E yeke wara tâ nzoni dutingo mbeni lâ?
TONGANA mo yeke bâ amolenge ayeke sala ngia na ababâ na mama so aye ala, a nzere na mo pëpe? Amolenge tongaso abâ so ala yeke na nzoni dutingo na gbe ti nzoni bingo bê ti ababâ na mama ti ala. Ye oko, a yeke ngangu na ambeni molenge ti wara mara ti angoi ti ngia tongaso. Nde na so, lâ na lâ ambeni molenge ayeke gi lakue bê ti ala na ndo so ala lingbi ti lango dä na bï. Biani, amolenge so ayeke na ndo ti lango pëpe legeoko nga na ambeni zo so ayeke na nzoni dutingo pëpe, ala lingbi pëpe ti duti na beku?
Atâa so a lingbi ti bâ so ala yeke na beku teti kekereke pëpe, Tënë ti Nzapa amû na ala mbeni beku. Prophète Esaïe afa kozoni so ngoi ayeke ga ande so azo kue ayeke wara tâ nzoni dutingo. Lo sû na mbeti: “Fade azo asala da, na ala duti na yâ ni; fade ala lu vigne na yaka, na ala te lê ni. Fade azo asala da si mbeni zo aduti na yâ ni pëpe; fade ala lu ye si mbeni zo ate pëpe.”—Esaïe 65:21, 22.
Me gunda ti mara beku tongaso aluti nzoni? Tënë “beku” aye lakue ti sala pëpe gi tënë ti mbeni ye so ayeke dä biani na so zo angbâ ti ku ni. Na tapande, na Brésil azo ayeke tene lakue tënë so: “A esperança é a última que morre.” Nda ni aye ti tene: “Beku ayeke tanga ti aye so ayeke kui ande.” So aye ti tene so mingi ti azo ayeke ngbâ ti duti na beku ti wara mbeni ye, même tongana ye ni so ala zia beku ti ala dä, gere ni aluti nzoni pëpe. Ye oko, beku so Nzapa so ayeke na fini amû ni na e ayeke ti lo nde. Bazengele Paul atene: “Zo so amä na bê na [Nzapa], fade kamene asala lo pëpe.” (aRomain 10:11). Aprophétie ti Bible so aga tâ tënë awe amû na e beku so azendo kue so Jéhovah Nzapa asala tënë ni ayeke ga ande tâ tënë nga. Na ngoi so azendo so ayeke ga ande tâ tënë, fade aye so ayeke pusu amolenge ti gue ti lango na yâ ti alege ayeke hunzi.
Même laso, anzoni wango so ayeke na yâ Bible alingbi ti mû maboko na ala so ayeke na beku pëpe ti leke dutingo ti ala na ti wara tâ nzoni ni. Tongana nyen? A-Témoin ti Jéhovah so ayeke lango ndulu na ndo so mo yeke dä ayeke na ngia ti mû ande maboko na mo ti wara kiringo tënë na hundango tënë so.