A gonda ala ndali ti so ala mû Bible na nene ni

MARIANNA, mbeni Témoin ti Jéhovah ti mbongo ti Italie, ayeke na ngu 18 na lo yeke na tanga ti klase ti lo na kota da-mbeti. Lo na ambeni maseka Témoin ti Jéhovah ayeke na yâ ti oko ekole ni.

Marianna atene: “Ade ti sala angu mingi pëpe si e yeke diko versê ti lâ oko oko na yâ ti brochure Gingo nda ti Tënë ti Nzapa lâ oko oko na ngoi ti hungo tele. Gi oko ndo so e lingbi ti sala ni dä ayeke mbeni oko ti acouloir so ayeke na tele ti biröo ti awafango mbeti ti ekole ni. Place ni adë ka kue pëpe. Mingi ti awafango mbeti so ayeke hon ayeke bâ e, na ambeni aluti ti bâ ye so e yeke sala. Ye so amû lege na e mingi ti kiri tënë na ahundango tënë ti ala. Tongana e tara ti diko, lâ oko oko wafango mbeti oko tongaso ayeke luti ti mä e. Ala mingi aluti ti mä lisoro ti e na ndo versê ti Bible ti lango ni, na ala fa ngia ti bê ti ala teti so e, aTémoin ti Jéhovah, e mû na nene ni aye ti yingo. Mbeni lâ, use wayinda ti ekole ni atisa lani e ti sala lisoro ti e ni na yâ biröo ti awafango mbeti ni.

“Na peko ti so lo bâ ndo so e yeke diko ka versê dä, wafango mbeti ti mbi ahunda na wayinda ni wala e lingbi ti sala ni na yâ ti mbeni oko ti aklase, so ayeke kpö. Lo yeda, na wafango mbeti ti mbi agonda lani e na devant ti a-élève ti klase ni kue teti nzoni tapande ti e. E kue e yeke na ngia mingi teti kota matabisi so Jéhovah amû na e.”