Liberia: Fango tënë ti Royaume amaï atâa bira
NGANGU bira so atï na popo ti azo ti kodoro ti Liberia aninga teti ngu bale-oko na ndo ni. Na yâ ti ngu 2003, aturugu ti bingo kpale atiri juska ala lï na Monrovia, li-kodoro ni. A-Témoin ti Jéhovah mingi abâ gbä ala kpe ada ti ala. Ti ambeni, a lingbi ala sala tongaso fani mingi. Fani mingi a kiri a nzi akungba ti ala.
Mawa ni ayeke so, azo saki mingi awara kuâ na ngoi so bira ni ayeke kporo na yâ li-kodoro ni. Na popo ni aTémoin use, mbeni ita-koli na mbeni ita-wali, awara kuâ. Tongana nyen ambeni ita ahon ndo ti ye ti ngangu so asi, na ye nyen a sala lani ti mû maboko na ala?
Mungo maboko na azo so ye atia ala
Na ngoi kue so bira ni angbâ ti kporo, filiale ti aTémoin ti Jéhovah ti Liberia aleke aye ti mû maboko na azo so ye atia ala, aye tongana kobe, aye ti yâ ti da nga na ayorö. Na ngoi so aturugu ti bingo kpale amû ando ti lutingo ti amangboko, warango kobe aga ngangu. Teti so filiale ni ahinga so ye tongaso ayeke si, lo vo aye so a hunda na zo ti wara, na lo bata ni teti aTémoin saki use so akpe ague na yâ aDa ti Royaume na yâ gbata ni kue. Aita akangbi kobe ni kete kete juska na ngoi so a kiri a zi yanga ti ndo ti lutingo ti amangboko. Filiale ti Belgique na ti Sierra Leone atokua ayorö na lege ti lapara; nga Grande-Bretagne na France atokua abongo.
Atâa aye ti ngangu so ala yeke na yâ ni, aita ti e angbâ lakue ti duti na nzoni bango ndo nga na ngia. Tënë so mbeni oko so akpe da ti lo ti fani ota atene alingbi na ti ambeni mingi. Lo tene: “Aye so e yeke fa ka tënë na ndo ni la asi awe so; e yeke na lâ ti nda ni.”
Azo ayeda na nzo tënë
Atâa wusuwusu so amû yâ ti kodoro ni kue, aTémoin angbâ lakue ti wara aye ti nzoni na yâ kusala ti fango tënë. Awafango tënë ti Royaume na nze ti janvier ngu 2003 asi 3 879, mbeni wungo so a wara ni lâ oko pëpe nga na nze ti février ala manda Bible na azo 15 227.
Azo ayeke ndulu ti yeda na nzo tënë. Tapande ti ye so alondo na mbeni kete kodoro so ayeke na mbage ti mbongo-to ti kodoro ni. Mbeni kongregation aleke ti sala Matanga ti Dango Bê na kui ti Christ na Bewahn, mbeni kete kodoro so yâ ni akono. Bewahn ayo na ndo so aita ni ayeke sala ka abungbi dä, na a hunda ti tambela ngbonga oku tongaso ti si kâ. Kozoni ti tene aita ni ague na kete kodoro ni ti tisa azo na Mémorial, ala mû mbeni mbeti ti tisango zo na matanga ni na mokonzi-gbata ti Bewahn. Tongana lo wara ni, lo mû Bible ti lo, lo gue lo bâ azo ti kodoro ni na lo diko mbeni versê so a zia ni na ndo mbeti ti tisango zo ni, na lo wa ala ti ga na Mémorial. Tongaso, na ngoi so awafango tënë ni asi, ala bâ so a sala kua ni kue na place ti ala awe! Mokonzi-gbata ni, amolenge ti lo nga na awali ti lo use aga na Mémorial. Wungo ti azo kue so aga ayeke 27. Na pekoni, mokonzi-gbata ni azia ti gue na Église Méthodiste, lo to nda ti manda Bible na aTémoin na lo ye ti mû mbeni sese ti lo ti tene a leke mbeni Da ti Royaume na ndo ni.
Bango ndo ti lo agbian
Tambela ti aita ti e ayeke ga na aye ti nzoni na lege so ambeni wato ti tâ tënë ayeke gbian bango ndo ti ala. Bâ tapande ti mbeni koli so iri ti lo ayeke Opoku. Mbeni pionnier spécial atingbi lo na fango tënë, na lo mû na lo mbeni Tour ti Ba Ndo. Mbeni tënë na yâ mbeti ni agbu bê ti Opoku, me lo yeke na nginza pëpe. Na fango na lo so a zia mbeni ngele ndali ni pëpe, pionnier ni azia na lo mbeti ni na lo leke ti kiri ti ga ti bâ lo. Tongana pionnier ni aga, Opoku ahunda tënë na lo: “Mo hinga mbi? Mingi ti aita ti mo so ayeke na gbata ti Harper ahinga mbi. Ândö, mbi yeke tomba amolenge ti aTémoin na ekole.” Na pekoni lo tene so ni yeke wayinda ti mbeni kota da-mbeti ti gbata ni, na ni sala ngangu lani na amolenge ti aTémoin ti Jéhovah teti so ala ye ti bala drapeau pëpe.
Ye oko, atapande ota ti ndoye ti aChrétien so aTémoin ti Jéhovah afa ni na gigi, apusu Opoku ti kiri ti leke bango ndo ti lo. Kozoni, lo bâ lani so aTémoin ayeke mû maboko na mbeni ita ti ala ti yingo so tele ti lo aso ngangu. A-Témoin ni aleke même ti tene ita ni ague na mbeni kodoro wande ti tene a sava lo. Opoku abâ ti lo lani lo tene ita ni so ayeke mbeni “kota zo” na popo ti aTémoin, me lo ga ti hinga so lo yeke mbeni Témoin tongana tanga ti aTémoin kue. Use ni, ti londo na ngu 1990 ti si na ngu 1999, Opoku aduti mbeni réfugié na Côte d’Ivoire. Mbeni lâ tongana nzara ti ngu asala lo, lo gue ti vo ngu na tïtî mbeni maseka-koli. Opoku ayeke gi na mbeni kugbe ti nginza, na maseka-koli ni alingbi pëpe ti kiri na lo tanga ti pata ni. Tongaso, lo mû ngu ni na Opoku senge senge. Na ngoi so maseka ni amû ngu na Opoku, lo tene: “Mo bâ ti mo so mbeni lâ azo tongana mbi na mo ayeke mû ande aye senge senge na amba ti ala?” Opoku ahunda maseka-koli ni ti bâ wala lo yeke mbeni Témoin ti Jéhovah, na maseka ni ayeda atene ni yeke Témoin. Bibe ti mû ye nga na nzobe ti ita ni agbu bê ti lo mingi. Na nda ni, teti so pionnier spécial ni aduti ndulu ti mû lege na lo ti wara périodique ni na futango mbeni nginza pëpe, Opoku ahinga na bê ti lo biani so lo yeke na sioni bango ndo na ndo aTémoin na fadeso a lingbi lo gbian ni. Lo gue na li ni na lege ti yingo, na fadeso lo yeke mbeni wafango tënë so ade ti mû batême pëpe.
Atâa so aita ti Liberia angbâ lakue ti luti na gbele angangu kpale, ala zia bê ti ala kue na Nzapa, nga na be-biani, ala fa nzo tënë ti nzoni dutingo so ahon ti kozo na gbe ti komandema ti mbilimbili-kue ti Royaume ti Nzapa. Fade Jéhovah ayeke girisa lâ oko pëpe ngangu kusala ti ala na ndoye so ala fa teti iri ti lo.—aHébreu 6:10.
[Acarte na lembeti 30]
(Ti bâ ni mbilimbili, bâ buku ni.)
MONROVIA
[Afoto na lembeti 31]
Na ngoi ti akpale, awakua ti Jéhovah amû maboko na lege ti yingo nga na ti mitele na azo so ye atia ala