Atënë so azo ahunda

Atënë so, “gi Lo oko ayeke na fini ti lakue lakue,” nga “Lo so zo oko abâ Lo pëpe, na zo alingbi bâ Lo pëpe”: nyen la afa atene a ndu Jésus, me Jéhovah Nzapa pëpe?

Bazengele Paul asû tënë so na mbeti: “Singo so fade Lo fa na gigi na lâ ti Lo mveni, Lo so a sala tënë nzoni na Lo, Lo oko ayeke Kota Gbia, Gbia ti agbia na Seigneur ti aseigneur; gi Lo oko ayeke na fini ti lakue lakue, Lo duti na lumière so zo alingbi si dä pëpe; Lo so zo oko abâ Lo pëpe, na zo alingbi bâ Lo pëpe.”​—1 Timothée 6:15, 16.

Na peko ti so ala gbu li ti ala ngangu, mingi ni, azo so ayeke fa tënë na ndo ti Bible atene: ‘Atënë so, “gi Lo oko ayeke na fini ti lakue lakue,” “Lo oko ayeke Kota Gbia” nga “Lo so zo oko abâ Lo pëpe, na zo alingbi bâ lo pëpe” andu mbeni zo nde pëpe, me a ndu Lo Ti Ngangu Ahon Kue.’ Tâ tënë, mara ti atënë tongaso alingbi ti ndu Jéhovah. Ye oko, atënë so angoro 1 Timothée 6:15, 16 afa so Paul ayeke sala tënë ti Jésus.

Na nda ti versê 14, Paul asala tënë ti “singo ti Seigneur ti e Jésus Christ”. (1 Timothée 6:14). Ni la, na versê 15, tongana Paul asala tënë ti ‘singo so fade Lo fa na gigi na lâ ti Lo mveni, Lo so a sala tënë nzoni na Lo, Lo oko ayeke Kota Gbia,’ lo yeke sala tënë ti singo ti Jésus, me ti Jéhovah Nzapa pëpe. Tongaso, ‘oko Kota Gbia’ ni ayeke zo wa? E bâ so a yeke na lege ni ti tene so Jésus la Paul atene lo yeke Kota Gbia ni. Ngbanga ti nyen? Ngbanga ti so atënë so angoro tele ti versê ni afa polele so Paul ayeke haka Jésus na agbia ti sese. Tongana ti so Paul atene, Jésus ayeke biani “Gbia ti agbia na Seigneur ti aseigneur”.a Ti bâ nzoni, tongana a haka Jésus na agbia ti sese so, Jésus ayeke ‘oko Kota Gbia’. Prophétie ti Daniel atene: “A mû na [Jésus] ngangu ti komande, na gloire na royaume, si azo kue, amara kue, na azo ti yanga nde nde kue, asala na Lo.” (Daniel 7:14). Mbeni gbia na sese ge so lo lingbi na ye ni so ayeke dä pëpe.

Ka ti so a tene “Lo oko ayeke na fini ti lakue lakue” so, e lingbi ti tene nyen dä? Ge nga, a yeke haka Jésus na agbia ti sese. Na popo ti agbia ti sese so, zo oko alingbi pëpe ti tene so a mû na ni fini ti lakue lakue. Me Jésus alingbi ti tene tongaso. Paul asû na mbeti: “E hinga, teti A yä Christ na popo ti awakinda, Lo kui mbeni pëpe; kui akomande Lo mbeni pëpe.” (aRomain 6:9). Tongaso, na yâ ti Bible Jésus si ayeke kozo zo so a tene lo lingbi ti kui mbeni pëpe. Na ngoi so Paul ayeke sû tënë so, Jésus si ayeke lani oko zo so alingbi ti kui mbeni pëpe.

A lingbi e girisa nga pëpe so tongana fade Paul atene Jéhovah Nzapa oko si ayeke na fini ti lakue lakue, tënë ti lo ni ayeke na lege ni pëpe, ngbanga ti so na ngoi so Paul ayeke sû tënë so na mbeti, Jésus nga kue ayeke na fini ti lakue lakue. Me tongana lo haka Jésus na agbia ti sese, Paul alingbi ti tene so Jésus oko si ayeke na fini ti lakue lakue.

Na ndo ni, a yeke tâ tënë so na peko ti so Jésus azingo na kuâ si lo kiri na yayu, a lingbi ti tene so lo yeke “Lo so zo oko abâ Lo pëpe, na zo alingbi bâ Lo pëpe.” Ti adisciple ti lo so a sa yingo na ndo ti ala, na peko ti so ala kui si a zingo ala ti ga azo ti yingo na yayu, ala yeke bâ Jésus (Jean 17:24). Me zo oko na sese ge ayeke bâ Jésus pëpe na yâ gloire ti lo. Tongaso, ngbele ye na ngoi so Jésus azingo na kuâ si lo kiri na yayu, a lingbi ti tene biani so “zo oko” abâ lo pëpe.

Tongana a bâ ni hio tongaso, mo bâ mo tene tënë so ayeke na 1 Timothée 6:15, 16 andu Nzapa. Me atënë so angoro versê ni nga na atënë ti yâ ti ambeni versê nde afa so Paul ayeke sala tënë ti Jésus.

[Kete tënë na gbe ni]