Tondo ti awafango tënë ti Royaume

A dabe na “azo so akui na so a girisa ala”

NA TONGO nda ti ngu 2001, Haykaz, mbeni Témoin ti Jéhovah ti ngu 15, ague na Berne, Suisse, ti bâ aye so a zia na gigi ti tene azo abâ. Aye so andu “azo so akui na so a girisa ala” na ngoi ti ye ti ngangu so aNazi asala na aTémoin ti Jéhovah. Na peko ti vizite ti lo, Haykaz atene: “Mbi mä tënë ti aye ti sioni nga na sana so a sala na aTémoin ti Jéhovah na gbe ti komandema ti aNazi, me a yeke kozoni ti mbi la ti bâ ambeti so atene tâ tënë nga na afoto ti aye so asi na ngoi ni kâ. Aye so a zia ti tene azo abâ, atondo ti azo so abâ ye ni na lê ti ala nga na atënë so awasungo mbaï atene na ngoi ni so asala ngangu mingi na ndo mbi.”

Ngoi kete na pekoni, tongana a hunda na Haykaz ti sû mbeni tondo teti akamarade ti lo ti kota da-mbeti, lo soro kota tënë so: “A-Témoin ti Jéhovah: Azo so akui na so a girisa ala ti ngoi ti aNazi.” Wafango mbeti ti lo ayeda na kota tënë ni so, me lo tene na lo so a yeke nzoni lo yôro na yâ ti atënë ti lo atënë ti yâ ti ambeni mbeti ti sese so. Haykaz ayeda na ngia. “Mbi sû mbeni ndulu tënë ti abuku ti sese so, so asala tënë na ndo aTémoin ti Jéhovah ti ngoi ti aNazi. Mbi fa nga aye so agbu bê ti mbi na lege ti aye so a zia ti tene azo abâ so andu ‘Azo so akui na so a girisa ala’. Wungo ti alembeti ti tondo ni asi 43 so na popo ni atapande nga na afoto.”

Na novembre 2002, Haykaz afa tondo ti lo na gbele akamarade ti lo ti klase, awafango mbeti, asewa nga na asongo ti lo. Na pekoni, a zia lege na azo ti pika patara na ndo ni. Ye so amû lege na lo ti fa atënë ti mabe ti lo so aluti na ndo Bible. Tongana mbeni molenge ti wali na popo ti azo so aga ahunda nda ni so lo soro kota tënë so, Haykaz afa so mingi ti abuku ti mbaï asala tënë ti aTémoin ti Jéhovah pëpe, nga lo ye si azo ahinga tongana nyen aTémoin amû mbage ti mabe ti ala na mbito pëpe. Nyen la asi na peko ti fango tondo ti lo?

Haykaz atene: “Bê ti akamarade ti mbi ti ekole adö. Ala hinga pëpe so aTémoin ti Jéhovah ayeke lani mbeni bungbi so a sala ngangu na ala mingi. Nga, mingi ti ala ahinga pëpe so aTémoin so abi ala lani na yâ ti akando ti sana ti aNazi ayü mbeni fä so ayeke nde: mbeni triangle violet.”

Na peko ti fango ye ti lo, Haykaz awara lege mingi ti sala lisoro na kamarade ti lo ti klase nga ti sala tënë na ndo dutingo ti aTémoin na ndo tënë ti mênë, sämba nga na anzoni salango ye so aluti na ndo Bible. Haykaz atene: “Mbeni kamarade ti mbi oko ti he mbi ayeke pëpe.” Na ndo ni, a bata tondo ti lo ni na yâ ti bibliothèque ti ekole ni. Ye so ayeke mû ande lege ti hinga biani so a yeke girisa pëpe lutingo ngangu ti aTémoin ti Jéhovah na mbito pëpe.