Atënë so azo ahunda

Na Israël ti giriri, lumière so alondo na Nzapa, so aza na Ndo ti Nzoni Ahon Kue na yâ ti tabernacle nga na ti temple, a hiri ni Schékinah. A ye ti tene nyen?

Jéhovah, Babâ ti ndoye nga Wabatango mara ti lo, lo sala lani si azo ti Israël abâ so lo yeke biani na popo ti ala. Mbeni lege so lo sala na ni ayeke ândö na lege ti mbinda ti lumière so aza ngangu, so andu ndo ti vorongo lo.

Ngangu lumière so ayeke lani mbeni fä so afa atene Jéhovah ayeke na popo ti mara ni. Lumière so aza na Ndo ti Nzoni Ahon Kue ti tabernacle na ti temple so Salomon aleke ândö. Me lumière ti kpene so aye ti tene pëpe so tâ Jéhovah lo mveni si aga aduti na popo ti ala. Nzapa alingbi pëpe ti duti na yâ mbeni da so azo si aleke ni (2 Chronique 6:18; Kusala 17:24). Lumière ti Nzapa so aza na yâ da ti Nzapa so ayeke nzoni-kue alingbi lani ti dë bê ti kota prêtre ni, nga na ti azo ti Israël kue, so biani Jéhovah ayeke na popo ti ala ti bata ala.

Na yâ yanga ti Araméen so aga na peko ti so a sû na Bible, a hiri lumière so Schékinah (shekhi·nahʹ), mbeni tënë so nda ni ayeke “ye so aduti” wala “ndo ti dutingo.” Tënë so asigigi na yâ ti Bible pëpe, me a yeke na yâ ti aBible ti yanga ti Hébreu so a kiri pekoni na Araméen, so a hinga ni nga na iri ti a-Targum.

Tongana lo yeke fa lani na Moïse tongana nyen a lingbi lo leke tabernacle ni, Jéhovah atene na lo: “Mo zia ndo-ti-be-nzoni na ndo Arche ni, na mo zia Témoin so fade Mbi mû na mo na yâ Arche ni. Na fade Mbi të mo kâ na nduzu na ndo ndo-ti-be-nzoni na popo ti achérub use so ayeke na ndo Arche.” (Exode 25:21, 22). Arche ni ayeke ândö mbeni caisse so a zia lor na tele ni kue, na aduti na Ndo ti Nzoni Ahon Kue. Achérub use ayeke lani na ndo ndo-ti-be-nzoni wala yanga ti Arche ni.

Na mbage wa si Jéhovah ayeke sala lani tënë? Lo fa tënë ni na Moïse, lo tene: “Fade Mbi si na yâ mbinda na ndo-ti-be-nzoni.” (Lévitique 16:2). Mbinda so aluti na ndo ndo-ti-be-nzoni ti Arche ni (so ayeke nzoni-kue), na popo ti achérub ti lor so ayeke na ndo ni. Wala mbinda ni ayo na nduzu tongana nyen wala lo luti na ndo achérub ni tongana nyen, Bible afa tënë na ndo ni pëpe.

Mbinda ti lumière so amû ândö yâ ti Ndo ti Nzoni Ahon Kue. Ti tâ tënë ni, a yeke ândö gi oko wâ so aza na yâ chambre so. Kota prêtre alingbi ti bâ ndo nzoni ndali ti lumière so na ngoi so lo yeke lï kâ na Lâ ti Lungulango siokpari; lo yeke luti na gbele Jéhovah.

Me wâ so alondo na Nzapa so, nda ni ayeke dä teti aChrétien? Bazengele Jean abâ lani na yâ suma, mbeni kodoro so “bï ayeke kâ pëpe.” Kodoro so ayeke Fini Jérusalem, so ayeke bungbi ti aChrétien so a sa yingo na ndo ti ala so alondo na popo ti awakinda ti komande na Jésus. Lumière ti kodoro so ayeke ti lâ wala ti nze pëpe. Me a yeke gloire ti Jéhovah Nzapa lo mveni si asu na ndo bungbi so, legeoko tongana lumière ti mbinda ti Schékinah so aza ândö na Ndo ti Nzoni Ahon Kue. Nga, Molenge ti Ngasangbaga ni, Jésus Christ, ayeke “lampe” ti kodoro ni. Na pekoni nga, “kodoro” so atokua lumière ti lo ti yingo nga na deba nzoni ti lo na ndo azo ti amara kue so a zi ala, ti fa na ala lege si ala tambela dä.​—Apocalypse 21:22-25.

Ngbanga ti so ala wara adeba nzoni mingi na maboko ti Nzapa, awakua ti Jéhovah alingbi ti dë kite pëpe so Jéhovah ayeke Berger ti ala nga Babâ ti ala ti ndoye.