Jéhovah ayeke na tâ be-ti-molenge: A ye ti tene nyen teti e?
DAVID ayeke mbeni zo so ye ti ngangu asi na lo mingi. Kogara ti lo, Gbia Saül, so ayeke zo ti mbanda asala lo pasi mingi. Fani ota, Saül atara ti fâ lo na likongo, nga teti angu mingi lo ngbâ ti gi lo tongana mbeni nyama ti fâ lo; ye so asala si David akpe kirikiri na yâ ti ngonda (1 Samuel 18:11; 19:10; 26:20). Me, Jéhovah afa so lo yeke na David lakue. Jéhovah asö lo gi na maboko ti Saül pëpe, me na tïtî ambeni wato nga. Ni la, e lingbi ti hinga nda ti atënë ti bê ti David so lo fa ni na yâ ti bia so: “L’Eternel ayeke Kota Tênë ti mbi, Gbada Ti Bira ti mbi, na Zo Ti Zi mbi . . . Mo [Jéhovah, Mo] mû na mbi vala ti salut ti Mo; nzobe [“tâ be-ti-molenge”, NW ] ti Mo asala si mbi ga kota.” (2 Samuel 22:2, 36). David aga kamême kota zo na Israël. Tongana nyen ye so andu tâ be-ti-molenge so Jéhovah ayeke na ni?
Tongana Mbeti ti Nzapa ayeke fa Jéhovah tongana zo so ayeke na tâ be-ti-molenge, a ye pëpe ti tene so lo yeke na katikati na yâ ti ambeni ye wala lo yeke na gbe ti ambeni zo. Nde na so, nzoni salango ye so aye ti fa so lo yeke bâ mawa ti azo so ayeke sala kue ti duti azo so lo yeda na ala na lo yeke sala be-nzoni na ala. Psaume 113:6, 7 atene: “[Jéhovah a]zia lê ti Lo ti bâ ye so ayeke na yayu na ye so ayeke na sese. Lo yä wanzinga so ayeke na yâ pupu-sese.” Tongana a tene lo yeke “zia lê ti Lo ti bâ ye”, a ye ti tene “lo yeke kuku ti bâ ndo” wala “lo yeke kiri na tele ti lo kete ti bâ ndo.” (Today’s English Version; Young’s Literal Translation of the Holy Bible). Tongaso, kâ na yayu Jéhovah ‘akuku’ wala lo “kiri na tele ti lo kete” ti bâ lege ti David, koli so ayeke wasiokpari, me so ayeke na tâ be-ti-molenge nga so aye mingi ti sala na Nzapa. Ni la, David amû na e dengo bê so: “Kamême L’Eternel ayeke na kota ndo, Lo bâ ala so ayeke na kete ndo.” (Psaume 138:6). Lege so Jéhovah asala ye na mbage ti David na be-nzoni, na be-nze-pepe nga na bango mawa alingbi ti dë bê ti azo kue so ayeke gi ti sala ye so bê ti Lo aye.
Atâa so dutingo ti Jéhovah tongana Kota Gbia asala si gi lo oko la lo yeke kota mingi na yâ dunia, lo yeke ndulu ti sala songo na zo oko oko kue. Ye so amû na e beku so e lingbi ti ku lo lakue ti tene lo mû maboko na e même na yâ ti aye so ayeke tâ ngangu mingi. E yeke nga na mbeni nda ti tënë oko pëpe ti sala mbito ti tene lo girisa e. Na ndo azo ti lo, Israël ti giriri, a yeke na lege ni so a sala tënë ti Jéhovah tongana ‘Lo so adabe Lo na ala na yâ vundu ti ala, teti nzobe ti Lo angbâ lakue.’—Psaume 136:23.
Ye ti ngangu alingbi ti si na e awakua ti Jéhovah ti laso legeoko tongana ti David. A lingbi ti duti hengo ndo ti azo so ahinga Nzapa pëpe, tiringo na kpale ti seni wala kota vundu so e wara ndali ti kuâ ti mbeni fami ti e. Atâa dutingo ti e ayeke tongana nyen, tongana bê ti e ayeke mbilimbili, e lingbi ti sambela Jéhovah ti hunda be-nzoni ti lo. Fade Jéhovah ayeke “kuku” ti bâ dutingo ti e na ti mä asambela ti e. Wasungo psaume so awara yingo vulu atene: “Lê ti L’Eternel ayeke na ndo azo ti mbilimbili, na mê ti Lo ayeke mä toto ti ala.” (Psaume 34:16). Biani, a nzere na e mingi ti gbu li na ndo pendere salango ye ti Jéhovah so ayeke tâ be-ti-molenge.
[Afoto na lembeti 30]
Gi tongana ti so lo mä asambela ti David, Jéhovah ayeke ndulu ti mä asambela ti e laso