, ka lo yeke fa na ala tâ ndo ti warango ni.

Bible la ayeke tâ ye so alingbi biani ti fa lege na zo. Bâ gi mbeni oko ti ambeti ti yâ ni, mbeti ti Psaume. Mbeti ti Psaume ayeke abia 150 so a leke ni ti sepela na Jéhovah Nzapa. Nduru na ndambo ti abia ni ayeke ti David, gbia ti Israël ti giriri. Biani, ti hinga iri ti azo so asû mbeti ti Psaume ayeke nzoni, me ye so ayeke kota mingi ahon ayeke ti hinga so a sû ni na gbe ti yingo ti Jéhovah so lo yeke Kota Kamarade ti azo. A yeke tongaso si e lingbi ti mä na bê so mbeti ti Psaume alingbi ti mû na e wango ti Nzapa so ayeke ndali ti nzoni ti e nga so a yeke fa na e lege ti wara tâ ngia.

Awasungo apsaume ahinga biani so tongana zo ayeke na nzoni songo na Nzapa, lo yeke wara tâ ngia biani. Mbeni oko ti ala asû na mbeti: “Ngia ayeke na zo so akpe mbeto ti L’Eternel.” (Psaume 112:1). Ngia so zo ayeke wara ndali ti so lo yeke ti “azo so L’Eternel [“Jéhovah”, NW ] ayeke Nzapa ti ala” ahon ngia so lo lingbi ti wara na lege ti sarango songo na amba ti lo, na lege ti mosoro nga na aye so lo mveni lo sara (Psaume 144:15). Atapande mingi laso afa tongaso.

Susanne, so ngu ti lo ahon 40 awe, ayeke mbeni tapande ni.a Lo tene: “Laso, azo mingi ayeke lï na yâ ti abungbi nde nde ti wara ye so ala kue aye wala ti sara mbeni ye so agbu bê ti ala. Ye oko, a yeke ngangu ti tene ala bâ zo oko oko kue ti yâ ti bungbi ni tongana kamarade ti ala. Me na awakua ti Jéhovah, ye ni ayeke nde. Ndoye ti e na mbage ti Jéhovah apusu e ti ye tere na popo ti e. Na popo ti awakua ti Nzapa, ndo kue so mo si dä ayeke gi tongana ndo ti mo. Beoko so asara si gigi ti e anzere mingi. Nde na awakua ti Nzapa, zo wa la alingbi ti tene so ni sara kamarade na azo so mara ti ala na dutingo ti ala ayeke nde nde, nga ala yeke na yâ ti akodoro mingi mingi? Ti tâ tënë ni, mbi lingbi ti tene so tongana mo yeke na popo ti azo ti Jéhovah si mo lingbi ti wara tâ ngia.”

Maree, so a dü lo na kodoro ti Écosse, ahinga nga so tongana zo aye ti wara tâ ngia, a yeke kota ye ti tene lo lë kpengba songo na Jéhovah. Lo tene: “Kozo si mbi hinga tâ tënë, mbi ye lani mingi ti bâ alimon so ayeke sara zo mbeto. Me na bï, tongana mbi gue ti lango, lakue mbi yeke gbu croix na maboko ti mbi ti tene a tomba atoro na azo so ayeke nyon mênë ti azo, so mingi ti alimon ni ayeke na ndo ti ala. Ye oko, na ngoi so mbi hinga tâ tënë awe nga mbi zia lege ti bango alimon so, songo ti mbi na Jéhovah asara si mbeto ayeke sara mbi mbeni pëpe tongana mbi gue ti lango. Mbi yeke na ngia ti sara na mbeni Nzapa so ayeke ngangu ahon ayingo sioni nga na atoro so azo abâ atene ala yeke dä.”

Ti zia bê kue na Jéhovah aga na tâ ngia

E hinga biani so Wasarango ye ayeke na ngangu ahon azo kue nga lo yeke na ndara mingi. Teti so lo hinga so lo lingbi ti zia bê ti lo kue na Jéhovah nga lo lingbi ti kpe na Lo ti bata tere ti lo, David atene: “Ngia ayeke na zo so azia bê ti lo na L’Eternel.”​—Psaume 40:5.

Maria atene: “Atâa so bê ti e aye ti pusu e ti sara mbeni ye nde, ye so asi na mbi na Espagne nga na ambeni ndo nde afa so tongana e sara ye na lege so Jéhovah afa, e yeke wara nzoni dä mingi. Sarango tongaso aga na e ngia ngbanga ti so sarango ye na lege so Jéhovah afa ayeke lakue nzoni lege ni.”

Na lege ti aye so asi na lo, Andreas, mbeni ancien so asara kusala na yâ ti akodoro mingi ti Poto, ahinga nga so e lingbi ti zia bê ti e kue na Jéhovah. Lo tene: “Na ngoi so mbi de lani maseka, yaya ti mbi ti koli so lo yeke Témoin ti Jéhovah pëpe asara ngangu mingi na ndo ti mbi. Lo wa mbi ti gi mbeni kua so ayeke ga na nginza mingi. Bê ti lo aso mingi tongana mbi mû lani kusala ti pionnier, na mbi zia bê ti mbi pëpe na nginza so Letäa ayeke mû na zo so ayeke na retraite wala so alingbi ti sara kua mbeni pëpe. So mbi yeke pionnier, ye amanke mbi lâ oko pëpe, nga mbi yeke wara aye ti nzoni so ambeni zo aye ti wara ni, me ala wara pëpe.”

Na ngu 1993, a tisa Felix ti mû mbage na kua ti konongo yâ ti Béthel ti Zamani, na gbata ti Selters. Tongana kua ni ahunzi awe, a hunda na lo ti ngbâ kâ biani biani. Lo sara tongana nyen? Lo tene: “Mbi yeda ti ngbâ, me mbi gi bê ti mbi kete. Ye oko, mbi yeke ge a sara fadeso ngu bale-oko tongaso na mbi hinga biani so Jéhovah amä asambela ti mbi. Lo hinga ye so ayeke nzoni mingi ndali ti mbi. So mbi zia bê ti mbi kue na lo na mbi yeda na fango lege ti lo, mbi mû lege na lo ti fa na mbi ye so lo ye mbi sara.”

Susanne, so e sara tënë ti lo awe, aye lani ti mû kusala ti pionnier, me a yeke ngangu na lo ti wara kua ti nginza so amû ngoi ti lo mingi pëpe. Tongana, na peko ti ngu oko lo wara kua pëpe, lo zia bê ti lo kue na Jéhovah na lo mû kusala ni. Lo fa ye so asi: “Mbi hunda ti mû kusala ti pionnier. Nginza so mbi bata ti vo na aye so atia mbi alingbi gi ti nze oko. Aye so asi na yâ ti kozo nze ti kusala ti pionnier ni apika bê ti mbi mingi. Mbi wara ngia mingi na yâ kusala ti fango tënë. Ye oko, mingi ti akua ti nginza so mbi gue ti tene a bâ mbi ngbanga ni, a mû mbi dä pëpe. Me, Jéhovah azia mbi pëpe tongana ti so lo mveni lo tene. Gi na ndangba lango ti nze ni, mbi wara kua. Ge la si mbi hinga so mbi lingbi ti zia bê ti mbi biani na Jéhovah. Kozo ye so, so asi na mbi na yâ kusala ti pionnier, asara si mbi duti na ngia na gigi ti mbi.”

Ti yeda na wango ti Nzapa akono ngia ti zo

Gbia David asara lani ambeni kota siokpari. Ngoi na ngoi, lo yeke lani na bezoin ti anzoni wango. E yeke nduru ti yeda na awango tongana David?

Aida, so lo yeke na France, abâ lani so lo sara mbeni kota siokpari. Lo tene: “Kota ye so agbu bê ti mbi lani ayeke ti kiri ti leke songo ti mbi na Jéhovah, awe.” Lo hunda lani na a-ancien ti mû maboko na lo. Na peko ti so lo sara kusala ti pionnier a hon ngu 14 laso awe, lo tene: “A nzere na mbi mingi ti hinga so Jéhovah apardone mbi awe!”

Ti duti nduru ti yeda na wango ti Nzapa alingbi ti kanga lege na e ti sara siokpari. Judith, so lo yeke na Zamani, atene: “Tongana mbi yeke na ngu 20, mbi to nda ti sara nzara ti mbeni koli so mbi na lo e yeke sara kua place oko. Koli ni nga asara kue ti tene mbi ye lo mingi. Azo ayeke ne lo mingi, kua ti lo ayeke tambela nzoni, me mbi hinga nga so lo yeke na wali na da. Mbi bâ so a yeke na mbi fadeso ti mä yanga ti Jéhovah wala ti ke lo. Mbi fa tënë ni na babâ na mama ti mbi. Babâ adabe ti mbi polele na ye so Jéhovah aku na mbage ti mbi ti sara. Lo tene tënë dandara; na a yeke ye so a hunda ti sara na mbi la. Atâa so kue, na bê ti mbi, mbi gi ti wara mbeni raison. Teti ayenga mingi, mama amû alakui ti fa na mbi tongana nyen andia ti Nzapa ayeke kota ye mingi nga ayeke bata zo na fini. Mbi yeke na ngia mingi so yeke yeke ndoye ti mbi na mbage ti Jéhovah akiri akono. Ti yeda na wango ti Jéhovah nga na fango ye ti lo amû ngia na mbi mingi; a sara si mbi wara ye ti nzoni na yâ ti angu mingi so mbi sara na kua ti pionnier. Nga, mbi wara mbeni nzoni koli na yâ ti bungbi so aye mbi nga na Jéhovah na bê ti lo kue.”

Biani, tapande ti azo so e sara tënë ti ala afa so tënë ti David so ayeke tâ tënë: “Ngia ayeke na zo so kengo-ndia ti lo a pardone awe, na lo so siokpari ti lo a honde awe. Ngia ayeke na zo so L’Eternel adiko sioye na li ti lo pëpe.”​—Psaume 32:1, 2.

Ti bi bê na azo ayeke ga na ngia

David asû na mbeti: “Ngia ayeke na zo so abi bê ti lo na awanzinga.” Lo kiri lo tene: “Fade L’Eternel azi lo na lâ ti sioni. L’Eternel abata lo, Lo bata lo na fini, na ngia ayeke na lo.” (Psaume 41:2, 3). Ndoye so David afa na mbage ti wazin Méphiboseth, molenge ti Jonathan so lo yeke kota kamarade ti David, ayeke tapande ti nzoni bibe so a lingbi a fa na mbage ti awanzinga.​—2 Samuel 9:1-13.

Marlies ayeke missionnaire a sara ngu 47 awe. Lege azi na lo ti fa tënë na azo ti Afrika, ti Asie na ti Poto ti Tö so akpe akodoro ti ala ndali ti akpale. Lo tene: “Akpale ti ala ayeke nde nde nga mingi ni ala bâ so a ye ala nzoni pëpe na a yeke sara ye nzoni na ala pëpe. Ti mû maboko na azo so asara si mbi yeke na ngia lakue.”

Marina, so ngu ti lo ahon 40 kete, atene: “Teti so mbi yeke kumbamba, mbi hinga tongana nyen bê ti zo ayeke dë tongana azo ayeke dä ti mû maboko na lo. Ye so apusu mbi ti pika singa wala ti tokua mbeti na azo ti wa ala. Mingi ti ala ayeke kiri singila na mbi ndali ni. Mungo maboko na azo ayeke zia ngia na bê ti mbi.”

Dimitar, so lo yeke na ngu 25 tongaso, atene: “Mama ti mbi abata mbi lani gi lo oko. Na ngoi so mbi de kete, a nzere na mbi mingi so surveillant ti Mandango Buku ti e ayeke gue na mbi na fango tënë yenga oko oko ti fa na mbi kode ni. Mbi ngbâ lakue ti kiri singila so lani lo sara tongaso lakue lakue. Mbi hinga so a yeke lani ngangu na lo ti zia nzara ti fango tënë na yâ ti mbi.” Teti so lo yeke na bê ti kiri singila ndali ti maboko so a mû na lo lani, Dimitar ayeke mû maboko fadeso na ambeni zo. Lo tene: “Fani oko na yâ ti nze oko, mbi yeke sara ngangu ti sigigi na fango tënë na mbeni maseka nga na mbeni mbakoro.”

Mbeti ti Psaume afa nga ambeni ye so ayeke sara si zo aduti na ngia. Mbeni kpengba ye ni ayeke ti zia bê na ngangu so Jéhovah amû ahon ti zia bê na ngangu ti mo mveni. Mbeni psaume atene: “Ngia ayeke na azo so ngangu ti ala ayeke na yâ [Jéhovah].”—Psaume 84:6.

A yeke ye so Corinna ahinga ni nzoni. Lo zia ndo ti lo na lo gue na mbeni kodoro so a hunda ti wara awafango tënë dä. Lo tene: “Yanga ti kodoro ni, ngobo ti sarango ye ni nga na sarango ye ti azo ni ayeke lani fini ye na mbi. Biani, ye ni kue ayeke lani gi fini ye na lê ti mbi. Mbeto asara mbi mingi ti fa tënë na ndo so. Mbi hunda Jéhovah ti mû maboko na mbi, na lo mû na mbi ngangu ti fa tënë na yâ ti lango ni kue na territoire ni so a yeke fa tënë dä mingi pëpe. Tongana ngoi ayeke hon, fango tënë na territoire ni aga gi mbeni ye so mbi yeke sara ni lakue. Mbi to nda ti a-étude mingi na mbi ngbâ lakue ti wara nzoni na lege ti ye so asi na mbi so. Mbi hinga so na ngangu ti Jéhovah, e lingbi ti hon ndo ti aye ti kangango lege kue so e bâ e tene e lingbi ti hon ndo ni pëpe.”

Biani, a yeke aye nde nde si ayeke mû lege na e ti wara tâ ngia, aye tongana dutingo na nzoni songo na Nzapa nga na awakua ti lo na ziango bê kue na Jéhovah. Ambeni ye ni nga ayeke ti yeda na wango ti lo na ti bi bê na azo. Tongana e yeke tambela na alege so Jéhovah afa nga e yeke kpe andia ti lo, e yeke duti na ngia ngbanga ti so e hinga so lo yeda na e.​—Psaume 89:16; 106:3; 112:1; 128:1, 2.

[Akete tënë na gbe ni]

[Foto na lembeti 12]

Maria

[Foto na lembeti 13]

Maree

[Foto na lembeti 13]

Susanne na Andreas

[Foto na lembeti 15]

Corinna

[Foto na lembeti 15]

Dimitar