Ye so e lingbi ti manda na lege ti andeke

“BÂ ANDEKE ti nduzu, ala lu le-kobe pëpe, ala fâ le-kobe pëpe, na ala bungbi le-kobe na gogoro pëpe; me Babâ ti i na yayu amû kobe na ala. Ngele ti i ayeke ngangu ahon ngele ti ala pëpe?” (Matthieu 6:26). Jésus Christ asala ândö atënë so na yâ fango ye so azo ahinga ni mingi, so lo mû na ndo mbeni hoto so ayeke ndulu na Ngu ti Galilée. Azo so amä lo ayeke pëpe gi adisciple ti lo. Mbeni kota wungo ti azo so asi singo so alingbi ti ga adisciple ti lo, so alondo na ambage kue ti sese, ayeke lani dä. Mingi na popo ti ala ayeke lani azo ti nzinga so aga na azo ti kobela na Jésus ti sava ala.​—Matthieu 4:23–5:2; Luc 6:17-20.

Tongana lo sava azo ti kobela kue awe, Jésus agboto ândö lê na ndo aye ti yingo so atia azo, so ayeke kota ahon tanga ti aye kue. Na popo ti aye ti manda so lo fa lani, a yeke wara mbeni oko so a sala tënë ni na nduzu ge.

Andeke ti yayu ayeke na fini aninga mingi awe. Ambeni na popo ti ala ayeke te akete kete nyama, alê ti keke na alê ti kobe. Tongana Nzapa amû mara ti gbâ ti akobe tongaso na andeke, biani lo lingbi ti mû maboko na awakua ti lo ti wara kobe ti ala ti lâ oko oko. Lo lingbi ti sala ni na mungo maboko na ala ti wara mbeni kua ti nginza na tongaso, ti wara nginza ti te na kobe. Wala lo lingbi ti sala si kobe so ala lu alë nzoni. Na ngoi ti akpale, Nzapa alingbi ti pusu bê ti anzoni voizin na akamarade ti kangbi na azo so ye atia ala kobe so ala yeke na ni.

Aye mingi ayeke dä so e lingbi ti manda na bango nzoni, fini ti andeke. Nzapa aleke ândö andeke na apendere ye so lo zia na li ti ala ti leke ada ti ala, so na yâ ni, ala lingbi bata amolenge ti ala. Bâ mara ti ada ti ndeke use so ayeke nde nde. Na lê ti foto ti mbage ti gati, a yeke da ti mbeni hirondelle. Lo yeke leke da ti lo na tele ti mbeni tênë wala mbeni da. Li ti da ti andeke tongaso ayeke mbeni tênë so ahonde ni, wala tongana ti so a fa na lê ti foto so, li ti mbeni da. A sala yâ ti da ni na potopoto so aleke ni tongana mbeni kopo. Koli na wali ni use kue ayeke sala kua ngangu ti bungbi potopoto ni, na ala lingbi ti mû nze oko na ndo ni ti hunzi da ti ala. Na pekoni, ala zia apele na akuä ti tele ti andeke na yâ ni. Ala use kue ayeke gi kobe ti ga na ni na amolenge ti ala. Na gbe ni ge, a yeke da ti ndeke so iri ti lo ayeke tisserin. Ndeke ti kodoro ti Afrika so asala kua ngangu mingi, ayeke leke da ti lo na salango kusala na akete lê ti pele. Lo lingbi ti hunzi mbeni da na yâ lango oko na lo lingbi ti leke ada 30 na ndo ni na yâ ngoi oko so ala yeke leke ka ada ti ala!

Ye ti manda ni ayeke so wa? Tongana Nzapa amû mara ti akode tongaso na andeke na agbâ ti ye ti leke na ada ti ala, biani lo lingbi ti mû maboko na awakua ti lo ti wara da so alingbi na ala. Ye oko, Jésus afa so a lingbi a sala mbeni ye nga tongana e ye si Jéhovah Nzapa amû maboko na e ti wara aye so atia e na yâ fini ti e. Jésus amû lani zendo: “I gi royaume ti Nzapa na mbilimbili ti Lo kozoni, na fade A mû ye so kue na i nga.” (Matthieu 6:33). Mo lingbi ti hunda tele ti mo, ‘Ti gi Royaume ti Nzapa kozoni andu nyen?’ A-Témoin ti Jéhovah so ayeke kangbi périodique so ayeke duti ande na ngia ti kiri tënë na hundango tënë so.