A yeke sala laso ye so Nzapa aye?

“E ye ala sala na sese ye so bê ti Mo aye legeoko tongana ala sala na yayu.”​—Matthieu 6:10.

JULIO na Christina azia kutukutu ti ala aluti na tele ti lege, na amolenge ti ala oku ayeke na yâ ni. Mbeni zo ti kpengo na kutukutu so sämba ahon ndo ti lo akpo ni na wâ atï dä. Bê ti Julio na Christina asuru ti bâ tongana nyen amolenge ti ala osio ayeke gbi juska ala wara kuâ. A sö Marcos, oku molenge ni, na yâ ngangu wâ ni; ye oko, wâ ni agbi tele ti lo na abuba mbage ti lê ti lo. Lo yeke lani na ngu gumbaya. Vundu ahon ndo ti babâ ti lo. Lo dë bê ti lo mveni na ti sewa ti lo na lege ti atënë so: “A lingbi e hinga so a yeke ye so Nzapa aye la, atâa aye ti pekoni ayeke nzoni wala sioni.”

Tongana ala yeke na gbele mbeni kota ye ti vundu tongana ti so, azo mingi ayeke sala ye tongaso. Ala yeke tene: ‘Tongana Nzapa ayeke ngangu ahon kue na lo yeke bi bê na ndo e, ka, na mbeni lege so e hinga ni pëpe, a lingbi a duti ye ti nzoni teti e, atâa a yeke ngangu mingi na e ti gbu nda ni.’ Mo yeda na tënë so?

Bibe so atene ye kue so asi (atâa a yeke ye ti nzoni wala ti sioni) afa na gigi ye so Nzapa aye aluti fani mingi na ndo atënë so Jésus atene na yâ sambela so a hiri ni Babâ ti e so ayeke na yayu, so afa ni ge na nduzu. A yeke sala laso ye so Nzapa aye na yayu, ni la pëpe? Na sambelango ‘Zia a sala na sese ye so bê ti Mo aye’, e yeke yeda pëpe so ye kue so ayeke si na ndo sese ayeke ye so Nzapa aye?

Azo mingi ayeke na kite na ndo tënë so. Ti ala, ye so afa Nzapa tongana mbeni zo so ayeke bi bê ti lo oko pëpe na ndo vundu wala pasi so azo so lo sala ala ayeke na yâ ni. Ala yeke hunda tele ti ala: ‘Tongana nyen mbeni Nzapa ti ndoye alingbi ti yeda na aye ti ziango kota mbito na bê ti si na azo so asala sioni pëpe? Tongana mbeni ye ti mandango ni ayeke dä, a lingbi ti duti so wa?’ Peut-être mo yeke bi bê ti mo tongaso.

Na ndo tënë so, disciple Jacques, ita ti Jésus na mbage ti mama, asû na mbeti: “Tongana ye ahanda zo, a lingbi lo tene pëpe, Nzapa ahanda mbi; teti sioye alingbi handa Nzapa pëpe, na Lo mveni ahanda zo oko pëpe.” (Jacques 1:13). Nzapa ayeke pëpe na lingu ti ye ti sioni. Tongaso, a yeke polele so aye kue so ayeke si laso na ndo sese ayeke pëpe ye so bê ti Nzapa aye. Mbeti ti Nzapa asala nga tënë ti ye so bê ti zo, ti amara na même ti Zabolo aye (Jean 1:13; 2 Timothée 2:26; 1 Pierre 4:3). Mo yeke yeda so ye so asi na fami ti Julio na Christina alingbi ti duti ye so bê ti mbeni Babâ ti ndoye so ayeke na yayu aye?

Tongaso, ye nyen Jésus aye lani ti tene tongana lo fa na adisciple ti lo ti sambela: ‘Zia a sala ye so bê ti Mo aye?’ A yeke lani gi mbeni hundango ye na Nzapa ti ga ti lï na yâ ambilimbili tënë ti azo? Wala Jésus ayeke fa na e ti sambela teti mbeni ye so ayeke kota na ayeke nzoni mingi ahon ti so, mbeni gbiango ye so azo kue alingbi ti ku ni? Zia e bâ ye so Bible atene na ndo ni.

[Foto na lembeti 3]

Kutukutu: Dominique Faget-STF/AFP/Getty Images; molenge: FAO photo/B. Imevbore