Ndoye ti Nzapa abungbi ala oko

TONGANA kongregation ti aChrétien abâ gigi kozoni, atâa so azo ti yâ ni alondo na ando nde nde, mbeni oko ti akota ye so amû lege ti hinga na ni ayeke dutingo beoko ti lo. Awavorongo tâ Nzapa so alondo na akodoro ti Asie, ti Poto nga na ti Afrika. Ala yeke azo so dutingo ti ala ayeke lani nde nde: aprêtre, aturugu, angbâa, azo so akpe kodoro ti ala, azo so asala akua ti maboko, akua ti biröo nga na azo ti dengo buze. Ambeni ayeke aJuif me ambeni ayeke aJuif pëpe. Mingi ti ala ayeke giriri azo so asala lango-sioni, so abungbi koli na koli wala wali na wali, angbâa ti sämba, awanzi wala azo ti gbungo ye ti azo na ngangu. Ye oko, tongana ala ga Chrétien awe, ala zia lege ti asioni salango ye ti ala, ala ga ndulu na mba na dutingo beoko na yâ mabe.

Ye nyen amû lani lege na akozo Chrétien ti ga na azo so kue ti duti beoko? Ngbanga ti nyen ala yeke lani na siriri na popo ti ala nga na tanga ti azo kue? Ngbanga ti nyen ala yôro tele ti ala lani pëpe na yâ akengo yanga ti akota zo ti kodoro nga na abira? Ngbanga ti nyen bungbi ti vorongo ti aChrétien ti giriri ayeke nde mingi na akota bungbi ti vorongo Nzapa ti laso?

Ye wa abungbi azo ti kongregation ti duti ndulu na mba?

Kota ye so abungbi awamabe na amba ti ala na ngoi ti akozo Chrétien ayeke ndoye ti Nzapa. A-Chrétien so ahinga so kozo ye so a hunda na ala ayeke ti ndoye tâ Nzapa, Jéhovah, na bê ti ala kue, na âme ti ala kue nga na bibe ti ala kue. Na tapande, a hunda na bazengele Pierre so ayeke Juif ti gue ti sala vizite na da ti mbeni zo so ayeke Juif pëpe, mbeni zo so fade lo lingbi mbilimbili ti ga ndulu mingi na tele ti lo pëpe. Kozoni kue, ye so apusu lo ti mä yanga ayeke ndoye teti Jéhovah. Pierre nga na ambeni Chrétien ti giriri ayeke na nzoni songo na Nzapa. Songo ni so aluti na ndo ti tâ hingango ye na ndo asalango ye ti lo, aye so lo ye na so lo ke. Tongana ngoi ayeke hon, aChrétien ni kue agbu nda ti ye so bê ti Jéhovah aye na mbage ti ala, so a yeke ti “duti na bibe oko na tënë oko.”—1 aCorinthien 1:10; Matthieu 22:37; Kusala 10:1-35.

Ye so abungbi nga awamabe ni oko ayeke mabe ti ala na Jésus Christ. Ala ye lani ti tambela tâ gi na peko ti lo. Lo tene lani na ala: “I ndoye tele ti i na popo ti i; legeoko tongana Mbi ndoye i . . . Na lege so, fade azo kue ahinga i yeke adisciple ti Mbi, tongana i ndoye tele ti i na popo ti i.” (Jean 13:34, 35). A lingbi ndoye so aduti lani gi pëpe mbeni senge bibe so ayeke hon hongo, me mbeni ndoye so apusu zo ti gbanzi ye na tele. Ye ti pekoni ayeke duti ande nyen? Jésus asambela lani ndali ti ala so amä na bê na lo: “Mbi sambela . . . si ala kue alingbi ga oko, legeoko tongana Mo, Babâ, Mo yeke na yâ Mbi, na Mbi yeke na yâ Mo, si ala lingbi ga oko na yâ E nga; si sese so alingbi mä na bê so Mo to Mbi.”—Jean 17:20, 21; 1 Pierre 2:21.

Jéhovah atuku lani yingo vulu wala ngangu ti lo na ndo ti atâ wakua ti lo. Yingo so amaï dutingo beoko na popo ti ala na amû lege na ala ti gbu nda ti afango ye ti Bible so akongregation kue ayeda na ni. Awavorongo Jéhovah ayeke fa lani gi oko tokua: ti sala si iri ti Jéhovah aga nzoni-kue na lege ti Royaume ti Messie ti Nzapa, mbeni ngorogbia ti yayu so ayeke komande na ndo azo kue. Akozo Chrétien agbu nda ti ye so a hunda na ala ti duti “ti sese so pëpe.” Tongaso, tongana asenge zo ti kodoro asala wusuwusu wala bira atï, aChrétien aduti ti ala nde. Ala yeke gi ti duti na siriri na azo kue.​—Jean 14:26; 18:36; Matthieu 6:9, 10; Kusala 2:1-4; aRomain 12:17-21.

Awamabe ni kue ayô kungba ti ala ti maï dutingo beoko. Na lege wa? Na bango mbilimbili si tambela ti ala ague oko na Bible. Tongaso, bazengele Paul atene lani na aChrétien: “I zia lege ti i ti giriri, zo-ti-giriri so ayeke futi na lege ti nzara so ahanda lo”, na “i yü zo-ti-fini”.​—aEphésien 4:22-32.

A bata lani dutingo beoko

Biani, akozo Chrétien ayeke lani mbilimbili-kue pëpe, na aye asi so azia lani dutingo beoko ti ala na yâ kpale. Na tapande, buku ti Kusala 6:1-6 asala tënë ti mango tele pëpe so alondo na popo ti aChrétien Juif so ayeke tene yanga ti Grec na ala so ayeke tene yanga ti Hébreu. Ala so ayeke tene yanga ti Grec abi bê ti ala so a sala ye na mbage ti ala na lege ni pëpe. Ye oko, tongana a fa tënë ni na ala, abazengele aleke ni hio nga tâ na lege ti mbilimbili. Na pekoni, mbeni kota tënë ti mabe alondo na a ga na dengo gaba na ndo tënë ti kungba so aChrétien so ayeke aJuif pëpe ayeke na ni na yâ kongregation. Na ndo tënë so, a mû mbeni desizion so aluti na ndo akpengba-ndia ti Bible, na azo kue ayeda na desizion ni.​—Kusala 15:1-29.

Atapande so afa so apapa so adü lani pëpe akangbi ti tënë ti kete mara wala azi lege na tënë ti mabe so ala mä tele na ndo ni pëpe ti kangbi dutingo beoko na yâ ti kozo kongregation ti aChrétien. Ngbanga ti nyen yâ ti kongregation ni akangbi pëpe? A yeke ndali ti ambeni ye so alingbi fade ti bata kongregation ni ti duti beoko nga na siriri. A yeke aye tongana ndoye teti Jéhovah, mabe na Jésus Christ, ndoye so apusu zo ti mû tele ti lo ndali ti mba, yengo dä na fango lege ti yingo vulu, oko gbungo nda ti afango ye ti Bible nga dutingo ndulu ti gbian lege ti tambela ti zo mveni.

Beoko na yâ vorongo laso

Azo alingbi ti duti beoko tongaso nga laso? A-oko ye so alingbi ti ngbâ ti bungbi azo ti mbeni vorongo na nga ti mû lege na ala ti duti na siriri na amba ti ala ti mara nde nde kue? A lingbi biani! A-Témoin ti Jéhovah aduti beoko na yâ songo ti aita ti ndo lê sese kue na yâ akodoro na azoa ahon 230. Nga, oko ye so abungbi lani akozo Chrétien ti duti beoko abungbi nga aChrétien ti duti beoko laso.

Kota ye so amû maboko na dutingo beoko so aTémoin ti Jéhovah ayeke na ni ayeke bê ti ala so ala mû ni kue na Jéhovah Nzapa. So aye ti tene so ala yeke sala ngangu ti duti be-ta-zo na lo na yâ aye kue. A-Témoin ti Jéhovah afa nga na gigi mabe na Jésus Christ nga na aye so lo fa. A-Chrétien so afa na mbage ti amba ti ala wamabe mbeni ndoye so apusu zo ti gbanzi ye na tele nga ala yeke fa gi oko nzo tënë ti Royaume ti Nzapa na yâ ti akodoro kue so ala yeke sala kusala dä. Ala yeke na ngia ti sala tënë ti Royaume so na azo ti Église nde nde kue, ti mara nde nde kue, ti kodoro nde nde kue nga na azo so dutingo ti ala yeke nde nde. A-Témoin ti Jéhovah aduti nga nde na aye ti sese so; na salango tongaso amû maboko na ala ti luti na gbele ngangu so aye ti poroso, angobo ti salango ye, dutingo ti azo nga na dengo buze ayeke sala ti bi kangbi mingi na popo ti azo. A-Témoin ti Jéhovah kue ayeda na kungba so ala yeke na ni ti maï dutingo beoko na salango si tambela ti ala ague oko na akpengba-ndia ti Bible.

Dutingo beoko agboto ambeni zo

Fani mingi, dutingo beoko so agbu bê ti ambeni zo so ayeke aTémoin pëpe. Na tapande, Ilsea ayeke lani mbeni mamère so alango na yâ ti da so a leke ngbanga ti ala na kodoro ti Zamani. Ye nyen agboto lo na mbage ti aTémoin ti Jéhovah? Ilse atene: “Ala yeke anzoni zo so mbi de mbi tingbi na ala lâ oko pëpe. Ala yeke gue na bira pëpe, ala yeke sala ye ti sioni na zo oko pëpe. Ala ye ti mû maboko na azo ti wara fini so ayeke na ngia na yâ paradis na ndo sese na gbe ti Royaume ti Nzapa.”

Mbeni tapande ni ayeke ti Günther, so lo yeke lani mbeni turugu ti Zamani so a tokua lo na France na ngoi ti Use Bira so Amû Sese Kue. Mbeni lâ, mbeni pasteur ti aProtestant asambela na ndo ti bungbi ti aturugu so Günther ayeke dä. Pasteur ni asambela ti hunda na Nzapa ti bata ala, ti mû na ala maboko na nga ti sala si ala sö benda. Na peko ti sambela ni, Günther ague na ndo so a zia lo dä ti sala kua tongana sinziri. Na yâ ti lunette ti lo so abâ ndo ayo, lo bâ nga so mbeni prêtre ayeke sambela na ndo ti aturugu so ayeke awato ti ala. Na pekoni, Günther atene: “Peut-être prêtre so ayeke sambela nga ti hunda na Nzapa ti bata ala, ti mû na ala maboko na nga ti sala si ala sö benda. Mbi hunda tele ti mbi, na lege wa aÉglise so atene ala yeke aChrétien alingbi ti ga awato na yâ ti mbeni oko bira.” Aye so lo bâ ni angbâ lakue na yâ li ti lo. Na pekoni, na ngoi so lo tingbi na aTémoin ti Jéhovah so ayeke bi tele ti ala na yâ ti bira pëpe, Günther alï na yâ songo ti ala ti aita ti ndo lê sese kue.

Ashok na Feema ayeke lani membre ti mbeni bungbi ti vorongo Nzapa na mbage ti Asie. Na yâ da ti ala, ala leke mbeni ndo ti sambelango mbeni nzapa. Na ngoi so mbeni kota kobela asala ngangu na sewa ti ala, ala gi ti bâ wala vorongo ti ala ayeke na lege ni. Na salango lisoro na aTémoin ti Jéhovah, bê ti Ashok na Feema apika ndali ti afango ye ti Bible nga na ndoye so ayeke na popo ti aTémoin; fadeso ala yeke awafango nzo tënë ti Royaume ti Jéhovah so ayeke na wâ.

Ilse, Günther, Ashok na Feema abungbi legeoko na aTémoin ti Jéhovah kutu mingi na yâ songo ti aita ti ndo lê sese kue. Ala mä na bê na zendo ti Bible so afa so a-oko ye so abungbi ala beoko na yâ vorongo laso ayeke bungbi nga azo kue so amä yanga ti Nzapa na yâ ngoi kete. Na lâ ni kâ, fade salango sana, mango tele pëpe na kangbi so abâ gigi na iri ti abungbi ti vorongo Nzapa ayeke duti ande mbeni pëpe. Fade sese kue ayeke duti beoko na yâ vorongo tâ Nzapa, Jéhovah.​—Apocalypse 21:4, 5.

[Kete tënë na gbe ni]

[Foto na lembeti 4]

Atâa so ala londo na ando nde nde, akozo Chrétien aduti lani beoko