Atënë so azo ahunda

Ngbanga ti nyen aTémoin ti Jéhovah abâ wungo 144 000 so a sala tënë ni na yâ buku ti Apocalypse tongana tâ wungo?

Bazengele Jean asû lani na mbeti: “Mbi mä nombre ti ala so a zia sceau na ndole ti ala, ala yeke [saki] ngbangbo oko na bale-osio na ndo ni [saki] osio.” (Apocalypse 7:4). Na yâ ti Bible, tënë “ala so a zia sceau na ndole ti ala” aye ti sala tënë ti mbeni bungbi ti azo so a soro ala na popo ti azo ti sese na so ayeke gue na yayu ti duti legeoko na Christ na ti komande na ndo sese so ayeke ga ande paradis (2 aCorinthien 1:21, 22; Apocalypse 5:9, 10; 20:6). A bâ wungo ti ala, 144 000, tongana mbeni tâ wungo ngbanga ti so anda ti tënë mingi ayeke dä so afa ni tongaso. A yeke wara kozo nda ti tënë ni na yâ ti aversê so ayeke na tele ti Apocalypse 7:4.

Na peko ti so a fa na yâ suma awe na bazengele Jean tënë na ndo ti azo 144 000, a fa nga na lo mbeni bungbi ti azo nde. Jean asala tënë ti azo so tongana mbeni bungbi ti ‘azo mingi so asi singo, so zo oko alingbi diko ala pëpe, ala yeke ti amara kue, ti akete mara kue, ti azo nde nde kue, na ti yanga nde nde kue.’ Bungbi ti azo mingi so asi singo so aye ti sala tënë ti ala so ayeke sö kuâ ande na kota ye ti vundu so fade ayeke futi biaku sioni sese ti laso.​—Apocalypse 7:9, 14.

Ye oko, bâ kangbi so Jean asala na popo ti versê 4 nga na versê 9 ti chapitre 7 ti buku ti Apocalypse. Lo tene so “ala so a zia sceau na ndole ti ala”, na so ayeke na yâ ti kozo bungbi ni, ayeke ala so a diko wungo ti ala awe. Me, ti azo so ayeke na yâ ti use bungbi ni, “azo mingi so asi singo,” a hinga mbilimbili wungo ti ala pëpe. Ti dabe na ye so, a yeke duti na lege ni ti bâ so wungo 144 000 ayeke tâ wungo. Ni la, tongana wungo 144 000 ayeke fade mbeni wungo na lege ti fä, na so aye ti sala tënë ti mbeni bungbi ti azo so a lingbi mbilimbili ti diko wungo ti ala pëpe, ka a yeke duti ngangu ti zia kangbi na popo ti aversê use so. Tongaso, aversê so ayeke na tele ti versê ni afa polele so a lingbi a bâ wungo 144 000 tongana mbeni tâ wungo.

Azo nde nde ti ngoi ti giriri na ti laso, so ayeke gi nda ti aye na ndo Bible, ayeda gi na nda ti oko tënë so: Wungo 144 000 ayeke tâ wungo. Na tapande, na salango tënë na ndo Apocalypse 7:4, 9, wagingo nda ti atënë ti Grande-Bretagne Pakara Ethelbert W. Bullinger asala atënë so ahon ngu 100 awe: “A yeke gi mbeni tënë ti ye so a yeke ngangu ti gbu nda ni pëpe: Mbeni wungo so a diko ni mbilimbili nde na mbeni wungo so a hinga ni mbilimbili pëpe so ayeke na yâ oko chapitre so.” (Apocalypse wala “Lâ ti Seigneur” [Angl.], lembeti 282). Ade ti ninga pëpe, Robert L. Thomas Junior, wafango ye na ndo Testament ti Fini na mbeni kota séminaire na kodoro ti Amerika, asû na mbeti: “Gere ti tënë so atene wungo 144 000 ayeke mbeni wungo na lege ti fä aluti nzoni pëpe.” Lo kiri lo tene: “Wungo so a wara ni [na Apocalypse 7:4] ayeke ti lo mbeni wungo so a diko ni awe, na wungo ni so ayeke nde na ti azo so a wara na Apocalypse 7:9, so a hinga mbilimbili wungo ti ala pëpe. Tongana a bâ wungo 144 000 tongana mbeni wungo so ayeke na lege ti fä, a lingbi a bâ nga awungo kue so ayeke na yâ buku ti Apocalypse na lege ti fä.”​—Mbeni fango nda ti Apocalypse, Mbage 1, lembeti 474.

Ambeni zo atene so ngbanga ti so Apocalypse ayeke sala mingi atënë gi na lege ti fä, awungo kue so a wara na yâ buku ni nga wungo 144 000 alingbi ti duti gi awungo na lege ti fä (Apocalypse 1:1, 4; 2:10). Ye oko, ti tene tongaso ayeke tâ tënë oko pëpe. Biani, a yeke wara na yâ buku ti Apocalypse gbâ ti awungo na lege ti fä, me a yeke wara nga na yâ buku ni awungo so ayeke atâ wungo. Na tapande, Jean ayeke sala tënë ti “iri bale-oko na ndo ni use ti abazengele bale-oko na ndo ni use ti Molenge Ti Ngasangbaga”. (Apocalypse 21:14). A yeke polele so a sala tënë ti wungo 12 so na lege ti fä pëpe. Nga, bazengele Jean asû mbeti na ndo ti Komandema ti Ngu Saki Oko ti Christ. Wungo so nga ayeke mbeni tâ wungo ngbanga ti so mbeni nzoni gingo nda ti ye na yâ Bible afa tënë ni tongaso (Apocalypse 20:3, 5-7).a Ni la, ti hinga wala mbeni wungo so ayeke na yâ buku ti Apocalypse ayeke tâ wungo wala mbeni wungo na lege ti fä, a lingbi a bâ ngoi so a sû na ni nga atënë so angoro tele ni.

Bibe so atene wungo 144 000 ayeke mbeni tâ wungo na so asala gi tënë ti mbeni kete wungo ti azo so ayeke na yâ ti mbeni kete bungbi, tongana a haka ni na wungo ti “azo mingi so asi singo”, ague legeoko na ambeni versê ti Bible. Na tapande, na yâ suma so bazengele Jean abâ ni na pekoni, a fa tënë ti azo 144 000 tongana ala so ‘a vo ala na popo ti azo, si ala ga [akozo lengo]’ ni (Apocalypse 14:1, 4). Nga, na ngoi so Jésus ayeke lani na ndo sese, lo sala tënë na ndo ti ala so ayeke komande legeoko na lo na yâ Royaume ti lo ti yayu, na lo di iri ti ala ‘kete kundu’. (Luc 12:32; 22:29). Biani, ala so a vo ala na popo ti azo na so ayeke komande ande na yayu, wungo ti ala ayeke mingi pëpe tongana a haka ni na azo so ayeke wara fini na ndo sese na yâ Paradis so ayeke ga.

Tongaso, aye so angoro tele ti versê ti Apocalypse 7:4 nga na atënë so e bâ ni na yâ ti ambeni mbage nde ti Bible afa polele so wungo 144 000 ayeke biani tâ wungo. A ye ti sala tënë ti ala so ayeke komande ande legeoko na Jésus na yayu na ndo mbeni sese so aga paradis; sese so na ndo ni a yeke wara azo mingi mingi so a lingbi ti diko wungo ti ala pëpe na so ayeke na ngia ti voro Jéhovah Nzapa.​—Psaume 37:29.

[Kete tënë na gbe ni]

[Kete tënë na lembeti 31]

Wungo ti ala so ayeke duti ahéritier ti fini ti lakue lakue na yayu ayeke mingi pëpe, a ngbâ gi na azo 144 000

[Foto na lembeti 31]

“Azo mingi so asi singo”, a hinga mbilimbili wungo ti ala pëpe

[Lingu ti foto na lembeti 31]

Atongoro: Foto ti David Malin, na nzobe ti Anglo-Australian Observatory