Atënë so azo ahunda

So David na azo ti lo ate lani amapa ti nzoni-kue, a ye ti fa so tongana zo ayeke tâ na yâ ti ye ti ngangu lo lingbi ti doro ndia ti Nzapa senge na ye oko asi na lo pëpe?​—1 Samuel 21:1-6.

Tongana ti so Lévitique 24:5-9 afa, a yeke gi aprêtre si ayeke te lani amapa ti nzoni-kue so na lâ ti Sabbat oko oko a yeke zia ambeni fini ni na place ni. A mû kpengba-ndia so lani ti tene a bâ amapa ni tongana ye so ayeke nzoni-kue, na tongaso gi akoli so angbâ na yâ kusala ti Nzapa si alingbi ti te ni, so ti tene aprêtre. Ti mû ni na mbeni senge zo so ayeke sala kua wala ti te ni gi ngbanga ti nzerengo tele ayeke biani sioni. Ye oko, Prêtre Ahimélec asala siokpari pëpe tongana lo mû lani amapa ti nzoni-kue so na David na azo ti lo.

A bâ so David ayeke sala lani mbeni mbilimbili kua so Gbia Saül amû na lo. Nzara asala lo na azo ti lo ni. Ahimélec agi kozoni ti hinga wala ala sala pëpe mbeni ye so asala si ala ga sioni. Atâa so a lingbi ti bâ biani tengo amapa ti nzoni-kue so tongana dorongo ndia, a yeke lani mbeni ye so ague tâ oko na kua so a fa ti sala na ni. Bango ye na lege so amû lege na Ahimélec ti bâ so ndia andu tënë ni so pëpe. Même Jésus Christ amû tapande ti ye so ti fa tongana nyen ye so aFarizien afa na ndo batango lâ ti Sabbat ayeke tâ ngangu mingi nga a yeke na lege ni pëpe.​—Matthieu 12:1-8.

Ye oko, ye so David na azo ti lo asala lani aye pëpe ti tene so zo alingbi ti doro ndia ti Nzapa tongana lo yeke tâ na yâ ti ye ti ngangu. Na tapande, mbeni mara ti kota kpale so asi tongana aturugu ti Israël ayeke tiri lani na aPhilistin. Gbia Saül atene: “Zonga ayeke na li ti zo so ate kobe kozoni [si] lâ akui na kozoni [si] mbi futa kula na awato ti mbi.” Bible atene: “Na lâ ni so, ala [“ngbâ ti”, NW ] fâ aPhilistin.” Ngangu ti aturugu ahunzi ndali ti bira nga nzara asala ala, ala gbu anyama na ala “fâ ala [na sese] senge, na ala te ni na mênë ni kue.” (1 Samuel 14:24, 31-33). Ala sala siokpari ti ke Jéhovah na lege so ala doro ndia ti lo na ndo mênë. Ye so ala sala ague nde na oko kusala so Nzapa afa ti sala na mênë, so ti tene ti “sala songo” teti siokpari (Lévitique 17:10-12; Genèse 9:3 4). Na be-nzoni, Jéhovah ayeda lani na asandaga so a mû ni gi ndali ti ala so asala siokpari ni.​—1 Samuel 14:34, 35.

Biani, Jéhovah aku na mbage ti e ti bata andia ti lo na yâ ti aye kue. Bazengele Jean atene: “So ayeke ndoye ti Nzapa: e bata komandema ti Lo.”​—1 Jean 5:3.

[Foto na lembeti 30]

A yeke zia lani afini mapa ti nzoni-kue na yâ tabernacle na lâ ti Sabbat oko oko