Mo lingbi ti fa lege na gigi ti mo ti kekereke?

A DIKO kozoni awe ye kue so ayeke si na yâ gigi ti e? Aye so e yeke soro ni na yâ fini ti e ayeke sala ngangu pëpe na ndo gigi ti e ti kekereke?

Bâ kete so a yeke zo si ayeke fa lege na ye kue so ayeke si na yâ gigi ti lo. Tongana a yeke tongaso, a lingbi ti diko mbeni zo kozoni ti sala mbeni mbilimbili kua tongaso wala ti duti na mbeni kota ndo? Nzapa alingbi ti sala si ye so bê ti lo aye teti sese aga tâ tënë tongana nyen, tongana azo ayeke na liberté ti fa lege na ye kue so ayeke si na yâ gigi ti ala? Bible amû na e anzoni kiringo tënë na ahundango tënë so.

Tënë so atene Nzapa si adiko ague oko na ngangu ti sorongo ye zo mveni?

Bi bê na lege so Jéhovah Nzapa asala na e. Bible atene: “Na image ti Nzapa Lo créé [zo]; Lo créé ala koli na wali.” (Genèse 1:27). Teti so e yeke na asalango ye so akpa ti Nzapa, e yeke na ngangu ti fa na gigi asalango ye ti lo tongana ndoye, mbilimbili, ndara na ngangu. Nzapa amû na e nga ngangu ti soro ye e mveni. Na ye so asala si e yeke nde na popo ti aye kue so lo créé na sese ge. E lingbi ti soro ti mû peko ti andia ti Nzapa na ndo lege ti tambela wala pëpe. Nda ni la si prophète Moïse alingbi lani ti tene: “Laso mbi hiri yayu na sese ti ga atémoin ti ke i, mbi zia na gbele mo fini na kui, nzoye na zonga; tongaso mo kamata fini, si mo ngbâ na fini, mo na amolenge ti mo; mo ndoye L’Eternel Nzapa ti mo, mo mä yanga ti Lo, na mo zia bê ti mo na Lo.”​—Deutéronome 30:19, 20.

Ye oko, liberté ti soro ye ti bê ti zo mveni aye ti tene pëpe so a zi e awe na gbe ti andia kue. A zi e pëpe na gbe ti andia ti ndagigi nga na ti lege ti tambela so Nzapa azia na sese ti tene aye kue atambela nzoni na aduti na siriri. A zia andia ni so ndali ti nzoni ti e, na ti doro ala alingbi ti ga na akota kpale na pekoni. Bâ gi ye so alingbi ti si tongana mbeni zo asoro ti girisa ndia ti ndagigi so andu ngangu ti sese ti gboto aye na mbage ti lo, na tongaso lo ma na li ti mbeni da so ayo na nduzu na lo hulu na sese!​—aGalate 6:7.

Liberté ti soro ye so e yeke na ni, azia na e mbeni katikati so ambeni créature ti Nzapa ayeke na ni pëpe. Wasungo mbeti Corliss Lamont ahunda tënë so: “Tongana nyen e lingbi ti hunda na azo ti sala ye na lege ni, na pekoni e dë ngbanga na li ti ala ndali ti so ala sala ye ti sioni, tongana e yeda . . . so a diko ala kozoni awe ti sala ye ni?” Biani e lingbi ti sala tongaso pëpe. A lingbi ti hunda pëpe na anyama ti kiri tënë ndali ti lege ti tambela ti ala, teti so a dü ala ti sala ye gi tongaso; nga a lingbi pëpe ti hunda na a-ordinateur ti kiri tënë teti kusala so ala sala, ngbanga ti so na lekengo ala a zia na yâ ti ala ambeni programme so ala lingbi ti mû gi pekoni. Tongaso, liberté ti soro ye so e azo e yeke na ni azia na ndo e mbeni kota kungba, na a lingbi e kiri tënë ndali ti asalango ye ti e.

Bâ na lege wa Jéhovah ayeke duti pëpe Nzapa ti ndoye nga ti mbilimbili tongana kozoni si a dü e, lo diko kozoni awe ye so e yeke sala ni na yâ gigi ti e nga na pekoni lo hunda na e ti kiri tënë ndali ti asalango ye ti e so! Lo yeke sala tongaso pëpe teti “Nzapa ayeke Ndoye”, na “lege ti Lo kue ayeke mbilimbili”. (1 Jean 4:8; Deutéronome 32:4). Na mungo na e liberté ti soro ye ti bê ti e, na oko ngoi ni, Nzapa ‘adiko pëpe zo wa si ayeke wara salut nga zo wa si ayeke wara ngbanga,’ tongana ti so azo so ayeda na tënë so ayeke tene. Liberté so zo ayeke na ni ti soro ye ti bê ti lo ague tâ oko pëpe na tënë so atene Nzapa adiko kozoni awe ye so ayeke si na yâ fini ti zo.

Bible afa polele so ye so e yeke soro ayeke gbian ye so ayeke si na gigi ti e. Na tapande, Nzapa atisa azo ti sioni lo tene: “I kiri fadeso, i oko oko kue i zia sio lege ti i, na sioye so i yeke sala . . . na fade Mbi sala sioni na i pëpe.” (Jérémie 25:5, 6). Nda ti tisango ndo so ayeke duti ande dä pëpe tongana Nzapa adiko kozoni awe ye kue so ayeke si na yâ gigi ti zo oko oko kue. Na ndo ni, Bible atene: “Tongaso i changé bê ti i, i changé lege ti i, si Nzapa alingbi mbô siokpari ti i, na ngoi ti kiri ti wara ngangu alingbi londo na gbele Seigneur ti ga na i.” (Kusala 3:19). Ngbanga ti nyen Jéhovah ayeke hunda na azo ti changé bê na ti ke lege ti ala tongana lo hinga kozoni awe so ala lingbi ti sala mbeni ye oko pëpe ti gbian ye kue so ayeke si na yâ gigi ti ala?

Bible asala tënë ti ambeni zo so Nzapa ahiri ala ti komande tongana agbia na yayu legeoko na Jésus Christ (Matthieu 22:14; Luc 12:32). Ye oko, Bible atene so tongana ala gbu ngangu juska na nda ni pëpe, fade ala yeke girisa matabisi so (Apocalypse 2:10). Ngbanga ti nyen Nzapa ahiri ala tongana lo mû desizion kozoni awe so a yeke soro ala ande pëpe? Bâ nga atënë so bazengele Paul atene na afon lo wamabe. Lo tene: “Tongana e gue na bê ti e mveni ti sala sioni nda ni e hinga tene-biani awe, sacrifice teti siokpari angbâ mbeni pëpe.” (aHébreu 10:26). Nda ti gbotongo mê so ayeke duti ande dä pëpe tongana Nzapa adiko kozoni awe ye kue so ayeke si na yâ gigi ti ala. Me, ambeni atene so Nzapa adiko kozoni awe ambeni zo ti duti agbia legeoko na Jésus Christ.

Nzapa adiko kozoni awe bungbi ti azo ni wala zo oko oko?

Bazengele Paul asû na mbeti: “[Nzapa] amû nzoye kue ti Yingo na e na yayu na yâ Christ; legeoko tongana Lo hiri e na yâ Lo giriri kozoni si A sala gere ti sese . . . teti Nzapa adiko e giriri kozoni ti wara ndo-ti-amolenge na yâ Lo mveni na lege ti Jésus Christ.” (aEphésien 1:3-5). Ye wa Nzapa adiko kozoni, na a ye ti tene nyen tongana a tene a soro ala “giriri kozoni si A sala gere ti sese”?

Versê so atene so Nzapa asoro lani ambeni hale ti kozo koli, Adam, ti komande na Christ na yayu (aRomain 8:14-17, 28-30; Apocalypse 5:9, 10). Ye oko, ti tene so Jéhovah Nzapa adiko awe ambeni zo ti wara matabisi ni ngu saki mingi kozoni si a dü ala, a yeke gue nde na tënë ti liberté so Nzapa amû na azo ti soro ye so bê ti ala aye. Ye so Nzapa adiko kozoni ayeke lani mbeni bungbi ti azo, me pëpe azo ti yâ ni oko oko.

Ti mû mbeni tapande: Bâ kete so mbeni ngorogbia amû desizion ti zia na sese mbeni ndokua so ayeke nde. Ngorogbia ni adiko kozoni awe akusala so ndokua ni ayeke sala, ngangu nga na konongo ti lo. Na pekoni so a zia ndokua ni na sese, lo to nda ti sala kusala teti ambeni ngoi kete, na azo ti yâ ti ndokua ni atene: “Ngorogbia adiko teti mbeni ngu kozoni awe kusala so e yeke sala. Fadeso zia e to nda ti kusala so a mû na e.” Mo yeke tene ande so ngorogbia ni adiko lani kozoni awe azo oko oko kue so ayeke duti na yâ ti ndokua so? Oko pëpe. Legeoko nga, Jéhovah adiko kozoni awe so lo yeke zia na sese mbeni ye so ayeke hunzi aye ti sioni so aga na peko ti siokpari ti Adam. Lo diko kozoni mbeni bungbi ti azo so ayeke sala kusala na yâ ye so lo leke, me lo diko pëpe azo ti yâ ni oko oko. A yeke soro ala ande na pekoni, me ye so ala yeke soro ti sala na yâ fini ti ala ayeke fa na nda ni so a yeda na ala wala pëpe.

Bazengele Paul aye ti tene lani nyen tongana lo tene: “[Nzapa ahiri] e na yâ Lo giriri kozoni si A sala gere ti sese”? Sese so bazengele Paul ayeke sala tënë ni ge ayeke pëpe sese so Nzapa aleke ni na ngoi so lo sala Adam na Eve. Sese ni so ayeke lani “nzoni mingi”, siokpari na ye so abuba ayeke na yâ ni kete pëpe (Genèse 1:31). A hunda pëpe ti “ton” wala ti zi ni na yâ ti siokpari.​—aEphésien 1:7.

Sese so Paul asala tënë ni ayeke lo so abâ gigi na peko ti kengo yanga ti Adam na Eve na yaka ti Eden; sese ni so ayeke ti lo nde mingi na kozo sese so Nzapa aleke ni giriri ti sala na ye so bê ti lo aye. A yeke sese so ato nda ni na ngoi so Adam na Eve adü amolenge. Sese ni so ayeke azo so ague yongoro na Nzapa na so aga ngbâa ti siokpari nga na ti ye so abuba. A yeke mbeni sese ti azo so alingbi ti ton ala nde na Adam na Eve so asala lani siokpari na mbana.​—aRomain 5:12; 8:18-21.

Jéhovah Nzapa alingbi lani ti leke kpale so aga na peko ti kengo yanga so alondo na Eden na lê ni lê ni. Tongaso, hio na pekoni so a hunda ti sala tongaso, lo diko kozoni awe mbeni ye so ayeke nde, so lo yeke sala kusala na ni ti sö azo na yâ ti siokpari ti Adam, Royaume ti Messie so ayeke na maboko ti Jésus Christ (Matthieu 6:10). Nzapa asala lani ye so “kozoni si A sala gere ti sese” ti azo so alingbi ti ton ala, so ti tene, kozo si Adam na Eve so ake lani yanga ti Nzapa awe adü amolenge.

Mingi ni, ti tene azo asala mbeni ye ti bê ti ala, a hunda na ala ti leke mbeni kapa ti kusala. Tënë so atene Nzapa ayeke diko ye kozoni si asi ague oko na bibe so atene Nzapa alingbi ti duti na mbeni kapa ti kusala so lo sû na yâ ni aye kue so lo diko kozoni ti sala teti ndagigi. Roy Weatherford asû na mbeti lo tene so “na lê ti awasenda-ndara mingi, ala tene so tongana Nzapa ayeke diko kozoni pëpe anzene nzene ye kue so ayeke si, ye so ayeke gue nde na kota ngangu ti lo.” Nzapa ayeke na bezoin ti fa anzene nzene ye kue kozoni si ye ni asi?

Teti so lo yeke na ngangu so nda ni ayeke pëpe na so ndara ti lo ayeke kota mingi, Jéhovah alingbi ti leke fade fade akpale kue so ayeke ga na peko ti so acréature ti lo asala kusala na liberté ti soro ye so ala yeke na ni (Esaïe 40:25, 26; aRomain 11:33). Lo lingbi ti sala tongaso na lê ni lê ni sân ti duti na mbeni kapa so lo sû aye kue na yâ ni. Nde na azo ti mitele so ayeke mbilimbili-kue pëpe na so ngangu ti ala ayeke na katikati, Nzapa ti Ngangu Ahon Kue ayeke pëpe na bezoin ti mbeni kapa so na yâ ni lo fa anzene nzene ye kue so ayeke si na yâ fini ti azo oko oko kue na ndo sese (aProverbe 19:21). A hon ti sala tënë ti mbeni kapa ti kusala so a fa anzene nzene ye kue na yâ ni, ambeni Bible akiri na peko ti aEphésien 3:11 na tenengo so Nzapa ayeke na mbeni “ye so Lo leke na bê ti lo giriri kozoni teti lakue lakue.”

Na lege wa mo lingbi ti sala ngangu na ndo ti gigi ti mo ti kekereke?

Nzapa aleke na bê ti lo ti sala mbeni ye teti sese, ye so lo diko ni kozoni awe ti si. Apocalypse 21:3, 4 atene: “Bâ, Tabernacle ti Nzapa ayeke na popo ti azo, fade Lo duti na ala, na ala ga azo ti Lo, na Nzapa mveni ayeke na popo ti ala, Lo yeke Nzapa ti ala; fade Lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.” Biani, sese so ayeke ga ande paradis gi tongana ti so Jéhovah aleke ti sala ni giriri (Genèse 1:27, 28). Hundango tënë ni ayeke so: Mo yeke duti ande na yâ ni? Kiringo tënë ni aluti na ndo aye so mo yeke soro ti sala ni laso. Jéhovah adiko pëpe ye kue so ayeke si na yâ gigi ti mo.

Sandaga ti kota ngele ti Molenge ti Nzapa, Jésus Christ, azi lege na zo kue so ayeke fa na gigi mabe na yâ lo ti wara fini ti lakue lakue (Jean 3:16, 17; Kusala 10:34, 35). Bible atene: “Zo so amä na bê na Molenge ni ayeke na fini ti lakue lakue; me lo so amä na bê na Molenge ni pëpe, fade lo bâ fini pëpe.” (Jean 3:36). A yeke na lege ti mandango ye na yâ Bible: mandango ye na ndo Nzapa, na ndo Molenge ti lo, na ndo ye so bê ti Lo aye nga na salango ye alingbi na ni, si mo lingbi ti soro fini. Zo so asala ye so ague oko na tâ ndara so ayeke na yâ Mbeti ti Nzapa ayeke na beku so “fade lo duti na siriri, na bê ti lo aduti nzoni, na mbito ti sioye asala lo pëpe.”​—aProverbe 1:20, 33.

[Afoto na lembeti 5]

Nde na anyama, azo ayeke kiri tënë ndali ti asalango ye ti ala

[Lingu ti foto na lembeti 5]

Ngualo: Foto ti Cortesía de GREFA