A yeke nzoni e sambela a-ange ti wara mungo maboko?
A YEKE na lege ni ti sambela a-ange na ngoi ti vundu? Azo mingi abâ ti ala ni tongaso. Biani, mbeni bakari (New Catholic Encyclopedia) atene: ‘Mbeni zo ayeke sambela a-ange gi ti tene ala leke songo ti e na Nzapa.’ A yeke nzoni e sambela a-ange ti leke songo teti e?
Na popo ti a-ange be-ta-zo ti Nzapa, Mbeti ti Nzapa afa gi iri ti ala use: Michel na Gabriel (Daniel 8:16; 12:1; Luc 1:26; Jude 9). Teti so a zia a-iri so na yâ ti Bible, e lingbi ti hinga so ange oko oko ayeke mbeni zo ti yingo so ayeke nde na amba ti lo nga lo yeke na iri ti lo mveni, pëpe gi mbeni ngangu so ayeke gi tongaso. Ye oko, ambeni ange ake ti fa iri ti ala. Na tapande, tongana Jacob ahunda na mbeni ange so aga ti bâ lo ti fa na lo iri ti lo, ange ni ake (Genèse 32:29; aJuge 13:17, 18). Bible amû pëpe molongo ti a-iri ti a-ange, si a kanga lege na azo ti bi bê mingi na ndo ala.
Fango atokua ti Nzapa na azo ayeke na popo ti akusala so a-ange ayeke sala. Biani, atënë ti Hébreu na ti Grec so a kiri pekoni na “ange” aye mbilimbili ti tene “watokua”. Ye oko, a-ange ayeke sala kusala pëpe tongana awasalango-songo so ayeke mû asambela ti azo ti gue na ni na trône ti Lo Ti Nduzu Ahon Kue. Nzapa ahunda ti tene a sambela lo na iri ti Molenge ti lo, Jésus Christ, so atene: “Ye so i hunda na tïtî Babâ na iri ti Mbi, fade Lo lingbi mû ye so na i.”—Jean 15:16; 1 Timothée 2:5.
Jéhovah Nzapa atene lâ oko pëpe so ni yeke na ye mingi ti salango ni si ni lingbi pëpe ti mä e tongana e ga ndulu na lo. Bible amû beku so: “L’Eternel ayeke ndulu na azo kue so adi iri ti Lo, ala so adi iri ti Lo na lege ti tene-biani.”—Psaume 145:18.