‘Lo kpa tênë ti sardoine’

BAZENGELE Jean awara suma ti mbeni trône ti gloire na yayu. Zo so aduti na ndo ni akpa “tênë ti jaspe”. Zo ni ayeke nga tongana “sardoine.” (Apocalypse 4:2, 3). So ayeke atênë wa?

A yeke pëpe atênë so lumière ayeke hon na yâ ni pëpe, so gi ndo ni si ayeke za. Na ngoi ti giriri, a sala kusala na tënë ti Grec so a kiri pekoni na “jaspe” ti fa atênë ti nzoroko nde nde, so andu nga atênë ti ngele ngangu so zo alingbi ti bâ ndo na yâ ni. A. T. Robertson, na yâ mbeni buku (Word Pictures in the New Testament) atene so “tênë ti jaspe” ti Apocalypse 4:3 “ayeke [lani] pëpe tongana jaspe ti ngoi ti e so ayeke ti ngele ngangu pëpe.” Nga, kete na pekoni na yâ buku ti Apocalypse, Jean afa ye so Jérusalem, gbata ti yayu, ayeke kpa ni tongana lo tene: “Lumière ti kodoro ni ayeke tongana tênë so ngele ni ayeke ngangu mingi, a yeke tongana tênë ti jaspe, ngelengele tongana cristal.” (Apocalypse 21:10, 11). A lingbi ti tene so atênë so Jean asala tënë ni ayeke atênë so lumière alingbi ti hon na yâ ni.

Lo so a fa lo tongana lo so aduti na ndo trône ti suma ti Jean ayeke Zo so ayeke na gloire ahon tanga ti azo kue na yâ dunia, Jéhovah Nzapa. Lo yeke na sioni oko pëpe nga lo yeke nzoni-kue ahon tanga ti azo kue. Na guengo oko na ye so, bazengele Jean asû na mbeti: “Nzapa ayeke Lumière, na bingo ayeke na yâ Lo kete pëpe.” (1 Jean 1:5). Ni la, Jean awa aita ti lo ti ‘sukula bê ti ala si a vulu, legeoko tongana Jéhovah ayeke na be-vulu.’​—1 Jean 3:3.

Ye wa a lingbi e sala ti tene Nzapa abâ e tongana azo so ayeke na sioni kete pëpe? Mabe so e yeke na ni na yâ mênë so Christ atuku teti pardon ti asiokpari ti e ayeke biani kota ye mingi. A lingbi e ngbâ nga lakue ti “tambela na yâ lumière” na mandango Bible lakue nga na salango ye alingbi na ye so Bible afa.​—1 Jean 1:7.