Ngoi so a yeke sala biani na sese ye so Nzapa aye

TONGANA Jésus afa na adisciple ti lo ti sambela, “E ye ala sala na sese ye so bê ti Mo aye legeoko tongana ala sala na yayu”, lo yeke sala tënë ti ye so lo hinga biani, teti so lo yeke lani na fini na tele ti Babâ ti lo na yayu (Matthieu 6:10; Jean 1:18; 3:13; 8:42). Kozoni si Jésus aga na sese, lo yeke dä na ngoi so ye kue so ayeke si na yayu nga na sese ge ague oko na ye so bê ti Nzapa aye. A yeke lani ngoi ti salango kusala so aga na kota ngia nga na nzerengo tele.​—aProverbe 8:27-31.

Akozo ye so Nzapa aleke ayeke acréature ti yingo, ‘a-ange ti Lo so ayeke na ngangu, so asala ye alingbi na tënë ti Lo’. Ândö nga laso, ala yeke lakue ‘awakua ti Lo so asala ye so amû ngia na Lo.’ (Psaume 103:20, 21). Ala oko oko kue ayeke na lege ti fa na gigi tënë ti bê ti ala mveni na ti soro ye so amû ngia na lo? Biani, a yeke tongaso, nga na ngoi ti lekengo sese, “amolenge ti Nzapa [so] kue adekongo na ngia.” (Job 38:7). Dengo kongo ti ala na ngia afa na gigi kota ngia ti bê ti ala na yâ ye so Nzapa aleke ti sala, na ala yeke ndulu ti yeda na ni.

Na peko ti salango sese, Nzapa aleke ni ti tene zo aduti na ndo ni, nga na nda ni, lo leke kozo koli na kozo wali (Genèse, chapitre 1). Ye so alingbi nga na dengo kongo ti ngia? Tondo so a sû na gbe ti yingo vulu atene: “Nzapa abâ ye kue so Lo sala, na bâ, a yeke nzoni mingi.” Biani, sioni oko ayeke na yâ ni pëpe, a yeke mbilimbili-kue.​—Genèse 1:31.

Ye so bê ti Nzapa aye na mbage ti kozo babâ na mama ti e nga na amolenge ti ala ayeke so wa? Genèse 1:28 atene so a yeke nga lani nzoni mingi: “Nzapa ahiri tënë nzoni na ndo ala; Nzapa atene na ala, I dü amolenge mingi, i wu, i si singo na sese, i sala si ye kue aga na gbe gere ti i; i komande asusu ti kota ngu ti ingo, andeke ti nduzu, na ye ti fini kue so atambela na ndo sese.” Ti sala pendere kusala so, a hunda na kozo babâ na mama ti e nga na amolenge ti ala ti duti na fini ti lakue lakue. Mbeni ye oko ti sioni tongana kota kpale, ye ti kirikiri, vundu wala kui ayeke dä pëpe.

A yeke lani ngoi so a sala na yayu nga na sese ye so bê ti Nzapa aye. Azo so asala ye so bê ti lo aye alingbi lani ti wara kota ngia. Ye nyen atambela lani nzoni pëpe?

Mbeni kpale ti kangango lege na ye so Nzapa aye, so zo aku pëpe, alondo. Ye ti nzoni ni ayeke so lege ti leke ni ayeke dä. Ye oko, kpale ni azi lege na mbeni ngoi ti vundu so ayeke ninga, so asala si azo ahinga nzoni pëpe ye so Nzapa aye na mbage ti azo. E nga kue e wara vundu so aga na peko ti kpale so. Kpale ni ayeke lani nyen?

Ye so Nzapa aye na ngoi ti kengo yanga

Mbeni oko ti “amolenge ti Nzapa” ti yingo abâ tongana nyen lo lingbi ti yôro tele ti lo na yâ ye so Nzapa aye teti azo. Ye so lo yeke gi a yeke ti wara aye ti nzoni ti lo mveni. Tongana lo bi bê ti lo dä mingi, lo bâ so lo lingbi ti sala ni senge, na ye ni anzere na lo mingi ti sala ni (Jacques 1:14, 15). Lo tene peut-être na bê ti lo so tongana ni sala si kozo koli na kozo wali amä yanga ti ni ahon ti mä Nzapa, Nzapa ayeke bâ so lo lingbi ande gi ti zia lege na mbeni yanga-ti-komande ti bâ gigi so ayeke mä tele na ti lo pëpe. Lo lingbi peut-être nga ti tene na bê ti lo so Nzapa alingbi ande pëpe ti futi ala, teti tongana lo sala ni, a yeke fa so lo wara lege pëpe ti sala ye so lo leke ti sala. Nde na so, a lingbi Jéhovah Nzapa agbian yâ ti ye so lo leke ti sala, na lo yeda na yanga-ti-komande ti Satan so ayeke na katikati ni, na so azo so Lo leke ala asoro fadeso ti mä yanga ni. Tâ na lege ni, a hiri zo ti kpengba-li so Satan, so aye ti tene “wakengo tënë”.​—Job 1:6.

Ti sala ye so bê ti lo aye, Satan aga ndulu na wali ni. Lo wa mingi wali ni ti ke ti sala ye so Nzapa aye, na ti sala gi ye so bê ti lo apusu lo ti sala na ndo lege ti tambela, tongana lo tene: “I lingbi kui biani pëpe, . . . fade . . . i ga tongana Nzapa, i hinga nzoni na sioni.” (Genèse 3:1-5). Wali ni abâ ti lo tënë so Satan atene na lo tongana mbeni lege so azi na lo ti sala ye ti bê ti lo, na lo bâ ni tongana mbeni lege ti fini so ayeke nzoni ahon ti so lo yeke na ni kozo. Na pekoni, lo ga na koli ti lo ti mû mbage ti lo.​—Genèse 3:6.

A yeke pëpe ye so bê ti Nzapa aye lani teti Adam na Eve. A yeke ye so bê ti ala mveni aye. Na aye ti pekoni ayeke duti ande sioni mingi. Nzapa atene na ala awe so kengo yanga tongaso ayeke gue na ala na kui (Genèse 3:3). A leke ândö ala pëpe ti duti nde na Nzapa na ti wara aye ti nzoni na pekoni (Jérémie 10:23). Na ndo ni, ala ga mbilimbili-kue pëpe, nga dutingo mbilimbili-kue pëpe ti ala na kui asi fadeso na amolenge ti ala (aRomain 5:12). Satan alingbi ti sala ye oko pëpe ti gbian aye so.

Aye so agbian biaku biaku ye so Nzapa aleke ti sala teti azo nga teti sese? Oko pëpe (Esaïe 55:9-11). Ye oko, aye so asi asala si ambeni hundango tënë alondo na so a lingbi a kiri tënë na ni: Azo alingbi ti ‘ga tongana Nzapa, na hingango nzoni na sioni’, tongana ti so Satan atene lani? Wala, tongana a mû na e mbeni ngoi so alingbi, e lingbi ti sala kusala na ni ti gi ti bâ teti e mveni ye so ayeke mbilimbili na so ayeke sioni, ye so aga na nzoni ye na so aga na sioni na yâ ambage ti fini kue? Nzapa alingbi biani ti tene zo amä yanga ti lo na yâ ye kue? Lege ti komandema ti lo ayeke nzoni ahon tanga ti komandema kue? Azo alingbi biani ti sala ye so bê ti lo aye? Mo yeke kiri tënë na ahundango tënë so tongana nyen?

Oko lege so ayeke dä ti kiri tënë na ahundango tënë so azia na gbele azo ti yingo na ti mitele kue ayeke ti mû lege na ala so ayeke gi ti duti nde na Nzapa ti tara ti sala si ye so ala ye aga nzoni. Gi ti futi ala alingbi pëpe ti kiri tënë na ahundango tënë so alondo. Ti zia lege na azo ti sala ye so bê ti ala aye teti ngoi mingi alingbi ti leke atënë ni, ngbanga ti so aye ti peko ti dutingo nde ti ala na Nzapa ayeke sigigi polele. Nzapa afa so lo yeke leke ni tongaso tongana lo tene na Eve so lo yeke dü ande amolenge. Na lege so a zia na sese gere ti mbeni sewa ti azo. E ngbâ na fini laso teti so Nzapa amû lege na wali ni ti wara amolenge.​—Genèse 3:16, 20.

Ye oko, ye so aye ti tene pëpe so Nzapa ayeke zia lege na azo nga na molenge ti yingo so ake yanga ti sala ye kue so bê ti ala aye. Nzapa ake lani pëpe kota yanga-ti-komande ti lo, wala lo zia pëpe aye so lo leke ti sala (Psaume 83:19). Lo fa ye so polele na tenengo kozoni so fade a yeke neka zo so ayeke na gunda ti kengo yanga, na a yeke zi asioni ye kue so aga na pekoni (Genèse 3:15). Tongaso, na tongo nda ti mbaï, azo awara mbeni zendo so aye ti sioni ayeke hunzi ande.

Ti ku na ngoi ni so, kozo babâ na mama ti e na amolenge ti ala so ayeke ga na pekoni azi tele ti ala yamba na gbele komandema ti Nzapa. Ti tene Nzapa akanga lege na asioni ye kue so ayeke ga na peko ti desizion so ala mû, a lingbi lo hunda na ala na ngangu ti sala gi ye so lo ye na yâ asalango ye ti ala kue. A yeke duti legeoko tongaso tongana lo zia lege na ala pëpe ti tara ti duti nde na lo.

Biani, zo oko oko alingbi ti soro komandema ti Nzapa. Ala lingbi ti manda ti hinga ye so bê ti Nzapa aye teti azo na ngoi so e yeke dä, na ti sala kue ti lingbi na ni (Psaume 143:10). Ye oko, na ngoi kue so ade ti fâ pëpe yâ ti tënë ti dutingo nde ti azo na Nzapa, ala lingbi gi ti wara akpale.

Aye so aga na peko ti ye so zo mveni asoro asigigi hio polele na yâ mbaï ti azo. Caïn, kozo molenge so Adam na Eve adü, afâ lani ita ti lo ti koli Abel ngbanga ti so “kusala ti lo mveni ayeke sioni, na kusala ti ita ti lo ayeke mbilimbili.” (1 Jean 3:12). A yeke lani ye so bê ti Nzapa aye pëpe teti so Nzapa agboto mê ti Caïn nga na pekoni Lo se lo (Genèse 4:3-12). Na mungo peko ti ye so Satan afa ni, Caïn asoro lani ti sala ye so bê ti lo mveni apusu lo ti sala; tongaso, ‘lo yeke ti wato-sioni’. Ambeni zo ayeke sala tongaso nga.

Na peko ti so azo aduti na ndo sese a sala ngu 1 500 tongaso, “sese . . . afuti na gbele Nzapa; sese [ni] asi na sioye ti ngangu.” (Genèse 6:11). A hunda lani ti sala mbeni kpengba kusala ti bata sese ti gue na futingo. Nzapa asala ye na gango na mbeni kota moa na ndo sese nga na batango na fini gi oko sewa ti mbilimbili so ayeke na fini: Noé, wali ti lo, amolenge ti lo na awali ti ala (Genèse 7:1). E kue e ga na lege ti ala.

Ngbele ye na ngoi ti Noé ti si na ti e, Nzapa afa lege na azo so aye na bê ti ala kue ti hinga ye so lo ye. Lo zia yingo ti lo na ndo akoli be-ta-zo ti sû na mbeti atokua ti lo teti azo kue so ayeke bâ ndo na mbage ti lo ti wara fango lege. A sû atokua so na yâ Bible (2 Timothée 3:16). Na lege ti ndoye, lo mû lege na azo so ayeke be-ta-zo ti duti na nzoni songo na lo, na même ti ga akamarade ti lo (Esaïe 41:8). Nga, lo mû na ala ngangu so a hunda ti luti na gbele akpengba tara so azo ayeke hu pono ndali ni na yâ ti angu saki mingi ti dutingo nde na Nzapa (Psaume 46:2; aPhilippien 4:13). So tâ bê ti kiri singila si e lingbi ti fa na gigi teti aye so kue!

‘A yeke sala ande ye kue so mo ye’

Aye so Nzapa asala giriri juska laso ayeke pëpe aye kue so lo ye ti sala teti azo. Bazengele Chrétien Pierre asû na mbeti: “Na lege ti zendo ti Lo, e yeke ku ayayu ti fini na sese ti fini so mbilimbili aduti na yâ ni.” (2 Pierre 3:13). Atënë ti fä so andu mbeni fini ngorogbia so ayeke komande na ndo azo nga mbeni fini bungbi ti azo so ayeke duti ande na gbe ti ngorogbia ni.

Na salango tënë ni polele, prophète Daniel asû na mbeti: “Na lâ ti agbia so, fade Nzapa ti yayu ayä royaume so afuti lâ oko pëpe, . . . fade royaume so afâ mbeni royaume so kue ndulu ndulu, na a sala si royaume nde nde so kue awe; na fade royaume so angbâ lakue lakue.” (Daniel 2:44). Prophétie so afa kozoni hunzingo ti aye ti sese ti laso, so atambela nzoni pëpe, nga ziango na place ni Royaume wala ngorogbia ti Nzapa. So tâ nzo tënë! Laso, abira na bibe ti kion asala si sese asi singo na salango ye ti ngangu, na a ga ndulu ti kiri ti buba ni. Mbeni lâ, azo ayeke girisa aye so kue.

Lawa si aye so ayeke si? Adisciple ti Jésus ahunda lani: “Fade ye so aga lâ nyen? na fade fä ti singo ti Mo, na ti nda ti ngoi so, ayeke nyen?” Na fango mbage ti kiringo tënë ni, Jésus atene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.”​—Matthieu 24:3, 14.

Azo mingi ahinga so a yeke sala laso kusala ti fango tënë so na ndo sese mobimba. Peut-être mo bâ ni awe na yâ vaka ti mo. Na yâ buku ti lo, Ala nga kue amä na bê (Angl.), wafango ye Charles S. Braden asû na mbeti: “A-Témoin ti Jéhovah asala si sese asi singo biani na fango tënë ti ala. . . . Mbeni bungbi ti vorongo oko na sese afa pëpe wâ na gbungo ngangu ahon aTémoin ti Jéhovah ti tara ti kangbi nzo tënë ti Royaume.” Na wâ, aTémoin ayeke fa nzo tënë so na yâ akodoro ahon 230 nga ndulu na ayanga 400. Kusala so a sala tënë ni kozoni, so amû ndo ti sese kue, ade ti sala mara ni lâ oko pëpe. So ayeke oko ti afä so afa na gigi so ngoi aga fadeso ndulu awe ti tene Royaume ni amû place ti angorogbia ti azo.

Royaume so Jésus atene a lingbi a fa tënë ni, a yeke ni la si lo manda na e ti sambela ndali ni na yâ sambela ti lo so lo mû tongana tapande: “E ye royaume ti Mo aga. E ye ala sala na sese ye so bê ti Mo aye legeoko tongana ala sala na yayu.” (Matthieu 6:10). Biani, Royaume so ayeke lege so Nzapa ayeke sala ande kusala na ni ti sala si ye so lo leke na bê ti lo ti sala teti azo nga teti sese aga tâ tënë.

Ye so aye ti tene nyen? Zia Apocalypse 21:3, 4 akiri tënë na ni. A tene: “Mbi mä mbeni yanga so asala tënë ngangu na yâ trône, a tene, Bâ, Tabernacle ti Nzapa ayeke na popo ti azo, fade Lo duti na ala, na ala ga azo ti Lo, na Nzapa mveni ayeke na popo ti ala, Lo yeke Nzapa ti ala; fade lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.” Tongaso, fade a yeke sala na sese nga na yayu ye kue so Nzapa aye.a Mo ye pëpe ti duti na popo ni?

[Kete tënë na gbe ni]

[Foto na lembeti 5]

Dutingo nde na Nzapa aga na kota kpale