Lege ti hon ndo ti bê so awoko
BÊ TI mo awoko? Ndali ti so gingo bê nga na tiri ti ngbâ na fini asi singo laso, bê ti azo mingi awoko. Bê ti ambeni zo awoko ngbanga ti so ala yeke na kua ti nginza pëpe. Ambeni ayeke na gbele akpale so aga na peko ti mbeni ndao. Ye oko, ambeni zo nde ayeke tiri na akpale ti sewa, mbeni kota kobela wala ala bâ tele ti ala so ala yeke gi ala oko.
Tongana bê ti mo awoko, mo lingbi ti wara mungo maboko na ndo wa? Azo kutu mingi ayeke wara dengo bê na lege ti dikongo Mbeti ti Nzapa, Bible. Na atënë ti bazengele Paul so ge aga na ala beku, lo tene: “Sala tënë nzoni na Nzapa na Babâ ti Seigneur ti e Jésus Christ, Babâ ti be-nzoni, na Nzapa ti lungula vundu kue, Lo so alungula vundu ti e na yâ pono ti e kue.” (2 aCorinthien 1:3, 4). Ngbanga ti nyen mo diko pëpe versê so nga na ambeni nde na yâ Bible ti mo? Salango tongaso ayeke ‘wa mo si bê ti mo aga nzoni na a sala si mo kpengba’.—2 aThessalonicien 2:17.
Mbeni lege so zo alingbi nga ti mû ni ti hon ndo ti bê so awoko ayeke ti bungbi legeoko na awakua ti Jéhovah. A-Proverbe 12:25 atene: “Vundu na yâ bê ti zo asala si lo ba bango, me nzo tënë amû ngia na bê ti zo.” Na ngoi so e yeke gue na abungbi, e yeke mä “nzo tënë” so “anzere na âme, na a sala si tele ti zo aga nzoni.” (aProverbe 16:24). Ngbanga ti nyen mo gue pëpe na bungbi na Da ti Royaume ti aTémoin ti Jéhovah? Fade mo yeke bâ na lê ti mo mveni nzoni ngangu so mbeni mara ti bungbingo tele tongaso ayeke sala na ndo ti mo.
Mo lingbi nga ti wara nzoni na lege ti sambela. Tongana mo bâ so agingo bê ti fini aye ti hon ndo ti mo, zi bê ti mo kue na ‘Lo so amä asambela’. (Psaume 65:3). Jéhovah Nzapa, Wasalango e, ahinga e nzoni mingi ahon e mveni. E lingbi ti zia bê ti e na ndo lo ti mû maboko na e. Tënë ti lo amû na e zendo so: “Mo zia kungba ti mo na ndo L’Eternel, na fade Lo bata mo. Fade Lo zia ye ayengi azo ti mbilimbili lâ oko pëpe.” (Psaume 55:23). Biani, “azo so aku L’Eternel, fade ala kiri ala wara ngangu”.—Esaïe 40:31.
Jéhovah Nzapa amû na e awe angangu ye so alingbi ti mû maboko na e ti hon biani ndo ti bê so awoko. Fade mo yeke sala kusala na ni?