Atënë so azo ahunda

Kongregation ti aChrétien abâ tengo ye ahon ndo ni tongana nyen?

Tënë ti Nzapa ake na kuru go tengo ye na nyongo ye ahon ndo ni, ngbanga ti so a lingbi na azo ti Nzapa pëpe. Ni la, ti kongregation ti aChrétien, zo so a hinga lo tongana zo ti tengo ye ahon ndo ni, lo yeke legeoko tongana ngbâa ti sämba. Ngbâa ti sämba na zo ti tengo ye ahon ndo ni alingbi pëpe ti duti na yâ kongregation ti aChrétien.

A-Proverbe 23:20, 21 atene: “Mo duti pëpe na popo ti azo so anyon vin mingi, wala na popo ti azo so ate nyama ahon ndo ni. Teti zo so ayeke ngbâa ti sämba na zo so ayeke watengo-ye, fade nzinga asala ala, na nzara ti lango asala si zo ayü gi fango bongo.” Deutéronome 21:20 asala tënë na ndo ti mbeni zo so ayeke “zo ti kpengba li na zo ti ke tënë,” so na gbe ti Ndia ti Moïse lo lingbi na kuâ. Versê ni afa so zo ti kpengba-li so, so agbian bê ti lo pëpe, ayeke nga ‘watengo-ye na ngbâa ti sämba.’ Biani, na Israël ti giriri, a bâ tengo ye na nyongo ye ahon ndo ni tongana asalango ye so alingbi pëpe na zo so aye ti sala na Nzapa.

Ye oko, tengo ye ahon ndo ni ayeke nyen? Nga, mbage ti Mbeti ti Nzapa so aChrétien asû na yanga ti Grec atene nyen na ndo ni? Zo ti tengo ye ahon ndo ni “ayeke zo so kua ti lo ayeke ti te gi ye na ti nyon ye gbâ ni na mbeni lege so mo bâ mo tene ye ni alingbi na lo pëpe.” Tongaso, tengo ye ahon ndo ni ayeke nga kota nzara ti warango ye; na Tënë ti Nzapa afa na e so “azo so bê asala ala” wala azo so ayeke na kota nzara ti warango ye ayeke lï ande na yâ Royaume ti Nzapa pëpe (1 aCorinthien 6:9, 10; aPhilippien 3:18, 19; 1 Pierre 4:3). Nga, tongana bazengele Paul ayeke gboto mê ti aChrétien na ndo “kusala ti mitele”, lo sala tënë ti “nyongo sämba, pumba kirikiri, na mbeni ye tongaso.” (aGalate 5:19-21). Fani mingi, tengo ye ahon ndo ni ague oko na nyongo sämba nga na pumba kirikiri. Na ndo ni, tengo ye ahon ndo ni ayeke biani na popo ti “mbeni ye tongaso” so Paul asala tënë ni. Legeoko tongana ti so a yeke bi zo na gigi ndali ti “kusala ti mitele”, a lingbi nga ti bi na gigi ti kongregation mbeni Chrétien so azo mingi ahinga lo na tengo ye ahon ndo ni na so aye pëpe ti gbian salango ye ti lo na kota nzara ti wara ye.​—1 aCorinthien 5:11, 13.a

Atâa so Mbeti ti Nzapa ayeke na oko bango ndo na ndo zo ti tengo ye ahon ndo ni na ngbâa ti sämba, a yeke hinga ngbâa ti sämba hio mingi ahon zo ti tengo ye ahon ndo ni. A yeke bâ ka hio mingi aye so afa atene mbeni zo ayeke ngbâa ti sämba. Me, a yeke ngangu mingi ti hinga na ngoi wa si mbeni zo ayeke ga zo ti tengo ye ahon ndo ni ngbanga ti so mo lingbi pëpe ti bâ mbeni zo gi tongaso na ti hinga so lo yeke na kpale so. Ni la, ti hinga aye so afa atene mbeni zo ayeke zo ti tengo ye ahon ndo ni, a hunda ti tene a-ancien aduti na mbeni lê so akpengba nga na ngangu ti bango nda ti ye.

Na tapande, ti kono ahon ndo ni alingbi ti duti fä ti tengo ye ahon ndo ni, me a yeke lakue tongaso pëpe. Kobela alingbi ti sala si mbeni zo akono ahon ndo ni, wala lo lingbi ti wara ni na mbage ti babâ wala mama ti lo. A lingbi e hinga nga so ti kono ahon ndo ni andu gi dutingo ti zo na lege ti mitele, me tengo ye ahon ndo ni ayeke bibe so mbeni zo ayeke na ni. Zo so akono mingi ayeke zo so kasa ti tele ti lo akono ahon ndo ni nga lo yeke na mafuta mingi; zo ti tengo ye ahon ndo ni ayeke zo so kua ti lo ayeke ti te ye me a yeke ngangu na lo ti kaï kota nzara ti lo ti tengo ye. Tongaso, a yeke hinga zo ti tengo ye ahon ndo ni na lege ti konongo ti lo pëpe, me na lege ti bango ndo so lo yeke na ni na ndo ti kobe. Mbeni zo alingbi ti kono na lege ni wala lo lingbi même ti duti na kete tele, me lo yeke zo ti tengo ye ahon ndo ni. Nga, lege ti hinga so konongo wala nengo ti mbeni zo ayeke na lege ni ayeke legeoko pëpe na yâ ti akodoro kue.

Tongana nyen a yeke hinga zo ti tengo ye ahon ndo ni? Zo ti tengo ye ahon ndo ni ayeke zo so lakue tongana kobe ayeke dä, lo yeke te alingbi na ni pëpe, me lo yeke te ni juska mo bâ mo tene lo ye ti tï kobela. So lo kanga nzara ti bê ti lo pëpe aye ti fa so lo yeke gi bê ti lo biani pëpe na zonga so lo yeke bi na ndo Jéhovah nga na nzoni iri ti azo ti Lo (1 aCorinthien 10:31). Na mbeni mbage, a lingbi ti tene hio pëpe so mbeni zo so ngoi na ngoi lo yeke te ye ahon ndo ni ayeke “zo so bê asala lo”. (aEphésien 5:5). Ye oko, na lege ti aGalate 6:1, a hunda peut-être ti mû maboko na mara ti Chrétien tongaso. Paul atene: “Aita, tongana i wara zo na yâ mbeni siokpari, i so i yeke ti Yingo, i sala na lege ti tâ be-ti-molenge ti kiri zo so na lege ni.”

Ngbanga ti nyen wango ti Bible ti kpe tengo ye ahon ndo ni ayeke kota mingi mbilimbili na ngoi ti e? Ngbanga ti so, na ndo ngoi ti e, Jésus amû gbotongo mê so: “I bata nzoni, wala peut-être tengo kobe na nyongo sämba mingi, na kusala ti leke ye ti fini so ane bê ti i, na lâ ni so aga na ndo i tongana son.” (Luc 21:34, 35). Ti kpe tengo ye ahon ndo ni ayeke mbeni oko ti akota ye so ayeke mû lege na e ti kpe asalango ye so ayeke ga na kpale na lege ti yingo.

Kangango nzara ti tele ayeke mbeni nzoni ye so a lingbi aChrétien agi ti duti na ni (1 Timothée 3:2, 11). Tongaso, Jéhovah ayeke mû ande maboko biani na azo so, na bê ti ala kue, ayeke gi lege ti bata awango ti Bible na ndo tengo ye na nyongo ye alingbi na ni lakue.​—aHébreu 4:16.

[Kete tënë na gbe ni]